ភ្នំពេញៈ ធនាគារជាតិនៃកម្ពុជា (NBC) បានឱ្យដឹងនៅក្នុងការត្រួតពិនិត្យស្ថិរភាពហិរញ្ញវត្ថុឆ្នាំ ២០២០ (FSR 2020) ថា ដោយសារតែស្ថានការជំងឺកូវីដ ១៩ និងភាពតានតឹងពាណិជ្ជកម្មអន្តរជាតិបន្តរយៈពេលយូរ ចក្ខុវិស័យកំណើនរបស់កម្ពុជានៅតែមិនច្បាស់លាស់។
ក្នុងនាមជាប្រទេសតូចមួយដែលពឹងផ្អែកលើទីផ្សារខាងក្រៅ កំណើនសេដ្ឋកិច្ចរបស់ប្រទេសកម្ពុជា ក្នុងឆ្នាំ ២០២១ នឹងពឹងផ្អែកលើការស្ទុះងើបឡើងវិញរបស់ប្រទេសផ្សេងៗទៀតលើពិភពលោក ការវិវត្តស្ថានការណ៍ជំងឺកូវីដ ១៩ និងភាពតានតឹងពាណិជ្ជកម្មអន្តរជាតិ ជាពិសេសរវាងអាមេរិក និងចិន។
ទោះយ៉ាងណា NBC បានឱ្យដឹងថា ភាពតានតឹងនេះអាចជំរុញឱ្យក្រុមហ៊ុនអន្តរជាតិធ្វើពិពិធកម្មការផលិតរបស់ពួកគេនៅក្នុងបណ្ដាប្រទេសជាច្រើនទៀត និងតំបន់អាស៊ាន ដែលរួមទាំងទីផ្សារកម្ពុជាអាចជាកន្លែងដ៏មានសក្ដានុពលមួយសម្រាប់ក្រុមហ៊ុនទាំងនោះដែលបង្វែរការវិនិយោគ។
FSR 2020 ដែលចេញផ្សាយកាលពីថ្ងៃទី ៣១ ខែឧសភា បញ្ជាក់ថា៖ «ទោះបីសកម្មភាពសេដ្ឋកិច្ចក្នុងស្រុកកំពុងស្ថិតក្នុងហានិភ័យ ដោយសារតែការរីករាលដាលជំងឺកូវីដ ១៩ ក្នុងសហគមន៍ ការចាក់វ៉ាក់សាំងនឹងជួយសម្រាលស្ថានការណ៍នេះ»។
បន្ទាប់ពីព្រឹត្តិការណ៍ថ្ងៃទី ៣ និងទី ២៨ ខែ វិច្ឆិកា ឆ្នាំ ២០២០ កម្ពុជាបានទទួលរងផលប៉ះពាល់ ដោយសារតែការផ្ទុះឡើងក្នុងសហគមន៍ជាថ្មីទៀតកាលពីថ្ងៃទី ២០ ខែកុម្ភៈ ឆ្នាំ ២០២១។ លើសពីនេះ ជំងឺកូវីដ ១៩ ជាពិសេសជាមួយនឹងវីរុសប្រភេទថ្មី នៅតែជាការគំរាមកំហែងដ៏ធំមួយដល់សកម្មភាពសង្គម និងសេដ្ឋកិច្ចនៅក្នុងប្រទេសកម្ពុជា។ នេះបើតាម FSR 2020។
FSR 2020ត្រូវបានដកស្រង់សម្តីថា ដើម្បីកាត់បន្ថយផលប៉ះពាល់ដោយសារតែជំងឺកូវីដ ១៩ លើក្រុមហ៊ុន និងកម្មករនៅក្នុងប្រទេសកម្ពុជា រដ្ឋាភិបាលបានដាក់ឱ្យប្រើប្រាស់វិធានការសារពើពន្ធជុំទី ៨ ដែលរួមមានការលើកលែងពន្ធ ការផ្ទេរសាច់ប្រាក់ ការឧបត្ថម្ភធនប្រាក់ឈ្នួល ផែនការហិរញ្ញវត្ថុ ផែនការធានាឥណទាន ជាដើម។
