.jpg)
ប្រជាជនខ្មែរកាន់តែច្រើនប្រើប្រាស់ប្រព័ន្ធអេឡិចត្រូនិកសម្រាប់ទូទាត់។ ហុង មិនា
ភ្នំពេញៈ Visa Inc ដែលជាក្រុមហ៊ុនបច្ចេកវិទ្យាទូទាត់សាច់ប្រាក់តាមប្រព័ន្ធឌីជីថល បានឱ្យដឹងថា ចំនួនប្រតិបត្តិការនៃការទូទាត់តាមបច្ចេកវិទ្យាមិនចាំបាច់ប៉ះពាល់ផ្ទាល់ (Contactless) និងប្រតិបត្តិការដោយប្រើប្រាស់ Visa Card នៅកម្ពុជាបានកើនឡើងជាង ៧១ ភាគរយក្នុងអំឡុងពេលការរីករាលដាលជំងឺកូវីដ ១៩។
ការលើកឡើងនេះត្រូវបានធ្វើឡើងក្នុងសន្និសីទសារព័ត៌មានស្តីពីការសិក្សាអំពីឥរិយាបថទូទាត់ប្រាក់របស់អ្នកប្រើ Visa Card តាមប្រព័ន្ធអនឡាញកាលពីថ្ងៃទី ៣១ ខែឧសភា។
អ្នកស្រី ជុំ ម៉ូនីកា នាយិកាគ្រប់គ្រងក្រុមហ៊ុន Visa ប្រចាំប្រទេសកម្ពុជា បានថ្លែងក្នុងសន្និសីទសារព័ត៌មានថា អតិថិជនកម្ពុជាកាន់តែច្រើនកំពុងតែទទួលយកការទូទាត់តាមរយៈបច្ចេកវិទ្យាឌីជីថល (២០២០-២០២១) មានការកើនរហូតដល់ជាង ៧១ ភាគរយដែលនេះបង្ហាញការរីកលូតលាស់ក្នុងវិស័យនេះយ៉ាងខ្លាំង។
អ្នកស្រីអះអាងថា៖ «នេះមានន័យថា Visa Card របស់យើងប្រើប្រាស់ទិញទំនិញនៅតាមហាងទំនិញត្រូវបានប្រើប្រាស់យ៉ាងទូលំទូលាយ»។
របាយការណ៍ចុងក្រោយធនាគារជាតិនៃកម្ពុជាឱ្យដឹងថា បច្ចុប្បន្នមានប្រជាជនខ្មែរច្រើនជាង ៥៩ ភាគរយបានធ្វើប្រតិបត្តិការទូទាត់តាមរយៈប្រព័ន្ធអនឡាញ ដែលនេះឆ្លុះបញ្ចាំងអំពីការលើកកម្ពស់សេវាទូទាត់ឌីជីថលស្របទៅនឹងកិច្ចការងារលើកកម្ពស់បរិយាប័ន្នហិរញ្ញវត្ថុនៅកម្ពុជា។
អគ្គនាយិកាបច្ចេកទេសធនាគារជាតិនៃកម្ពុជា លោកស្រី ជាសិរី បានលើកឡើងថា ក្នុងនាមអាជ្ញាធរត្រួតពិនិត្យវិស័យធនាគារ និងហិរញ្ញវត្ថុនៅកម្ពុជា ការធ្វើកិច្ចសហការជាមួយគ្រឹះស្ថានធនាគារ និងហិរញ្ញវត្ថុ គឺជាផ្នែកមួយដ៏មានសារៈសំខាន់នៃការខិតខំប្រឹងប្រែងរួមគ្នារបស់ប្រទេសកម្ពុជា ដើម្បីប្រយុទ្ធប្រឆាំងនឹងរោគរាតត្បាតកូវីដ ១៩។
លោកស្រីថ្លែងថា៖ «នេះជាមូលហេតុដែលយើងកំពុងលើកទឹកចិត្តប្រជាជនខ្មែរទាំងអស់ឱ្យប្រើកាបូបអេឡិចត្រូនិក (E-Wallet) និងកម្មវិធីទូទាត់ដូចជា កម្មវិធីបាគងជំនួសឱ្យការទូទាត់ជាក្រដាសប្រាក់ ដើម្បីចូលរួមកាត់បន្ថយការប៉ះពាល់ និងហានិភ័យនៃការរាតត្បាតជំងឺផ្សេងៗ»។
ក្នុងសនិ្នសីទសារព័ត៌មាននេះ Visa ក៏បានបង្ហាញពីលទ្ធផលស្ទង់មតិមួយស្តីពីការសិក្សាអំពីឥរិយាបថទូទាត់ប្រាក់របស់អ្នកប្រើ Visa Card ដែលបានស្ទង់មតិលើមនុស្សចំនួនជាង ៧ ៥០០ នាក់នៅតាមបណ្តាប្រទេសក្នុងតំបន់អាស៊ាន រួមទាំងកម្ពុជា។
អ្នកស្រី ម៉ូនីកា លើកឡើងថា ចាប់តាំងពីមានការផ្ទុះជំងឺកូវី ១៩ អ្នកប្រើប្រាស់បានផ្លាស់ប្តូរទម្លាប់នៃការទិញ និងការជ្រើសរើសវិធីទូទាត់ប្រាក់របស់ពួកគេតាមប្រព័ន្ធឌីជីថលកើនឡើងគួរឱ្យកត់សម្គាល់។ ជាក់ស្តែងស្ថិតិដែលបានមកពីការស្ទង់មតិរបស់ក្រុមហ៊ុន Visa បង្ហាញថា អ្នកប្រើប្រាស់ប្រមាណ ៤៤ ភាគរយ បានកាត់បន្ថយកាន់សាច់ប្រាក់សុទ្ធជាប់ខ្លួន បើធៀបនឹងមុនពេលមានជំងឺកូវីដ ១៩។
អ្នកស្រីបន្ថែមថា៖ «សុវត្ថិភាព និងបរិយាប័ន្នហិរញ្ញវត្ថុ គឺជាហេតុផលចម្បងសម្រាប់ការប្រើប្រាស់ការទូទាត់តាមឌីជីថល»។
ស្ថិតិនេះបង្ហាញទៀតថា អ្នកស្ទង់មតិចំនួន ៣៤ ភាគរយបានឆ្លើយថានឹងជួយកាត់បន្ថយការចម្លងមេរោគ និង ៣២ ភាគរយនឹងជួយលើកកម្ពស់បរិយាប័ន្នហិរញ្ញវត្ថុ និងផ្តល់អត្ថប្រយោជន៍ផ្សេងៗជាច្រើនទៀត។
ជាមួយគ្នានេះ រោគរាតត្បាតបានបណ្តាលឱ្យមានការកើនឡើង ៣១ ភាគនៃការប្រើប្រាស់កាតដែលបំពាក់បច្ចេកវិទ្យា Contactless ដោយការទូទាត់តាមកាបូបប្រាក់ឌីជីថលមានចំនួន ១៧ ភាគរយ និងការទូទាត់តាមកាតមានចំនួន ២៩ ភាគរយ។ នេះបើតាមការស្ទង់មតិ៕ LA
