The Phnom Penh Post Search

Search form

Logo of Phnom Penh Post newspaper Phnom Penh Post - ប្រាក់​អឺរ៉ូ​ធ្លាក់​ថ្លៃ ខណៈ​វិបត្តិ​នៅ​ស៊ីប​និង​បញ្ហា​នយោបាយ​នៅ​អ៊ីតាលី​នៅ​តែ​មាន




ប្រាក់​អឺរ៉ូ​ធ្លាក់​ថ្លៃ ខណៈ​វិបត្តិ​នៅ​ស៊ីប​និង​បញ្ហា​នយោបាយ​នៅ​អ៊ីតាលី​នៅ​តែ​មាន

ប្រាក់​អឺរ៉ូ​ធ្លាក់​ថ្លៃ ខណៈ​វិបត្តិ​នៅ​ស៊ីប​និង​បញ្ហា​នយោបាយ​នៅ​អ៊ីតាលី​នៅ​តែ​មាន

130402_16a
ពលរដ្ឋស៊ីបនាំគ្នាតម្រង់ជួររង់ចាំដកប្រាក់ពីធនាគារ Cyprus Popular Bank Pcl នាក្រុងណាកូស៊ី bloomberg

ក្រុង តូក្យូៈ ប្រាក់​ដុល្លារ​និង​ប្រាក់​អឺរ៉ូ​បាន​ធ្លាក់​ថ្លៃ​បើ​ធៀប​នឹង​ប្រាក់​យ៉េន​ក្នុង​ការ​ទិញ​លក់​នៅ​អាស៊ី​កាល​ពី​ថ្ងៃ​ចន្ទ​ក្នុង​គ្រា​ដែល​មាន​កង្វល់​ពី​ប្រទេស​ស៊ីប​ដែល​ជំពាក់​បំណុល​វ័ណ្ឌ​ក​និង​ភាព​មិន​ប្រាកដ​ប្រជា​ផ្នែក​នយោបាយ​នៅ​ប្រទេស​អ៊ីតាលី​ខណៈ​ការ​អង្កេត​មួយ​របស់​ធនាគារ​កណ្តាល​ជប៉ុន​បាន​បង្ហាញ​ពី​ការ​កើន​ឡើង​ខ្លាំង​នូវ​ទំនុក​ចិត្ត​ពាណិជ្ជកម្ម​។

អារម្មណ៍​ចំពោះ​ប្រាក់​អឺរ៉ូ​បាន​ធ្លាក់​ចុះ​បន្ទាប់​ពី​តំបន់​អឺរ៉ុប​ជួប​ប្រទះ​រឿង​រ៉ាវ​ដ៏​លំបាក​ក្នុង​រយៈ​ពេល​មួយ​សប្តាហ៍​មក​នេះ​ដោយ​សារ​ប្រព័ន្ធ​ធនាគារ​ក្នុង​ប្រទេស​ស៊ីប​។

នៅ​ក្នុង​ការ​ជួញ​ដូរ​នៅ​ក្រុង​តូក្យូ​កាល​ពី​ព្រឹក​ម្សិល​មិញ​ប្រាក់​ដុល្លារ​បាន​ធ្លាក់​ដល់​តម្លៃ​៩៣,៨៩​យ៉េន​ក្នុង​មួយ​ដុល្លារ​បើ​ធៀប​នឹង​តម្លៃ ៩៤,២០​យ៉េន​នៅ​ក្នុង​ការ​ជួញ​ដូរ​កាល​ពី​ចុង​សប្ដាហ៍​ក្នុង​អំឡុង​ពេល​ពិធី​បុណ្យ Easter កាល​ពី​ថ្ងៃ​សុក្រ​នៅ​ក្រុង​ញូវ​យ៉ក។

ប្រាក់​អឺរ៉ូ​មាន​តម្លៃ​១,២៧៧៧​ដុល្លារ​និង​១១៩,៩៨​យ៉េន​ក្នុង​មួយ​អឺរ៉ូ​ដែល​មុន​នេះ​មាន​តម្លៃ​១,២៨២៨​ដុល្លារ​និង១២០,៧៨​យ៉េន​ក្នុង​មួយ​អឺរ៉ូ​នៅ​ក្នុង​ការ​ជួញ​ដូរ​នៅ​អាមេរិក​ខណៈ​ថវិកា​សង្គ្រោះ​នៅ​ប្រទេស​ស៊ីប​និង​អស្ថិរភាព​នយោបាយ​នៅ​អ៊ីតាលី​បាន​ព្រមាន​ដល់​ការ​ជួញ​ដូរ​នៃ​រូបិយប័ណ្ណ​រួម​នេះ​។

នៅ​សប្ដាហ៍​ខាង​មុខ​នេះ កិច្ច​ប្រជុំ​ស្តីពី​គោល​នយោបាយ​រូបិយវត្ថុ​នឹង​ត្រូវ​រៀបចំ​ឡើង​ដោយ​ធនាគារ​កណ្ដាល​ជប៉ុន​(BoJ) ធនាគារ​កណ្ដាល​អឺរ៉ុប(ECB) និង​ធនាគារ​កណ្ដាល​អង់គ្លេស​។

