ភ្នំពេញៈ អង្គការទស្សនៈពិភពលោកនៃគម្រោងអភិវឌ្ឍន៍វារីវប្បកម្មសម្រាប់និរន្តរភាពពាណិជ្ជកម្មនៅកម្ពុជា (CAST) សហការជាមួយក្រុមហ៊ុនធានារ៉ាប់រង Forte Insurance និងមូលនិធិ Syngenta បានចុះកិច្ចព្រមព្រៀងអនុវត្តគម្រោងស្តីពីការសិក្សាលទ្ធភាពដែលអាចអនុវត្តបានលើការធានារ៉ាប់រងវារីវប្បកម្មទឹកសាបនៅប្រទេសកម្ពុជា។
សេចក្តីប្រកាសព័ត៌មានបានឱ្យដឹងថា កិច្ចព្រមព្រៀងនេះត្រូវបានធ្វើឡើងក្នុងគោលបំណងរួមគ្នាជាលើកដំបូង ដើម្បីសិក្សាលម្អិតអំពីលទ្ធភាពដែលអាចអនុវត្តបានលើការធានារ៉ាប់រងវារីវប្បកម្មទឹកសាបនៅកម្ពុជា។
ការសិក្សាពីលទ្ធភាពនេះនឹងពិនិត្យមើលលើបញ្ហាប្រឈមផ្នែកផលិតកម្ម និងការគ្រប់គ្រងហានិភ័យរបស់ប្រជាកសិករនាពេលនេះ។ របកគំហើញដែលទទួលបាននឹងជួយឱ្យមានការបង្កើតផលិតផលធានារ៉ាប់រងដែលមានលក្ខណៈសមស្រប។
លោក យក់ ចំរើនឫទ្ធិ ប្រធានអគ្គនាយកក្រុមហ៊ុន Forte Insurance ប្រាប់ ភ្នំពេញ ប៉ុស្តិ៍ថា នេះជាការសាកល្បងលើកទី១ លើលទ្ធភាពផ្តល់សេវាលើវិស័យកសិកម្ម។ លោកថ្លែងថា៖ «វិស័យធានារ៉ាប់រងយើងមិនមែនផ្តោតតែលើផ្នែកសេវាកម្ម ឬឧស្សាហកម្មនោះទេ វិស័យកសិកម្មក៏ជាផ្នែកមួយនៃសេវាកម្មធានារ៉ាប់រងផងដែរ»។
លោកបន្តថា៖ «យើងឃើញថា ការប្រែប្រួលអាកាសធាតុធ្វើឱ្យពិភពលោកមានការផ្លាស់ប្តូរជាច្រើន ហើយការចិញ្ចឹមត្រី និងដាំបន្លែតាមបែបធម្មជាតិបានរងផលប៉ះពាល់ច្រើន អ៊ីចឹងបានជាយើងសិក្សាពីលទ្ធភាពថា តើយើងអាចជួយដល់វិស័យកសិកម្មដោយផ្តល់សេវាធានារ៉ាបរងទៅលើការផ្ទេរហានិភ័យរបស់កសិករមកក្រុមហ៊ុនធានារ៉ាប់រងបានយ៉ាងដូចម្តេច?»។
គម្រោងនេះនឹងអនុវត្តចាប់ពីថ្ងៃចុះហត្ថលេខា រហូតដល់ខែតុលា ឆ្នាំ ២០២២។ សព្វថ្ងៃវារីវប្បកម្មកម្ពុជាបានផ្តល់ការងារប្រមាណ ៦ លាននាក់ ដែលភាគច្រើនជាប្រជាកសិករខ្នាតតូច។ វិស័យនេះបានចូលរួមចំណែក ២,៤ ភាគរយនៃ GDP របស់ជាតិ។ នេះបើតាមទិន្នន័យរដ្ឋបាលជលផលឆ្នាំ ២០១៨។
របាយការណ៍របស់សមាគមធានារ៉ាប់រងកម្ពុជាបង្ហាញថា វិស័យធានារ៉ាប់រងនៅកម្ពុជាទទួលបានបុព្វលាភ (ប្រាក់ចំណូលពីការលក់ធានារ៉ាប់រង) សរុប ២៧១,៥ លានដុល្លារក្នុងឆ្នាំ ២០២០ កើនឡើង ៧,៣១ ភាគរយពីចំនួន ២៥៣ លានដុល្លារ ក្នុងឆ្នាំ ២០១៩។
ក្នុងនោះ បុព្វលាភទីផ្សារធានារ៉ាប់រងទូទៅបានគ្របដណ្តប់ចំណែកទីផ្សារចំនួន ៤១,៩ ភាគរយ ទីផ្សារធានារ៉ាប់រងអាយុជីវិត ៥៦,១ ភាគរយ និងទីផ្សារធានារ៉ាប់រងខ្នាតតូចមានចំនួន ២ ភាគរយ៕ LA