The Phnom Penh Post Search

Search form




Logo of Phnom Penh Post newspaper Phnom Penh Post - ធនាគារ​ម៉ាឡេស៊ី Hong Leong Bank នឹង​ក្លាយ​ជា​ធនាគារ​ពាណិជ្ជ​ទី​៣៣ នៅ​កម្ពុជា

ធនាគារ​ម៉ាឡេស៊ី Hong Leong Bank នឹង​ក្លាយ​ជា​ធនាគារ​ពាណិជ្ជ​ទី​៣៣ នៅ​កម្ពុជា

ធនាគារ​ម៉ាឡេស៊ី Hong Leong Bank នឹង​ក្លាយ​ជា​ធនាគារ​ពាណិជ្ជ​ទី​៣៣ នៅ​កម្ពុជា

130215_11
សាខាមួយរបស់ក្រុមហ៊ុន Hong Leong Financial Group Berhad នៅក្នុងប្រទេសម៉ាឡេស៊ី bloomberg

ភ្នំពេញៈ ធនាគារ Hong Leong Bank ដែល​មាន​មូលដ្ឋាន​នៅ​ម៉ាឡេស៊ី និង​ជា​ក្រុមហ៊ុន​បុត្រ​សម្ព័ន្ធ​របស់​ក្រុមហ៊ុន Hong Leong Financial Group Berhad មាន​ផែន​ការ​បើក​ដំណើរ​ការ​នៅ​កម្ពុជា​ក្នុង​ពេល​ណា​មួយ​នៅ​ឆ្នាំ​នេះ។​ធនាគារ​នេះ​នឹង​ក្លាយ​ជា​ធនាគារ​របស់​ម៉ាឡេស៊ី​ទី៤​និង​ជា​ធនាគារ​ពាណិជ្ជ​ទី ៣៣ ក្នុង​ឧស្សាហកម្ម​ធនាគារ​ដ៏​ចង្អៀត​របស់​កម្ពុជា​។

យោង​តាម​សេចក្តី​ប្រកាស​របស់​ក្រុមហ៊ុន Hong Leong Bank ដែល​ចេញ​ផ្សាយ​កាល​ពី​ថ្ងៃ​ព្រហស្បតិ៍​ថា ធនាគារ Hong Leoung Bank ដែល​ជា​ស្ថាប័ន​ហិរញ្ញវត្ថុ​ឈាន​មុខ​មួយ​ក្នុង​ប្រទេស​ម៉ាឡេស៊ី​នឹង​ចាប់​ផ្តើម​ប្រតិបត្តិការ​នៅ​កម្ពុជា​។

លោក​ស្រី ងួន សុខា អគ្គ​នាយិកា​ធនាគារ​ជាតិ​នៃ​កម្ពុជា​បាន​មាន​ប្រសាសន៍​កាល​ពី​ថ្ងៃ​ព្រហស្បតិ៍​ថា ធនាគារ​នេះ​បាន​ស្នើ​សុំ​អាជ្ញាប័ណ្ណ​កាល​ពី​ឆ្នាំ​មុន​។

លោក​ស្រី​បាន​បន្ថែម​ថា៖ «​ពួក​គេ​បាន​ដាក់​ពាក្យ​ស្នើ​សុំ​ប្រហែល​ជាង​មួយ​ឆ្នាំ​មក​ហើយ​ប៉ុន្តែ​ធនាគារ​នេះ​ទើប​ទទួល​បាន​ការ​យល់​ព្រម​ជា​គោល​ការណ៍​កាល​ពី​ខែ​មុន។​យើង​កំពុង​ពិនិត្យ​និង​ធ្វើ​ការ​លើ​ផែន​ការ​ពាណិជ្ជកម្ម​របស់​ពួក​គេ​ព្រោះ​យើង​ចង់​ឲ្យ​ប្រាកដ​ថា​តើ​ពួក​គេ​មាន​លក្ខណៈ​គ្រប់​គ្រាន់​តាម​តម្រូវ​ការ​របស់​យើង​ហើយ​ឬ​នៅ»។

លោក​ស្រី​មាន​ប្រសាសន៍​ថា៖​«​ខ្ញុំ​មិន​អាច​និយាយ​បាន​ថា​តើ​នៅ​ពេល​ណា​ដែល​យើង​នឹង​អនុម័ត​សំណើ​ពួក​គេ​ទេ​ដោយ​សារ​តែ​យើង​ត្រូវ​ការ​ត្រួត​ពិនិត្យ​ឲ្យ​បាន​លម្អិត​អំពី​ផែន​ការ​ពាណិជ្ជកម្ម​របស់​ពួក​គេ​។ ប្រសិន​បើ​មាន​អ្វី​មួយ​ដែល​ពួក​គេ​មិន​បាន​ឆ្លើយ​តប​តាម​តម្រូវ​ការ​របស់​យើង​នោះ​យើង​នឹង​ជូន​ដំណឹង​ដល់​ពួក​គេ​ឲ្យ​កែ​ប្រែ​ឡើង​វិញ​»​។

