ភ្នំពេញៈ ធនាគារពាណិជ្ជធំៗ នៅប្រទេសកម្ពុជាបានឲ្យដឹងថា ការផ្តល់ប្រាក់កម្ចី និងការទទួលប្រាក់បញ្ញើបានកើនឡើងយ៉ាងខ្លាំងក្នុងអំឡុងឆមាសទីមួយឆ្នាំនេះ។
លោក Grant Knuckey ប្រធាននាយកប្រតិបត្តិធនាគារ ANZ Royal បានប្រាប់ភ្នំពេញប៉ុស្តិ៍ កាលពីម្សិលមិញថា គិតមកត្រឹមដំណាច់ខែមិថុនាឆ្នាំនេះតម្រូវការសេវាកម្មធនាគារនៅបន្តមានការកើនឡើងយ៉ាងខ្លាំង។ អត្រាកំណើនប្រាក់កម្ចីនៅក្នុងធនាគារ ANZ Royal គិតមកត្រឹមដំណាច់ឆមាសទីមួយឆ្នាំនេះមាន ១៣ ភាគរយ ខណៈប្រាក់បញ្ញើបានកើន ១៩ ភាគរយបើធៀបនឹងពីដំណាច់ឆមាសទីមួយឆ្នាំមុន។
លោកលើកឡើងថា៖«វិស័យធនាគារនៅតែមានកំណើននិងមានភាពរឹងមាំនៅក្នុងឆមាសទីមួយឆ្នាំនេះ។ តែទន្ទឹមនឹងនេះអត្រាប្រាក់ចំណេញមិនមានការកើនឡើងខ្លាំងដូចកំណើនប្រាក់កម្ចីនោះទេ»។ លោកចង់សំដៅដល់ការបង្ខំចិត្តផ្តល់ជូនសេវាកម្មឬ ផលិតផលក្នុងអត្រាចំណេញតិចតួចដោយសារសម្ពាធនៃការប្រកួតប្រជែងកាន់តែខ្លាំង។
អេស៊ីលីដា ដែលជាធនាគារធំជាងគេមួយនៅកម្ពុជាក៏ទទួលបានកំណើនខ្លាំងក្នុងការផ្តល់ជូនសេវាកម្មហិរញ្ញវត្ថុនេះផងដែរ។ គិតដល់ដំណាច់ខែមិថុនានេះ ទំហំកម្ចីសរុបមាន ១,៣៩ ពាន់លានដុល្លារ កើន ២២,៦ ភាគរយបើធៀបដំណាច់ខែមិថុនាឆ្នាំមុន។ ប្រាក់បញ្ញើមានចំនួន ១,៥៩ ពាន់លានដុល្លារកើន ២០ ភាគរយ។
អ្នកស្រី សូ ផនណារី អនុប្រធាននាយកប្រតិបត្តិ ធនាគារអេស៊ីលីដា បានឲ្យដឹងថាការផ្តល់កម្ចីដល់សហគ្រាសធុនតូចនិង មធ្យមមានចំនួនច្រើនជាងគេដែលជាកត្តាយ៉ាងសំខាន់ក្នុងការជំរុញកំណើនប្រាក់កម្ចី បន្ទាប់មកកម្ចីផ្នែកកសិកម្មដែលមានអត្រាកំណើនប្រមាណ ៣៤,៦ ភាគរយប្រៀបធៀបទៅដំណាច់ឆមាសទីមួយ កាលពីឆ្នាំមុន។
អ្នកស្រីបានបន្តថា៖«ការផ្តល់កម្ចីនិងការទទួលប្រាក់បញ្ញើនៅធនាគារអេស៊ីលីដាមានការកើនឡើងយ៉ាងល្អ ហើយនិន្នាការនេះនៅបន្តទៀត»។
ធនាគារសហពាណិជ្ជ ក៏ទទួលបានកំណើនខ្លាំងផងដែរ។
លោកយុមស៊ីសាង ប្រធានគ្រប់គ្រងទូទៅធនាគារសហពាណិជ្ជបានឲ្យដឹងថាប្រាក់កម្ចីដែលផ្តល់ទៅអតិថិជនរបស់ធនាគារនេះ មានចំនួនសរុប ២០០ លានដុល្លារ គិតត្រឹមដំណាច់ឆមាសទីមួយ ពោលគឺកើនឡើង៤៤ ភាគរយពី១៣៩ លានដុល្លារកាលពីដំណាច់ឆមាសទីមួយឆ្នាំមុន។ ប្រាក់បញ្ញើមាន១៧១លានដុល្លារ កើនឡើង២៤ ភាគរយ។
តាមរបាយការណ៍ពីធនាគារជាតិនៃកម្ពុជាការផ្តល់កម្ចីពីគ្រឹះស្ថានធនាគារពាណិជ្ជនៅកម្ពុជាគិតមកត្រឹមដំណាច់ខែមីនាឆ្នាំនេះមានចំនួនសរុប ៦,១៤ ពាន់លានដុល្លារ គឺកើនឡើងពីចំនួន ៤,៦៥ ពាន់លានដុល្លារ កាលខែមីនាឆ្នាំមុន។ ស្របពេលជាមួយគ្នាទំហំប្រាក់បញ្ញើសរុបបានកើនដល់ ៦,៣៩ ពាន់លានដុល្លារ។
លោក Grant Knuckey បានអះអាងថា ការរីកចម្រើនផ្នែកប្រព័ន្ធធនាគារទាំងខាងប្រាក់កម្ចី និងប្រាក់បញ្ញើជាការឆ្លុះបញ្ចាំងពីកំណើនផ្នែកសេដ្ឋកិច្ចនៅក្នុងប្រទេស។ លោកថ្លែងថា៖ «ខ្ញុំរំពឹងថាតម្រូវការសេវាកម្មហិរញ្ញវត្ថុនឹងនៅបន្តកើនឡើងថែមទៀតជាពិសេសនៅត្រីមាសចុងក្រោយ ព្រោះនឹងមានសកម្មភាពវិនិយោគកាន់តែច្រើនបន្ទាប់ពីការបោះឆ្នោតជាតិបានកន្លងផុត»៕
