.jpg)
ហ្វូងសត្វកុកកំពុងស្វែងរកចំណីនៅលើវាលស្រែរបស់កសិករក្រោយប្រមូលផលក្នុងខេត្តតាកែវ។ ហេង ជីវ័ន
ភ្នំពេញៈ ប្រទេសកម្ពុជា បានចូលរួមអនុវត្តគម្រោងស្តីពីការកសាងសមត្ថភាពក្នុងការជំរុញផលិតកម្មដំណាំស្រូវដោយបច្ចេកទេសដាំគ្រាប់ផ្ទាល់ប្រកបដោយប្រសិទ្ធភាពគិតគូរដល់និរន្តរភាពសេដ្ឋកិច្ច និងបរិស្ថានដោយរំពឹងថា វានឹងជួយអភិវឌ្ឍវិស័យកសិកម្មនៅកម្ពុជា។
ក្នុងសិក្ខាសាលាដែលរៀបចំដោយអង្គការស្បៀង និងកសិកម្មថ្នាក់តំបន់ប្រចាំនៅអាស៊ី និងប៉ាស៊ីហ្វិកកាលពីថ្ងៃទី ៤ មិថុនា តាមប្រព័ន្ធអនឡាញគម្រោងនេះត្រូវបានប្រកាសដាក់ឱ្យអនុវត្តសម្រាប់ការដាំដុះ។
ក្រៅពីកម្ពុជាដែលជាអង្គភាពអនុវត្តគម្រោង សិក្ខាសាលានេះក៏មានការចូលរួមពីតំណាងអង្គភាពអនុវត្តគម្រោងមកពីប្រទេសមីយ៉ាន់ម៉ា និងហ្វីលីពីន ព្រមទាំងអង្គការ FAO ប្រចាំនៅកម្ពុជា និងមីយ៉ាន់ម៉ា អង្គការ IRRI និងសាកលវិទ្យាល័យកសិកម្មភាគខាងត្បូងប្រទេសចិន។
លោក ងិន ឆាយ ប្រតិភូរាជរដ្ឋាភិបាលកម្ពុជាទទួលបន្ទុកជា អគ្គនាយកនៃអគ្គនាយកដ្ឋានកសិកម្មដែលចូលរួមសិក្ខាសាលានេះថ្លែងថា អង្គការ FAO តែងតែបានផ្តួចផ្តើម និងគាំទ្រឱ្យមានគម្រោងថ្នាក់តំបន់នេះឡើង និងផ្តល់ឱកាសដល់ប្រទេសកម្ពុជាបានចូលរួមអនុវត្តក្នុងគម្រោងនេះ។
លោក ងិន ឆាយ បានបន្ថែមថា អង្គការ FAO គឺជាដៃគូអភិវឌ្ឍន៍យ៉ាងជិតស្និទ្ធមួយក្នុងចំណោមដៃគូអភិវឌ្ឍន៍ជាច្រើនរបស់កម្ពុជា ដែលបានផ្តល់ការគាំទ្រផ្នែកបច្ចេកទេសសម្រាប់ការអភិវឌ្ឍវិស័យកសិកម្មនៅកម្ពុជា។
លោកថ្លែងទៀត៖ «តាមរយៈគម្រោងនេះ ខ្ញុំសង្ឃឹមយ៉ាងមុតមាំថា អង្គភាពអនុវត្តគម្រោងទាំងអស់នឹងសហការកាន់តែស្អិតល្មួតជាមួយអង្គការ FAO និងដៃគូសំខាន់ៗមួយចំនួនទៀត រួមទាំងអង្គការ IRRI និងសាកលវិទ្យាល័យកសិកម្មភាគខាងត្បូង ប្រទេសចិន ដើម្បីសម្រេចឱ្យបាននូវគោលបំណង គម្រោងដែលបានកំណត់»។
លោក សុង សារ៉ន ប្រធានសហព័ន្ធស្រូវ អង្ករកម្ពុជាបានស្វាគមន៍ និងគាំទ្រដែលកម្ពុជាចូលរួមអនុវត្តគម្រោងថ្មីនេះរបស់រាជរដ្ឋាភិបាល ដោយប្តេជ្ញាចូលរួមសហការក្នុងការលើកកម្ពស់ការផលិតស្រូវដែលមានស្តង់ដា គុណភាពស្របតាមទីផ្សារបរទេសដែលមានតម្រូវការនាំចូលអង្ករ។
លោកនិយាយថា៖ «នេះជាការឆ្លើយតបនឹងតម្រូវការទីផ្សារក្នុងនាមវិស័យឯកជន ក៏ដូចជា សហព័ន្ធស្រូវ អង្ករពិតជាស្វាគមន៍នូវគំនិតផ្តួចផ្តើមនេះ ហើយនឹងចូលរួមសហការជាមួយក្រុមផលិតសម្រាប់សហប្រតិបត្តិការជាដៃគូដើម្បីឱ្យគម្រោងទទួលបានជោគជ័យ»។
យោងតាមរបាយការណ៍របស់ក្រសួងកសិកម្ម ការងារបង្កបង្កើនផលស្រូវរដូវប្រាំងនៅទូទាំងប្រទេសសម្រេចបាន ១៤១,៤៥ ភាគរយនៃផែនការ ៤៥៩ ២០០ ហិកតា ដោយទទួលបានទិន្នផលសរុប ២,៩៣ លានតោន ដែលលើសឆ្នាំ ២០២០ ចំនួន ៥៤ ០០០ តោន ដោយទទួលបានទិន្នផលជាមធ្យមចំនួន ៤,៥៣៥ តោនក្នុង ១ ហិកតា។
ល្បឿននៃការងារបង្កបង្កើនផលស្រូវវស្សាឆ្នាំ ២០២១ រហូតដល់ពេលនេះ សម្រេចបាន ២៧, ១៣% នៃផែនការ ២,៦០ លានហិកតាលឿនជាងរដូវកាលមុន ២០៥ ៣៨២ ហិកតា៕ LA