FSR 2020 បន្ត៖ «ជំងឺកូវីដ ១៩ ដែលអូសបន្លាយពេលវេលាកាន់តែយូរ អាចដាក់សម្ពាធលើថវិការដ្ឋាភិបាលនៅក្នុងកាលបរិច្ឆេទលើកក្រោយ។ ការកើនឡើងខ្លាំងលើបំណុលឯកជនត្រូវបានអង្កេតឃើញក្នុងរយៈពេលជាច្រើនឆ្នាំថ្មីៗនេះ ដូចបានបង្ហាញដោយអនុបាតឥណទានធៀបនឹងផលិតផលក្នុងស្រុកសរុប (GDP) ស្ថានការណ៍ជំងឺកូវីដ ១៩ ដែលអូសបន្លាយពេលកាន់តែយូរអាចបណ្ដាលឱ្យគ្រួសារ និងក្រុមហ៊ុនមួយចំនួនធ្លាក់ចូលទៅក្នុងស្ថានការណ៍បំណុលវ័ណ្ឌក និងអាចបង្កើនអនុបាតកម្ចីសងត្រឡប់មិនទាន់ពេល (NPL) និងការរៀបចំឥណទានឡើងវិញ។ ទោះយ៉ាងណា លទ្ធភាពទទួលបានវ៉ាក់សាំងនៅពេលថ្មីៗនេះ នឹងជួយកាត់បន្ថយហានិភ័យដែលបានលើកឡើងទាំងនេះ»។
លោក Anthony Galliano អគ្គនាយកក្រុមហ៊ុនសេវាហិរញ្ញវត្ថុ Cambodia Investment Management Co Ltd បានប្រាប់ភ្នំពេញប៉ុស្ដិ៍កាលពីដើមខែឧសភាថា ដោយសារតែការកើនឡើងខ្លាំងអ្នកឆ្លងជំងឺប្រចាំថ្ងៃ ជាមួយនឹងការធ្វើតេស្ដនៅមានកម្រិត ការបិទខ្ទប់កន្លងមកគឺចាំបាច់ ដើម្បីទប់ស្កាត់ការរីករាលដាល ដែលឈានដល់កម្រិតរំខានដល់សេដ្ឋកិច្ច។
លោកថ្លែងថា៖ «ការណ៍នេះ [បិទខ្ទប់កន្លងមក] គឺជាយុទ្ធសាស្ដ្រនៃការធ្វើឱ្យមានតុល្យភាព រក្សាដង្ហើមរស់សេដ្ឋកិច្ច ខណៈទប់ស្កាត់ការរីករាលដាល និងជម្រើសដែលអាចមានចំពោះរដ្ឋាភិបាលនៅពេលនេះ ដោយសារតែការឆ្លងជំងឺកាន់តែខ្លាំងឡើង»។
យោងតាមការស្ទង់មតិទំនុកចិត្តអាជីវកម្មចុងក្រោយបំផុតឆ្នាំ ២០២១ របស់សភាពាណិជ្ជកម្មអឺរ៉ុបប្រចាំនៅកម្ពុជា (EuroCham) សន្ទស្សន៍ទំនុកចិត្តអាជីវកម្មឆ្នាំ ២០២១ របស់កម្ពុជាធ្លាក់ចុះមកនៅត្រឹម ៤៦,១ ភាគរយធៀបនឹង ៥២,៩ ភាគរយកាលពីឆ្នាំ ២០១៩។ ទោះយ៉ាងណា ក្រុមហ៊ុនជាច្រើនមានសុទិដ្ឋិនិយមអំពីការស្ទុះងើបឡើងវិញនៅពេលអនាគត ខណៈ ៥៦ ភាគរយ គ្រោងនឹងវិនិយោគបន្ថែមទៀតនៅក្នុងប្រទេសកម្ពុជាក្នុងរយៈពេល ១២ ខែក្រោយ។
ខ្លឹមសារដែលបានលើកឡើងក្នុងរបាយការណ៍ FSR 2020 របស់ ធនាគារជាតិនៃកម្ពុជាបានអះអាងថា កំណើនរបស់ប្រទេសកម្ពុជាក្នុងឆ្នាំ ២០២១ ត្រូវបានព្យាករថា នឹងស្មើ ៤ ភាគរយ ហើយកំណើននេះត្រូវបានគាំទ្រដោយការកើនឡើងដែលរំពឹងទុកនៃលក្ខខណ្ឌខាងក្រៅ និងការធ្វើពិពិធកម្មលើការនាំចេញ។
របាយការណ៍ FSR 2020 បានឱ្យដឹងថា ទិសដៅទីផ្សារនាំចេញឈានមុខគេរបស់កម្ពុជា ដូចជាអាមេរិក អឺរ៉ុប ជប៉ុន ត្រូវបានរំពឹងថា នឹងស្ទុះងើបឡើងវិញបណ្ដើរៗ ដោយសារតែលទ្ធផលនៃកម្មវិធីចាក់វ៉ាក់សាំង និងគោលនយោបាយគាំទ្របន្ថែមនៅតាមបណ្តាប្រទេសទាំងនោះ៕ LA