ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) ឱ្យដឹងថារដ្ឋាភិបាលសហព័ន្ធស្វីសបានសន្យាផ្តល់ហិរញ្ញប្បទានឥតសំណង ១៤៨ លានដុល្លារ ដើម្បីចូលរួមចំណែកអភិវឌ្ឍន៍ប្រទេសកម្ពុជាក្នុងរយៈពេល ៤ ឆ្នាំបន្ទាប់។ នេះបើតាមសេចក្តីប្រកាសព័ត៌មានរបស់ CDC។
ការសន្យានេះត្រូវបានលើកឡើងនៅក្នុងកិច្ចប្រជុំរវាងភាគីកម្ពុជា និងភាគីស្វីសលើសេចក្តីព្រាងកម្មវិធីសហប្រតិបត្តិការស្វីសសម្រាប់តំបន់មេគង្គឆ្នាំ ២០២២-២០២៥ កាលពីថ្ងៃទី ៣ មិថុនា តាមវីដេអូខនហ្វ្រិន។
ភាគីកម្ពុជាដឹកនាំដោយ លោក ឈៀន យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការគណៈកម្មាធិការនីតិសម្បទា និងក្រុមប្រឹក្សាអភិវឌ្ឍន៍កម្ពុជា និងមន្ត្រីជំនាញពីក្រសួង ស្ថាប័នចំនួន ២០ នាក់។
រីឯ ភាគីស្វីសដឹកនាំដោយលោក ម៉ាកឈឹស ប៊ឺលី (Markus Buerli) នាយកទីភ្នាក់ងារស្វីសសម្រាប់កិច្ចអភិវឌ្ឍន៍ និងសហប្រតិបត្តិការ (SDC) ប្រចាំនៅកម្ពុជា និងមន្ត្រីជំនាញនៃទីភ្នាក់ងារ SDC ប្រមាណ ៦០ នាក់។
សេចក្តីប្រកាសព័ត៌មានឱ្យដឹងថា តាមរយៈកម្មវិធីសហប្រតិបត្តិការស្វីសសម្រាប់តំបន់មេគង្គឆ្នាំ ២០២២-២០២៥ ភាគីស្វីសនឹងផ្តល់ហិរញ្ញប្បទានឥតសំណងសរុប ១៣៣ លានហ្វ្រង់ស្វីល (១៤៨ លានដុល្លារ) ដែលជំនួយនេះបែងចែកជា ២ កម្រិតគឺកម្រិតប្រទេស (កម្ពុជា និងឡាវ) និងកម្រិតតំបន់។
សេចក្តីប្រកាសព័ត៌មានបន្តថា ក្នុងនោះ ស្វីសនឹងផ្តល់ហិរញ្ញប្បទានឥតសំណងសរុប ៥២ លានដុល្លារសម្រាប់រយៈពេល ៤ ឆ្នាំ (២០២២-២០២៥) ឬប្រមាណ ១៣ លានដុល្លារក្នុង ១ ឆ្នាំ ដើម្បីគាំទ្រការអនុវត្តកម្មវិធីសហប្រតិបត្តិការថ្មីនេះនៅកម្ពុជា។
យោងតាមប្រព័ន្ធទិន្នន័យហិរញ្ញប្បទានសហប្រតិបត្តិការកម្ពុជាចន្លោះពីឆ្នាំ ២០០០-២០២០ ស្វីសបានផ្តល់ហិរញ្ញប្បទានឥតសំណងដល់កម្ពុជាសរុប ១៤២ លានដុល្លារ ដើម្បីគាំទ្រការអនុវត្តគម្រោងអភិវឌ្ឍន៍នានានៅកម្ពុជា។ នេះបើតាម CDC៕