លោក​ស្រី​បាន​បញ្ជាក់​ថា​ពេល​នេះ​យើង​កំពុង​គិត​ពិចារណា​លើ​ការ​អនុម័ត​នេះ​ប៉ុន្តែ​យើង​នឹង​ធ្វើ​វា​ក្នុង​ឆ្នាំ​នេះ​»។

ធនាគារ Hong Leong Bank បាន​បើក​ដំណើរ​ការ​ក្នុង​ប្រទេស​ម៉ាឡេស៊ី​អស់​រយៈ​ពេល​ជាង​១០០​ឆ្នាំ​មក​ហើយ​។ កាល​ពី​ឆ្នាំ​២០១១​ធនាគារ​នេះ​បាន​បញ្ចប់​ការ​ច្របាច់​បញ្ចូល​គ្នា​ជាមួយ​ក្រុមហ៊ុន EON Bank Group។ ការ​ច្របាច់​បញ្ចូល​គ្នា​នេះ បាន​ផ្លាស់​ប្តូរ​ធនាគារ​នេះ​ទៅ​ជា​ក្រុមហ៊ុន​ដ៏​ធំ​មួយ​ដែល​មាន​ទ្រព្យ​សកម្ម​ជាង​១៤៥ ពាន់​លាន​រីងហ្គីដ (ប្រហែល ៤៦,៩២​ពាន់​លាន​ដុល្លារ) និង​ពង្រីក​បណ្ដាញ​សាខា​ចំនួន​៣២៩​ទូ​ទាំង​ប្រទេស​។

សព្វ​ថ្ងៃ​នេះ Hong Leong Bank មាន​សាខា​ក្នុង​ប្រទេស​សិង្ហបុរី និង​ទីក្រុង​ហុងកុង​ព្រម​ទាំង​មាន​ក្រុមហ៊ុន​បុត្រ​សម្ព័ន្ធ​ដែល​មាន​ភាគ​ហ៊ុន​១០០​ភាគ​រយ​នៅ​វៀតណាម​និង​នៅ​ក្នុង​ប្រទេស​ចិន​មាន​ភាគ​ហ៊ុន​២០​ភាគ​រយ​ក្នុង​ធនាគារ Bank of Chengdu Co.,Ltd. នៅ​ខេត្ត​ស៊ីឈួន។

លោក​ស្រី​ងួន សុខា បាន​ថ្លែង​ថា​ភាព​ប្រសើរ​ឡើង​នា​ពេល​បច្ចុប្បន្ន​នេះ​ក្នុង​វិស័យ​ពាណិជ្ជកម្ម​និង​ការ​វិនិយោគ​ពី​ប្រទេស​ម៉ាឡេស៊ី​នៅ​កម្ពុជា​គឺ​ជា​ចំណុច​សំខាន់​ដើម្បី​ទាក់​ទាញ​ឲ្យ​ធនាគារ​មក​ពី​ម៉ាឡេស៊ី​។

អគ្គ​នាយិកា​ធនាគារ​ជាតិ​នៃ​កម្ពុជា​បាន​ថ្លែង​ថា​៖ «​ទំនាក់​ទំនង​ពាណិជ្ជកម្ម​និង​ការ​វិនិយោគ​មក​ពី​ប្រទេស​ម៉ាឡេស៊ី​កំពុង​មាន​កំណើន​យ៉ាង​ខ្លាំង​ដូច​នេះ​វត្តមាន​របស់​ធនាគារ​ម៉ាឡេស៊ី​ថ្មី​នេះ​នឹង​ជួយ​បំពេញ​កំណើន​តម្រូវ​ការ​របស់​វិនិយោគិន​មក​ពី​ប្រទេស​ម៉ាឡេស៊ី​ឬ​ក៏​ពាណិជ្ជករ​ទាំង​អស់​នៅ​ទី​នេះ។​ខ្ញុំ​គិត​ថា​ទោះ​ជា​មាន​ធនាគារ​ចំនួន​បួន​មក​ពី​ប្រទេស​ម៉ាឡេស៊ី​ហើយ​ក៏​ដោយ​ក៏​វត្តមាន​របស់ Hong Leong Bank ក្នុង​ទី​ផ្សារ​គឺ​នៅ​តែ​ល្អ​ដោយ​សារ​យើង​មាន​ឱកាស​ច្រើន​សម្រាប់​ពួក​គេ»។

ទិន្នន័យ​របស់​ធនាគារ​ជាតិ​នៃ​កម្ពុជា​បាន​បង្ហាញ​ថា​កាល​ពី​ដំណាច់​ឆ្នាំ​មុន​កម្ពុជា​មាន​ធនាគារ​ពាណិជ្ជ​ចំនួន ៣៣ ដែល​ក្នុង​ចំណោម​នេះ​ធនាគារ​ចំនួន​១៣​ជា​ធនាគារ​ក្នុង​ស្រុក ហើយ​ធនាគារ​បរទេស​មាន​ចំនួន​៩ និង១០ ជា​ធនាគារ​បុត្រ​សម្ព័ន្ធ​របស់​ធនាគារ​បរទេស​៕ ​PB

អត្ថបទគួរចាប់អារម្មណ៍