ទិន្នន័យអត្រាអ្នកមានការងារធ្វើ (ក្រៅពីវិស័យកសិកម្ម) ឬ Non-Farm Payrolls របស់សហរដ្ឋអាមេរិកនឹងត្រូវចេញផ្សាយនៅថ្ងៃសុក្រនេះ។ តើនឹងមានអ្វីកើតឡើងចំពោះគោលនយោបាយរបស់ធនាគារកណ្តាលសហរដ្ឋអាមេរិក ប្រសិនបើទិន្នន័យស្ថិតិការងារចេញមកល្អ? ចុះបើទិន្នន័យមិនល្អវិញ?
ដោយសារការបន្ដរីករាលដាលនៃជំងឺកូវីដ ១៩ ធនាគារកណ្តាលនៅក្នុងប្រទេសជាច្រើនបានអនុវត្តវិធានការចាក់បញ្ចូលសាច់ប្រាក់ទៅក្នុងទីផ្សារ ដោយប្រមូលទិញមូលបត្របំណុលរដ្ឋាភិបាល និងមូលបត្រដែលមានទ្រព្យបញ្ចាំក្នុងចំនួនដ៏ច្រើន ដើម្បីជំរុញកំណើនសេដ្ឋកិច្ច។ គោលនយោបាយខាងលើនេះកើតឡើងបន្ទាប់ពីអត្រាការប្រាក់ត្រូវបានកាត់បន្ថយជិតដល់សូន្យ (ដើម្បីងាយស្រួលក្នុងការប្រមូលមូលនិធិ ពង្រីកផលិតកម្ម និងពង្រឹងប្រតិបត្តិការអាជីវកម្ម) ហើយមិនអាចកាត់បន្ថយបានទៀត។
សប្តាហ៍នេះ ទីផ្សារកំពុងផ្តោតលើការចេញ ផ្សាយទិន្នន័យ Non-Farm Payrolls ហើយលទ្ធផលនេះនឹងជះឥទ្ធិពលដល់ការប្រែប្រួលទីផ្សារហិរញ្ញវត្ថុ និងការសម្រេចចិត្តរបស់ធនាគារកណ្តាលសហរដ្ឋអាមេរិកលើវិធានការចាក់បញ្ចូលសាច់ប្រាក់ទៅក្នុងទីផ្សារ។
ការចេញផ្សាយទិន្នន័យ Non-Farm Payrolls កាលពីខែមុនបានធ្វើឱ្យតម្លៃប្រាក់ដុល្លារធ្លាក់ចុះ ដោយសារលទ្ធផលអវិជ្ជមានមិនគួរឱ្យជឿនៃទិន្នន័យនេះ។ ប្រសិនបើស្ថិតិការងារសម្រាប់ខែឧសភាមិនមានភាពល្អប្រសើរទេ ធនាគារកណ្តាលនឹងទំនងជាប្រកាន់ខ្ជាប់នូវវិធានការបច្ចុប្បន្នរបស់ខ្លួន។
ផ្ទុយទៅវិញ ប្រសិនបើសូចនាករសេដ្ឋកិច្ច ឬស្ថិតិការងារចេញមកមានតួលេខល្អនៅថ្ងៃសុក្រនេះ ធនាគារកណ្តាលសហរដ្ឋអាមេរិកនឹងកាត់បន្ថយការទិញទ្រព្យសកម្មហិរញ្ញវត្ថុ (មូលបត្របំណុលរដ្ឋាភិបាល និងមូលបត្រដែលមានទ្រព្យបញ្ចាំ) ពីគោលនយោបាយចាក់បញ្ចូលសាច់ប្រាក់ទៅក្នុងទីផ្សារ ដែលវិធានការនេះត្រូវបានហៅថា Tapering។
ខណៈដែល Tapering នឹងត្រូវបានអនុវត្តលឿនជាងមុន វានឹងបង្កឱ្យមានការឡើងថ្លៃនៃប្រាក់ដុល្លារអាមេរិកហើយផលិតផលដូចជា មាស រូបិយប័ណ្ណ និងទំនិញកសិកម្មនឹងត្រូវបានលក់ចេញ។
ដូច្នេះសូមយកចិត្តទុកដាក់ចំពោះការចេញផ្សាយទិន្នន័យ Non-Farm Payrolls នៅថ្ងៃសុក្រនេះ ហើយមើលថា តើវានឹងនាំទៅរក Tapering ដែរឬទេ។ ទន្ទឹមនឹងនេះ វិនិយោគិនត្រូវប្រុងប្រយ័ត្នចំពោះការធ្លាក់ចុះនៃប្រាក់អឺរ៉ូ ប្រាក់យ៉េនជប៉ុន និងតម្លៃមាស៕