លោក ស៊ុន ចាន់ថុល ទៅពិនិត្យការដ្ឋានសង់រោងចក្រផលិតបេតុងកៅស៊ូ។ ក្រ.សាធារណការ
ភ្នំពេញៈ រដ្ឋាភិបាលកំពុងវិនិយោគទឹកប្រាក់ ១,១ លានដុល្លារ ទៅលើការសាងសង់រោងចក្រផលិតបេតុងកៅស៊ូ (Asphalt Concrete Plant=AC) ១ កន្លែង ដែលមានសមត្ថភាពអាចផលិតបេតុងកៅស៊ូបាន ១២០ តោន ក្នុង ១ ម៉ោង ក្នុងគោលបំណង ដើម្បីរួមចំណែកអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ និងកាត់បន្ថយការនាំចូល។ នេះបើយោងតាមថ្នាក់ដឹកនាំក្រសួងសាធារណការ និងដឹកជញ្ជូន។
ក្នុងឱកាសចុះពិនិត្យការដ្ឋានសាងសង់រោងចក្រផលិតបេតុងកៅស៊ូនៅក្នុងស្រុកកំពង់ត្រាច ខេត្តកំពត កាលពីថ្ងៃទី ៥ ខែមិថុនា កាលពីឆ្នាំ ២០២១ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា ការកសាងផ្លូវថ្នល់នៅកម្ពុជានឹងកាន់តែមានភាពឆាប់រហ័ស និងគុណភាពល្អ ខណៈកម្ពុជាកំពុងសាងសង់រោងចក្រផលិតបេតុងកៅស៊ូ ១ កន្លែងនៅជាប់ព្រំប្រទល់ខេត្តកំពត និងកែប។ រោងចក្រនេះនឹងដើរតួនាទីសំខាន់សម្រាប់ផលិតបេតុងកៅស៊ូ យកទៅប្រើក្រាលផ្លូវ ខណៈបច្ចុប្បន្នកម្ពុជាតែងបញ្ជាទិញពីក្រៅប្រទេស។
លោកបន្តថា ការបញ្ជាទិញបេតុងកៅស៊ូពីក្រៅប្រទេសបានធ្វើឱ្យកម្ពុជាចំណាយប្រាក់ច្រើន ហើយថែមទាំងត្រូវចំណាយពេលដឹកជញ្ជូនផងដែរ។ ភាពលំបាកនេះបានជំរុញឱ្យក្រសួងសាធារណការស្នើសុំឱ្យក្រុមហ៊ុន សៀងហៃ ជួយទិញគ្រឿងចក្រមកដំឡើងរោងចក្រផលិតបេតុងកៅស៊ូនៅក្នុងទីតាំងខាងលើ។
លោកថ្លែងថា៖ «ការមានរោងចក្រផលិតបេតុងកៅស៊ូខ្លួនឯងនឹងជួយឱ្យយើងមិនចាំបាច់ទិញពីគេច្រើនដូចមុន»។ លោកបន្ថែមថា៖ «ជាមួយគ្នានេះយើងក៏អនុញ្ញាតឱ្យវិស័យឯកជនអាចទិញយកបេតុងកៅស៊ូទៅប្រើផងដែរ ដោយក្រសួងនឹងបង្កើតក្រុមការងារស្វយ័តមួយ ដើម្បីគ្រប់គ្រងទីតាំងនេះ និងធ្វើអាជីវកម្មលើកការលក់ AC នេះសម្រាប់យកទៅប្រើប្រាស់ផ្ទាល់ខ្លួន ឬលក្ខណៈឯកជន»។
លោកលើកឡើងទៀតថា ដោយសាររដ្ឋាភិបាលបានកំណត់ផែនការក្នុងការអភិវឌ្ឍផ្លូវថ្នល់ឱ្យមានគុណភាពកាន់តែល្អនោះ ក្រសួងសាធារណការ និងដឹកជញ្ជូនក៏គ្រោងនឹងសាងសង់រោងចក្រផលិតបេតុងកៅស៊ូ ១ បន្ថែមទៀតនៅតំបន់ខេត្តបាត់ដំបងក្នុងពេលឆាប់ៗផងដែរ។
លោកអះអាងថា៖ «ឆ្នាំនេះ ឬឆ្នាំក្រោយ ក្រុមហ៊ុនសៀងហៃនឹងផ្តល់ម៉ាស៊ីនផលិតបេតុងកៅស៊ូ ១ ឈុតទៀតមកកម្ពុជា ដោយយើងអាចនឹងរៀបចំដាក់នៅតំបន់បាត់ដំបង ព្រោះតំបន់នោះមានផ្លូវប្រភេទ DBST ច្រើនដែលត្រូវប្រែក្លាយទៅជាប្រភេទផ្លូវ AC»។
យោងតាម លោក ចាន់ថុល វត្ថុធាតុដើមសំខាន់សម្រាប់ផលិត បេតុងកៅស៊ូ រួមមាន ថ្ម ខ្សាច់ និងកៅស៊ូ។
ប្រធានសមាគមពាណិជ្ជករដឹកជញ្ជូនទំនិញ លោក ជា ចាន់ដារ៉ា បានប្រាប់ភ្នំពេញប៉ុស្តិ៍កាលពីថ្ងៃទី ៦ ខែមិថុនាថា ការបង្កើតរោងចក្រផលិតបេតុងកៅស៊ូ ដោយខ្លួនឯងនឹងផ្តល់ផលយ៉ាងច្រើនសម្រាប់វិស័យដឹកជញ្ជូនទំនិញ ក៏ដូចជាសេដ្ឋកិច្ចជាតិទាំងមូល។ រោងចក្រផលិតបេតុងកៅស៊ូនេះនឹងជំរុញឱ្យការសាងសង់ផ្លូវនៅកម្ពុជាបានកាន់តែលឿន និងអាចឈានទៅការសាងសង់ផ្លូវថ្មីៗជាច្រើនបន្ថែមទៀត។
លោកអះអាងថា៖ «នៅពេលមានផ្លូវល្អកាន់តែច្រើន វានឹងធ្វើឱ្យយើងចំណេញទាំងពេលវេលា និងថវិកាច្រើនផងដែរ ពិសេសបើកម្ពុជាមានផ្លូវកាត់ ឬផ្លូវវាងកាន់តែច្រើន»។
បើយោងតាមការស្ទង់មតិរួមមួយដោយទីភ្នាក់ងារកិច្ចសហប្រតិបត្តិការអន្តរជាតិជប៉ុន (Jica) កាលពីឆ្នាំ ២០១១ របស់រដ្ឋាភិបាលជប៉ុន និងមូលនិធិរូបិយវត្ថុអន្តរជាតិ (IMF) ឱ្យដឹងថា កម្ពុជាត្រូវការជាង ១៣ ពាន់លានដុល្លារសម្រាប់ការអភិវឌ្ឍ និងថែទាំហេដ្ឋារចនាសម្ព័ន្ធរូបវន្តត្រឹមឆ្នាំ ២០២០ ប្រសិនបើប្រទេសនេះមានបំណងបន្តទាក់ទាញការវិនិយោគពីបរទេស៕ LA
