.jpg)
សិស្សចូលរៀនវិញដោយពាក់របាំងមុខការពារពីការឆ្លងជំងឺកូវីដ១៩ នៅខេត្តសៀមរាបកាលពីថ្ងៃម្សិលមិញ។ រូបថត ក្រសួងអប់រំ យុវជន និងកីឡា
ភ្នំពេញៈ លោក ហង់ជួន ណារ៉ុន រដ្ឋមន្ដ្រីក្រសួង អប់រំ យុវជន និងកីឡាបានអំពាវនាវដល់គណៈគ្រប់គ្រងគ្រឹះស្ថានសិក្សាទាំងអស់បន្តអនុវត្តនូវស្តង់ដាអនាម័យតាមគោលការណ៍ប្រតិបត្តិស្តង់ដា (SOP) ដើម្បីទប់ស្កាត់ការរីករាលដាលនៃជំងឺកូវីដ ១៩ ក្នុងពេលបើកដំណើរការគ្រឹះស្ថានសិក្សាឡើងវិញទូទាំងប្រទេសកាលពីថ្ងៃម្សិលមិញ។
លោករដ្ឋមន្ដ្រីបានអំពាវនាវបែបនេះក្នុងពេលចុះពិនិត្យមើលនៅតាមសាលារៀននានាក្នុងខេត្តសៀមរាបក្នុងថ្ងៃចូលរៀនឡើងវិញលើកដំបូងកាលពីម្សិលមិញបន្ទាប់ពីបានបិទទ្វារគ្រឹះស្ថានសិក្សាអស់រយៈពេល ៦ ខែកន្លងមក ដើម្បីទប់ស្កាត់ការរីករាលដាលជំងឺកូវីដ ១៩ នៅកម្ពុជា។
លោក ណារ៉ុន ថ្លែងថា៖ «ខ្ញុំសូមលើកទឹកចិត្ដឲ្យគណៈគ្រប់គ្រងសាលាបន្តអនុវត្ដនូវស្តង់ដាអនាម័យតាមគោលការណ៍ប្រតិបត្តិស្តង់ដាដែលក្រសួងបានដាក់ចេញទៅឲ្យបានខ្ពស់។ សាលារៀនសាធារណៈរបស់រដ្ឋយើងមានសិស្សច្រើន ដូច្នេះយើងបានណែនាំដល់គណៈគ្រប់គ្រងសាលាក្នុងនោះ សាលាមត្ដេយ្យសិក្សាគឺឲ្យរៀនបែងចែកចេញជា ២ វេន [សិស្ស ១ ថ្នាក់មាន ២០ ទៅ ៣០ នាក់ ដូច្នេះបែងចែកជា ២ វេនក្នុង ១ ថ្នាក់មានសិស្សរៀនត្រឹម ១៥ នាក់ប៉ុណ្ណោះ]»។
លោករដ្ឋមន្ដ្រីបានថ្លែងថា៖ «ចំណែកថ្នាក់បឋមសិក្សាបានបែងចែកចេញជា ៣ វេន គឺក្នុង ១ សប្ដាហ៍សិស្សរៀនតែ ២ ថ្ងៃទេនេះជាការបើកសាកល្បង។ បើការបើកសាកល្បងនេះ ដំណើរការបានជោគជ័យនៅថ្ងៃក្រោយក្រសួងនឹងពិនិត្យការបើកឡើងវិញដើម្បីឲ្យសិស្សបានរៀនរឹតតែច្រើនថែមទៀត»។
យោងតាមក្រសួងអប់រំ គ្រឹះស្ថានសិក្សាសាធារណៈចាប់ពីថ្នាក់ទី ៩ និងថ្នាក់ទី ១២ នៅទូទាំងប្រទេសត្រូវបានអនុញ្ញាតឲ្យបើកដំណើរការចូលរៀនឡើងវិញកាលពីថ្ងៃម្សិលមិញ។ ប៉ុន្តែគ្រឹះស្ថានសិក្សាសាធារណៈដែលអាចបើកដំណើរការឡើងវិញគ្រប់កម្រិតសិក្សា គឺមានតែ ៤ ប៉ុណ្ណោះគឺទីរួមខេត្ត ក្រចេះ ស្ទឹងត្រែង រតនគិរី និងទីរួមខេត្តមណ្ឌលគិរីព្រោះខេត្ដទាំងនេះកម្រិតហានិភ័យទាបនៃការឆ្លងជំងឺកូវីដ ១៩ ក្រៅពីនេះក្រសួងអប់រំ បាននិងបន្តពិនិត្យលទ្ធភាពជាក់ស្ដែងបើកដំណើរការគ្រឹះស្ថានសិក្សាសាធារណៈតាមរាជធានី-ខេត្តផ្សេងទៀតតាមទ្រង់ទ្រាយតូច និងរៀនឆ្លាស់វេនគ្នា។
