ភ្នំពេញៈ សមាគមធនាគារនៅកម្ពុជាសមាគមមីក្រូហិរញ្ញវត្ថុកម្ពុជា និង សមាគមធានារ៉ាប់រងកម្ពុជាកាលពីថ្ងៃទី ៣ មិថុនា បានរៀបចំសិក្ខាសាលារួមគ្នាលើកទី ១ ស្តីពីមុខងារប៊េងកាសួរេន (Bancassurance) នៅកម្ពុជាដើម្បីលើកកម្ពស់ចំណេះដឹងផ្នែកទីផ្សារធានារ៉ាប់រងដល់សាធារណជន។
សិក្ខាសាលានេះត្រូវបានគាំទ្រពីនិយ័តករធានារ៉ាប់រងកម្ពុជានៃអាជ្ញាធរសេវាហិរញ្ញវត្ថុមិនមែនធនាគារ និង ហិរញ្ញវត្ថុ និង ធនាគារជាតិនៃកម្ពុជាដែលប្រព្រឹត្តទៅតាមប្រព័ន្ធអនឡានជាមួយនឹងអ្នកចូលរួមប្រមាណ ២០០ នាក់ ។ នេះបើតាមសេចក្តីប្រកាសព័ត៌មានរួម។
លោក អ៊ិន ចាន់នី ប្រធានសមាគមធនាគារនៅកម្ពុជាបានលើកឡើងថានេះជាការសហការរួមគ្នា ដើម្បីផ្សព្វផ្សាយឱ្យបានទូលំទូលាយនូវមុខងារប៊េងកាសួរេនក្នុងការកសាងទំនុកចិត្តពីសាធារណជន។
លោក ចាន់នី ឱ្យដឹងថា៖ «សិក្ខាសាលានេះធ្វើឡើងស្របតាមប្រកាស និងក្របខ័ណ្ឌបទប្បញ្ញត្តិរបស់ធនាគារជាតិនៃកម្ពុជាសម្រាប់គ្រឹះស្ថានហិរញ្ញវត្ថុធ្វើអាជីវកម្មប៊េងកាសួរេនក្នុងគោលបំណង លើកកម្ពស់បរិយាបន្ន ហិរញ្ញវត្ថុ តាមរយៈការបង្កើនលទ្ធភាពឱ្យសាធារណជនទទួលបានសេវាធានារ៉ាប់រង និងពង្រឹងកិច្ចការពារអតិថិជន »។
សិក្ខាសាលានេះនឹងដើរតួនាទីយ៉ាងសំខាន់ស្របតាមយុទ្ធសាស្ត្រជាតិស្តីពីបរិយាបន្ន ហិរញ្ញវត្ថុ ឆ្នាំ ២០១៩ -២០២៥ ដើម្បីផ្សាភ្ជាប់ទំនាក់ទំនងឱ្យកាន់តែជិតស្និទ្ធរវាងភាគីពាក់ព័ន្ធក្នុងវិស័យហិរញ្ញវត្ថុ និងធានារ៉ាប់រងដើម្បីឱ្យប្រតិបត្តិការ ប៊េងកាសួរេន កាន់តែមានការរីកចម្រើនទៅមុខជាលំដាប់។ នេះបើតាមលោក គា បូរាណ ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា។
លោក បូរាណ បានបន្ថែមថា៖ «តាមបទពិសោធន៍របស់គ្រឹះស្ថានកន្លងមកហេតុផលដែលអតិថិជនមួយចំនួនជួបការក្ស័យធន់ ឬបរាជ័យគឺ បញ្ហាសុខភាព គ្រោះថ្នាក់ដោយចៃដន្យ និង គ្រោះធម្មជាតិ ដូចនេះដើម្បីចូលរួមចំណែកពង្រឹងការការពារអតិថិជនបន្ថែមទៀត តាមរយៈផលិតផល និង សេវាកម្ម ធានារ៉ាប់រងពិតជាមានសារៈសំខាន់ណាស់ក្នុងការទប់ស្កាត់ និងកាត់បន្ថយហានិភ័យ »។
ប្រធានសមាគមធានារ៉ាប់រងកម្ពុជាលោក ហ៊ុយ វ៉ាថារ៉ូ បានឱ្យដឹងថាសេវាធានារ៉ាប់រងគឺជាឧបករណ៍គ្រប់គ្រងហានិភ័យសម្រាប់ការពារ សុវត្ថិភាព និងស្ថិរភាពហិរញ្ញវត្ថុរបស់បុគ្គល និង ធុរជននៅក្នុងដំណើរការអភិវឌ្ឍសេដ្ឋកិច្ច ។
លោកនិយាយថា៖ «ការបញ្ចូលសេវា ឬផលិតផលធានារ៉ាប់រងឱ្យដល់ដៃប្រជាពលរដ្ឋនឹងរួមចំណែកយ៉ាងសំខាន់ដល់ការបង្កើនការប្រើប្រាស់សេវាធានារ៉ាប់រងដែលនឹងផ្តល់នូវភាពធនហេតុនេះប្រតិបត្តិករធានារ៉ាប់រងតែងតែរិះរកគ្រប់មធ្យោបាយ ដើម្បីបង្កើតបណ្តាញ ចែកចាយ ផលិតផល ធានារ៉ាប់រងជាច្រើនប្រភេទ និង ធ្វើយ៉ាងណាផ្តល់សេវា ឬផលិតផលប្រកបដោយប្រសិទ្ធភាពដល់ប្រជាពលរដ្ឋក្នុងតម្លៃសមរម្យ»៕