The Phnom Penh Post Search

Search form




Logo of Phnom Penh Post newspaper Phnom Penh Post - ធនាគារ​តៃវ៉ាន់​ឈាន​ជើង​ចូល​ទីផ្សារ​ហិរញ្ញវត្ថុ​កម្ពុជា​កាន់​តែ​ច្រើន

ធនាគារ​តៃវ៉ាន់​ឈាន​ជើង​ចូល​ទីផ្សារ​ហិរញ្ញវត្ថុ​កម្ពុជា​កាន់​តែ​ច្រើន

ធនាគារ​តៃវ៉ាន់​ឈាន​ជើង​ចូល​ទីផ្សារ​ហិរញ្ញវត្ថុ​កម្ពុជា​កាន់​តែ​ច្រើន

ភ្នំពេញៈ ធនាគារ​តៃវ៉ាន់ Shanghai Commercial & Savings Bank, LTD (SCSB) បាន​បើក​ការិយាល័យ​តំណាង​នៅ​កម្ពុជា កាល​ពី​ម្សិលមិញ​បន្ទាប់​ពី​បាន​ប្រកាស​ការ​ចូល​មក​កម្ពុជា​កាល​ពី​ខែ ឧសភា ដើម​ឆ្នាំ​នេះ។

ការ​ចាប់​ផ្តើម​ឈាន​ជើង​ចូល​ទីផ្សារ​ហិរញ្ញវត្ថុ​កម្ពុជា​នៅ​ពេល​នេះ​ស្រប​ពេល​មាន​កំណើន​លំហូ​ចូល​នៃ​ធនាគារ និង​វិនិយោគិន​តៃវ៉ាន់​មក​កម្ពុជា។

លោក Peter Hsu នាយក​គ្រប់​គ្រង​ទី​មួយ​នៃ​ការិយាល័យ​តំណាង​របស់​ធនាគារ SCSB ប្រចាំ​នៅ​កម្ពុជា​បាន​ប្រាប់ ភ្នំពេញ ប៉ុស្តិ៍ ថា ការិយាល័យ​តំណាង​នេះ​មាន​តួនាទី​ជា​អ្នក​ផ្តល់​ប្រឹក្សា​ផ្នែក ហិរញ្ញវត្ថុ និង​សេវាកម្ម​ផ្តល់​ព័ត៌មាន​ដល់​អតិថិជន​។

លោក​ថ្លែង​ថា៖ «តៃវ៉ាន់​គឺជា​ដៃ​គូ​រក​ស៊ី​ដ៏​សំខាន់​មួយ​របស់​កម្ពុជា។ ការិយាល័យ​នេះ​គឺជា​កន្លែង​ផ្តល់​ព័ត៌មាន និង​ការ​ប្រឹក្សា​យោបល់​ដល់​អតិថិជន​ទាំង​ក្រៅ​ស្រុក និង​ក្នុង​ស្រុក ពិសេស​សហគ្រិន តៃវ៉ាន់»។

កម្ពុជា​ជា​ទិសដៅ​វិនិយោគ​ដ៏​ធំ​មួយ សម្រាប់ តៃវ៉ាន់។ ក្នុង​វិស័យ​ជំនួញ និង​សម្លៀក​បំពាក់ ក្នុង​ឆ្នាំ ២០១២ តម្លៃ​ពាណិជ្ជកម្ម​រវាង​កម្ពុជា និង​តៃវ៉ាន់​មាន​ចំនួន​ទឹក​ប្រាក់​រហូត​ដល់ ៧០០ លាន​ដុល្លារ​អាមេរិក។

លោក Peter Hsu បាន​ឲ្យ​ដឹង​ថា ធនាគារ SCSB មាន​គម្រោង​បើក​សាខា​ធនាគារ​ប្រចាំ​នៅ​កម្ពុជា តែ​មិន​បាន​បញ្ជាក់​ពេល​វេលា​ពិត​ប្រាកដ​នោះ​ទេ ដោយ​ពន្យល់​ថា ត្រូវ​រង់​ចាំ​ភ្លើង​ខៀវ​ពី​ធនាគារ​ជាតិ​កម្ពុជា​។ លោក​បន្ត​ថា៖ «យើង​នឹង​យក​ចិត្ត​ទុក​ដាក់​ទីផ្សារ​ក្នុង​តំបន់​អាស៊ី​អាគ្នេយ៍ បន្ថែម​ទៀត​នៅ​ពេល​អនាគត»។