លោករដ្ឋមន្ដ្រីថ្លែងថា៖ «ក្នុងថ្ងៃបើកឡើងវិញដំបូងនេះ ខ្ញុំសង្កេតឃើញសិស្សខ្លះពួកគាត់ហាក់បីដូចជាភ្លេច (មេរៀន) ជាពិសេសសិស្សនៅថ្នាក់បឋមសិក្សាថ្នាក់ទី ១- ទី ២។ ប៉ុន្ដែសម្រាប់សិស្សពីថ្នាក់ទី ៥ ថ្នាក់ទី ៦ ពួកគាត់មិនសូវភ្លេចទេ ព្រោះពួកគាត់អាចរៀនបានដោយខ្លួនឯងនៅផ្ទះ និងរៀនតាមអនឡាញ ដូច្នេះការបើកដំណើរការឡើងវិញនេះក៏បានជួយកុំឲ្យសិស្សភ្លេចមេរៀន សិស្សអាចចូលរៀនវិញបាន»។
លោករដ្ឋមន្ដ្រីបានអះអាងថា គណៈគ្រប់គ្រងសាលាបានខិតខំប្រឹងប្រែងរៀបចំបើកសាលាឡើងវិញដោយគោរពតាមស្ដង់ដាអនាម័យដែលក្រសួងបានណែនាំ ហើយបានអំពាវនាវបន្តដល់គណៈគ្រប់គ្រង និងលោកគ្រូអ្នកគ្រូទាំងអស់ អប់រំសិស្សានុសិស្សឲ្យបន្តអនុវត្ដស្ដង់ដាអនាម័យដើម្បីធានាសុវត្ថិភាពដល់សិស្ស និងចូលរួមក្នុងការប្រយុទ្ធប្រឆាំងនឹងជំងឺកូវីដ១៩។
ក្រសួងអប់រំក៏បានកំណត់ឲ្យអនុវត្តស្តង់ដាអនាម័យដល់សាលារៀន ត្រូវរៀបចំបរិស្ថានសិក្សាប្រកបដោយសុវត្ថិភាព បរិយាប័ន្ន ផាសុកភាព និងមេត្រីភាព កៅអីការអង្គុយសម្រាប់សិស្សានុសិស្សត្រូវរក្សាគម្លាតសុវត្ថិភាពយ៉ាងហោចណាស់ ២ ម៉ែត្រ និងរៀបចំចំណុះថ្នាក់ដោយកំណត់សិស្សមិនឱ្យលើសពី ១៥ ទៅ ២០ នាក់ក្នុង ១ ថ្នាក់។ សិស្សានុសិស្សទាំងអស់ មុនពេលចូលសាលាតម្រូវឲ្យមានការវាស់កម្តៅ វាយត្រាសម្គាល់ លាងសម្អាតដៃកម្ចាត់មេរោគ ពាក់ម៉ាស់ ឬរបាំងមុខកាត់បន្ថយការប្រមូលផ្ដុំជាដើម។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានថ្លែងកាលពីម្សិលមិញដែរថា ការអនុញ្ញាតឲ្យចូលរៀនគ្រប់កម្រិតគឺសម្រាប់តែគ្រឹះស្ថានសិក្សាសាធារណៈទីរួមខេត្តចំនួន ៤ រួមមានខេត្តក្រចេះ ស្ទឹងត្រែង រតនគិរី និងមណ្ឌលគិរីដែលខេត្ដទាំងនោះមានអត្រាឆ្លងកូវីដ ១៩ ក្នុងកម្រិតទាប។
លោកថ្លែងថា៖ «នៅក្នុងការបើកដំណើរការសាលារៀនឡើងវិញនៅដំណាក់កាលទី ២ នេះគឺគណៈគ្រប់គ្រងសាលារៀនទាំងអស់ត្រូវចូលរួមអនុវត្ដនូវស្តង់ដាអនាម័យ និងគោលការណ៍ប្រតិបត្តិស្តង់ដា (SOP) របស់ក្រសួងអប់រំ យុវជន និងកីឡា ចុះថ្ងៃទី ៤ ខែសីហា ឆ្នាំ ២០២០»។
រដ្ឋាភិបាលបានប្រកាសបិទសាលារៀនទាំងអស់នៅទូទាំងប្រទេសតាំងពីខែមីនា ដោយតម្រូវឱ្យសិស្សទាំងនៅទីក្រុង និងជនបទសិក្សាពីចម្ងាយ តាមរយៈកម្មវិធីបង្រៀនតាមទូរទស្សន៍ ឬបណ្ដាញសង្គមហ្វេសប៊ុក ដើម្បីទប់ស្កាត់កុំឲ្យមានការឆ្លងជំងឺកូវីដ ១៩។ ចំណែកការបើកដំណើរការសាលារៀនឡើងវិញគឺត្រូវចែកចេញជា ៣ ដំណាក់កាលគឺដំណាក់កាលទី ១ សម្រាប់សាលាដែលមានស្ដង់ដាសុវត្ថិភាពខ្ពស់ ទី ២ សម្រាប់សាលាមានស្ដង់ដាសុវត្ថិភាពមធ្យម និងទី ៣ សម្រាប់សាលារៀនដែលមានស្ដង់ដាអប្បបរមា៕
វីដេអូ៖