ទីផ្សារ​នឹង​ឃ្លាំ​មើល​ថា​តើ​ប្រធាន​ធនាគារ ECB លោក Mario Draghi ខិត​ខំ​រម្ងាប់​ទីផ្សារ​ឬ​យ៉ាង​ណា​នៅ​ពេល​លោក​ធ្វើ​សន្និសីទ​កាសែត​ខ្លី​ប្រចាំ​ខែ​កាល​ពី​ថ្ងៃ​ព្រហស្បតិ៍​ទោះ​ជា​ក្រុម​អ្នក​ឃ្លាំ​មើល​ធនាគារ​បាន​នាំ​គ្នា​និយាយ​ថា​ ធនាគារ ECB ទំនង​ជា​ពន្យារ​ពេល​ចេញ​វិធាន​ការ​គោល​នយោបាយ​ថ្មី​ណា​មួយ​ក្តី។

ការ​ស្ទង់​មតិ​របស់​ធនាគារ​កណ្តាល​ជប៉ុន​ដែល​ចេញ​ផ្សាយ​កាល​ពី​ថ្ងៃ​ចន្ទ​បាន​បង្ហាញ​ថា ទំនុក​ចិត្ត​នៅ​ក្នុង​ចំណោម​ក្រុមហ៊ុន​ផលិតកម្ម​របស់​ជប៉ុន​ធំៗ​មាន​ភាព​ប្រសើរ​នៅ​ក្នុង​ត្រីមាស​ទីមួយ​ឆ្នាំ​នេះ​ខណៈ​ដែល​រដ្ឋាភិបាល​ក្រុង​តូក្យូ​កំពុង​ព្យាយាម​ធ្វើ​ឲ្យ​ប្រទេស​ជាតិ​ងាក​ទៅ​រក​ការ​ទទួល​បាន​កំណើន​សេដ្ឋកិច្ច​ល្អ​ឡើង​វិញ​នៅ​ក្នុង​ប្រទេស​ដែល​មាន​សេដ្ឋកិច្ច​ធំ​បំផុត​ទីបី​នៅ​ក្នុង​ពិភពលោក​មួយ​នេះ។

ធនាគារ BoJ នឹង​បើក​កិច្ច​ប្រជុំ​ស្តី​ពី​គោល​នយោបាយ​នៅ​សប្ដាហ៍​នេះ​ខណៈ​ទេសាភិបាល​ថ្មី​របស់​ខ្លួន​គឺលោក Haruhiko Kuroda ពិភាក្សា​អំពី​ផែន​ការ​របស់​លោក​ដើម្បី​ជំរុញ​សេដ្ឋកិច្ច​និង​សម្រេច​ទិសដៅ​អតិផរណា​បន្ទាប់​ពី​ទទួល​រង​នូវ​បរិត្តផរណា​អស់​រយៈ​ពេល​ជា​ច្រើន​ឆ្នាំ​មក​នេះ។

ការ​សន្យា​របស់​លោក​ក្នុង​ការ​កម្ចាត់​ចោល​នូវ​បរិត្តផរណា​បាន​ជំរុញ​ឲ្យ​មាន​ការ​រំពឹង​ទុក​ថា ធនាគារ​កណ្តាល​ជប៉ុន​នឹង​ចាប់​ផ្តើម​ដាក់​ចេញ​វិធាន​ការ​គោល​នយោបាយ​តក់​ក្រហល់​ថ្មី​មួយ ដែល​គ្រោង​នឹង​ទម្លាក់​ថ្លៃ​ប្រាក់​យ៉េន ដែល​នឹង​ជួយ​ដល់​ក្រុមហ៊ុន​នាំ​ចេញ​របស់​ប្រទេស​នេះ។

ក្រុមហ៊ុន​ដោះ​ដូរ​រូបិយប័ណ្ណ​នានា​បាន​ឲ្យ​ដឹង​ថា ទីផ្សារ​ប្តូរ​ប្រាក់​បរទេស​ក៏​នឹង​ផ្តោត​ទៅ​លើ​ភាព​ជាប់​គាំង​ផ្នែក​នយោបាយ​នៅ​អ៊ីតាលី​ផង​ដែរ បន្ទាប់​ពី​មេ​ដឹក​នាំ​បែប​ឆ្វេង​និយម​នៃ​គណបក្ស Pier Luigi Bersani បាន​បោះ​បង់​ចោល​ការ​ព្យាយាម​បង្កើត​រដ្ឋាភិបាល​ថ្មី​មួយ​បន្ទាប់​ពី​ការ​ចរចា​រយៈ​ពេល​មួយ​សប្តាហ៍​ដែល​គ្មាន​លទ្ធផល៕ PN

អត្ថបទគួរចាប់អារម្មណ៍