លោក អ៊ិន ចាន់នី ប្រធាន​នាយក​ប្រតិបត្តិ​ធនាគារ អេស៊ីលីដា បាន​ស្វាគមន៍​ចំពោះ​ការ​បើក​ការិយាល័យ​តំណាង​ធនាគារ​បន្ថែម​ទៀត​នៅ​ក្នុង ប្រទេស។ លោក​បាន​និយាយ​ថា៖ «កាល​ណា​មាន​ធនាគារ​កាន់​តែ​ច្រើន​មាន​ប្រភព​ទុន​កាន់​តែ​ច្រើន ដែល​នាំ​ប្រទេស​រឹត​តែ​រីក​ចម្រើន។ ធនាគារ​កាន់​តែ​ច្រើន​នាំ​ឲ្យ​មាន​ការ​ប្រកួត​ប្រជែង​ទាំង​តម្លៃ និង​សេវា​ដែល​ជា​ប្រយោជន៍​សម្រាប់​អតិថិជន ព្រោះ​ពួក​គេ​មាន​ជម្រើស​កាន់​តែ​ច្រើន»។

ប៉ុន្តែ​លោក​បាន​បញ្ជាក់​ថា ប្រសិន​បើ​ធនាគារ​កាន់​តែ​ច្រើន​ក្នុង​ទីផ្សារ​ដ៏​ចង្អៀត​បែប​នេះ​គឺ ប្រៀប​ដូចជា នំ​តូច​មួយ​ដុំ​ដែល​ត្រូវ​គេ​ពុះ​ចែក​គ្នា​ជាច្រើន។

ធនាគារ SCSB មាន​ការិយាល័យ​តំណាង​ប្រចាំ​នៅ​ប្រទេស ថៃ និង ហុងកុង។ ធនាគារ​មួយ​នេះ​បាន​បើក​សាខា​រួច​ហើយ​នៅ​ប្រទេស វៀតណាម ហើយ​មាន​គម្រោង​ដំណើរការ​សាខា​មួយ​ទៀត​នៅ​ប្រទេស សិង្ហបុរី នៅ​ឆ្នាំ​ក្រោយ។

ការិយាល័យ​តំណាង​ត្រូវ​បាន​ផ្តល់​អាជ្ញាប័ណ្ណ​រយៈ​ពេល ២ឆ្នាំ អនុញ្ញាត​ឲ្យ​ធនាគារ​មាន​ការិយាល័យ​ទំនាក់​ទំនង​នៅ​ក្នុង​ប្រទេស កម្ពុជា​ហើយ​អាច​ធ្វើ​ការ​សិក្សា​អំពី​អត្ថប្រយោជន៍​សេដ្ឋកិច្ច​នៃ​ការ​វិនិយោគ​នៅ​កម្ពុជា។ ធនាគារ​នឹង​តាម​ដាន​ស្ថានភាព នយោបាយ សេដ្ឋកិច្ច និង​ការ​វិវន្ត​ផ្នែក​ហិរញ្ញវត្ថុ រួច​ហើយ​ផ្តល់​ពត៌មាន​ទៅ​កាន់​ការិយាល័យ​កណ្តាល​របស់​ពួក​គេ​ដើម្បី​ធ្វើ​ការ​សម្រេច​ចិត្ត។

បើ​តាម​ទិន្នន័យ​ធនាគារ​ជាតិ​ធនាគារ SCSB គឺជា​ធនាគារ​តៃវ៉ាន់ ទី៦ ហើយ​ដែល​មាន​វត្តមាន​នៅ​ទីផ្សារ​កម្ពុជា។ ក្នុង​នោះ​មាន​ធនាគារ First Commercial Bank ធនាគារ Mega ICBC bank ធនាគារ Taiwan Cooperative Bank ធនាគារ Cathay banking group (ដែល​មាន​ភាគ​ហ៊ុន ១០០ ភាគរយ​នៅ SBC) E sun bank (ដែល​មាន​ហ៊ុន ៧០ ភាគរយ​នៅ​ធនាគារ UCB)៕

អត្ថបទគួរចាប់អារម្មណ៍