.jpg)
កុមារម្នាក់កំពុងជិះកង់កាត់ពីមុខហាង 7-Eleven នៅប្រទេសជប៉ុន។ រូបថត AFP
ភ្នំពេញៈ ក្រុមហ៊ុន CP ALL Plc ដែលជាប្រតិបត្តិករហាងទំនិញលក់រាយធំជាងគេនៅប្រទេសថៃបានឱ្យដឹងថា ខ្លួននឹងបើកដំណើរការផ្សារ 7-Eleven នៅទីក្រុងភ្នំពេញក្នុងពេលឆាប់ៗ។ នេះបើតាមលោក អ៊ូក សោភ័ណ្ឌ ឯកអគ្គរាជទូតកម្ពុជាប្រចាំនៅប្រទេសថៃ។
លោក អ៊ូក សោភ័ណ្ឌ បានប្រាប់ភ្នំពេញប៉ុស្តិ៍នៅថ្ងៃទី ១ ខែមិថុនា ថា បើតាមបុគ្គលិករបស់ក្រុមហ៊ុន CP ALL នៅប្រទេសថៃឱ្យដឹងថា ក្រុមហ៊ុន CP ALL Cambodia គ្រោងនឹងបើកសាខាហាងលក់ទំនិញរាយឱ្យបានយ៉ាងតិច ៦ ទីតាំងនៅកម្ពុជាក្នុងឆ្នាំ ២០២១ នេះ ដោយសាខាដំបូងមានទីតាំងនៅស្ថានីយចាក់ប្រេងឥន្ធនៈ PTT ខណ្ឌព្រែកព្នៅ។ ទីតាំងនេះគ្រោងនឹងបើកនៅពាក់កណ្តាលខែមិថុនានេះ ចំណែកសាខាទី ២ ស្ថិតនៅក្នុងបុរីប៉េងហួត សង្កាត់ព្រែកលៀប តាមបណ្តាយផ្លូវជាតិលេខ ៦ គ្រោងនឹងបើកក្នុងខែសីហា ឆ្នាំ ២០២១។
លោកលើកឡើងថា ការវិនិយោគរបស់ក្រុមហ៊ុន CP ALL ថៃ នៅកម្ពុជា គឺជារឿងល្អ ដោយសារទី១ វាបានដើរស្របនឹងយុទ្ធសាស្ត្រការទូតសេដ្ឋកិច្ចកម្ពុជា ដែលបានផ្តួចផ្តើម និងដាក់ឱ្យអនុវត្តដោយលោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងមានការគាំទ្រពីលោកនាយករដ្ឋមន្ត្រី ហ៊ុន សែន ទី២ ក្រុមហ៊ុននេះនឹងជួយផ្តល់ការងារជូនប្រជាពលរដ្ឋខ្មែរដែលបាត់បង់ការងារដោយសារជំងឺកូវីដ ១៩ និងទី៣ ក្រុមហ៊ុននឹងទទួលយកផលិតផលខ្មែរមួយចំនួនពីសហគ្រាសធុនតូច និងមធ្យមនៅកម្ពុជាយ៉ាងតិច ៥០ ភាគរយដើម្បីដាក់លក់ប្រដំប្រសងជាមួយផលិតផលថៃ ដូចដែលក្រុមហ៊ុនធ្លាប់បានសន្យាជាមួយនឹងរូបលោក និងលោកអនុព័ន្ធពាណិជ្ជកម្មនាពេលកន្លងមក។
លោកថ្លែងថា៖ «បើសិនផលិតផលខ្មែរមានគុណភាពស្តង់ដា និងតម្រូវការខ្ពស់ ក្រុមហ៊ុននឹងពិចារណានាំមកលក់នៅតាមសាខា 7-Eleven ទូទាំងប្រទេសថៃ ដែលមានជាង ១២ ០០០ ហាងថែមទៀត។ ដូច្នេះនេះជាឱកាសសម្រាប់ SMEs កម្ពុជាក្នុងការចាប់ដៃគូសហការជាមួយក្រុមហ៊ុន CP ALL ដែលមានបណ្តាញហាងលក់ទំនិញធំបំផុតលើពិភពលោក»។
លោក សោភ័ណ្ឌ បានបញ្ជាក់ថា នៅប្រទេសថៃ មជ្ឈមណ្ឌលក្រុមប្រឹក្សាធុរកិច្ចកម្ពុជា (CBC) ដែលទើបបង្កើតឡើង ដើម្បីបម្រើជាកន្លែងជំរុញផ្សព្វផ្សាយសកម្មភាពសេដ្ឋកិច្ច និងពាណិជ្ជកម្មទ្វេភាគីកម្ពុជា-ថៃ ព្រមទាំងផ្លាស់ប្តូរព័ត៌មាន និងចំណេះដឹងផ្សេងៗរវាងសមាជិករាប់តាំងពីការធ្វើអាជីវកម្ម ការលើកកម្ពស់គុណភាពទំនិញ ឬសេវាកម្ម ការជំរុញផលិតកម្ម និងផ្គត់ផ្គង់ទីផ្សារក្នុងប្រទេសថៃ និងកម្ពុជាព្រមទាំងការសម្របសម្រួល និងចរចាជាមួយស្ថាប័នរដ្ឋនៅក្នុងប្រទេសទាំង ២ ដើម្បីដោះស្រាយបញ្ហាប្រឈមផ្សេងៗរបស់វិស័យឯកជនដែលជាសមាជិកថែមទៀត។
ក្រុមហ៊ុន CP ALL បានជូនដំណឹងថា ក្រុមហ៊ុនបានពង្រីកកិច្ចព្រមព្រៀង Master Agreement នៃផ្សារម៉ាត 7-Eleven នៅស្ថានីយប្រេងឥន្ធនៈរបស់ក្រុមហ៊ុន PTT Oil and Retail Business Public Company Li-mited ក្នុងរយៈពេល ១០ ឆ្នាំបន្តទៀត បន្ទាប់ពីកិច្ចសន្យាចាស់។ នេះបើតាមសេចក្តីជូនដំណឹងផ្ញើទៅប្រធានផ្សារហ៊ុនថៃកាលពីថ្ងៃទី ២៥ ខែឧសភា។
បច្ចុប្បន្នក្រុមហ៊ុននេះកំពុងដំណើរការហាង 7-Eleven សរុប ១២ ២២៥ នៅប្រទេសថៃ។ ក្រុមហ៊ុននេះបានឱ្យដឹងថា ខ្លួនបានវិនិយោគប្រាក់ចន្លោះពី ១១,៥ ពាន់លានបាតទៅ ១២ ពាន់លានបាត នៅឆ្នាំ ២០២០ ដើម្បីបើកដំណើរការហាងថ្មី ជួសជុលកែលម្អហាងដែលមានស្រាប់ និងបើកដំណើរការគម្រោងថ្មីៗ៕ LA
