ភ្នំពេញៈ Jiangsu General Science Technology Co. Ltd ជាក្រុមហ៊ុនផលិតសម្បកកង់រថយន្តរបស់ប្រទេសចិនបានប្រកាសពីផែនការបង្កើតរោងចក្រផលិតកង់រថយន្តដឹកអ្នកដំណើរនៅកម្ពុជា។ នេះបើតាមគេហទំព័រ tyrepress media ចេញផ្សាយកាលពីថ្ងៃទី ៧ ខែមិថុនា។
យោងតាម tyrepress media ក្រុមហ៊ុន Jiangsu General មានផែនការបោះទុនវិនិយោគសម្រាប់គម្រោងនេះចំនួន ១,៣ ពាន់លានយន់ (២០៤, ៩៤ លានដុល្លារ) ជាមួយនឹងសមត្ថភាពផលិតកង់រថយន្តចំនួន ៦ លានក្នុង ១ ឆ្នាំ។
រោងចក្រនេះនឹងសាងសង់ក្នុងតំបន់សេដ្ឋកិច្ចពិសេសក្រុងព្រះសីហនុដោយរំពឹងនឹងបញ្ចប់ការសាងសង់ក្នុងរយៈពេល ១៥ ខែ និងអាចដាក់ឱ្យដំណើរការនៅក្នុងខែកញ្ញា ឆ្នាំ ២០២២។ នេះបើតាមក្រុមហ៊ុន។
លោក ហ៊ន សាផន ប្រធាននាយកដ្ឋានទីផ្សារ និងសហប្រតិបត្តិការអន្តរជាតិនៃអគ្គនាយកដ្ឋានកៅស៊ូបានស្វាគមន៍ចំពោះផែនការវិនិយោគនេះដោយលោកលើកឡើងថា នឹងជួយលើកកម្ពស់ទីផ្សារដល់ផលិតផលកៅស៊ូនៅក្នុងស្រុករបស់ប្រទេសកម្ពុជា។
លោកប្រាប់ថា៖ «យើងសូមស្វាគមន៍គម្រោងវិនិយោគនេះ។ មកដល់ពេលនេះយើងមិនទាន់មានការដំឡើងរោងចក្រឧស្សាហកម្មកែច្នៃផលិតផលពីកៅស៊ូ ដើម្បីជួយគាំទ្រដល់វត្ថុធាតុដើមក្នុងស្រុកនៅឡើយទេ»។
លោក សាផន ប្រាប់ទៀតថា ក្រសួងនឹងផ្តល់ការគាំទ្រ និងកិច្ចសហប្រតិបត្តិការជាមួយនឹងវិនិយោគិនក្នុងការសម្របសម្រួលកិច្ចការនេះ ប្រសិនបើមានផែនការជាក់លាក់។
លោកនិយាយថា៖ «អ្វីដែលជាកិច្ចការសំខាន់ក្រុមហ៊ុន គឺត្រូវមានផែនការច្បាស់លាស់ ហើយយើងនឹងជួបគ្នា ដើម្បីចង់ដឹងពីផែនការ និងទិសដៅបន្ថែមទៀត។ ចំពោះផលិតផលកៅស៊ូរបស់យើងផលិតបានច្រើនដែរក្នុង ១ ឆ្នាំៗ ដែលអាចមានសមត្ថភាពផ្គត់ផ្គង់បាន»។
លោកសម្គាល់ថា បើទោះបីស្ថានភាពនៃការរីករាលដាលជំងឺកូវីដ ១៩ បានធ្វើឱ្យពិភពលោកជួបការលំបាកផ្នែកសេដ្ឋកិច្ចក្តី ប៉ុន្តែអនុវិស័យកៅស៊ូរបស់កម្ពុជាហាក់មានទីផ្សារ ល្អប្រសើរក្នុងរយៈពេលប៉ុន្មានខែដើមឆ្នាំនេះបើធៀបនឹងបណ្តាឆ្នាំកន្លងមក។
លោកបន្តថា៖ «កៅស៊ូរបស់កម្ពុជាបានពឹងផ្អែកតែទីផ្សារក្រៅស្រុកប៉ុណ្ណោះ អ៊ីចឹងយើងជួបការលំបាកខ្លះ ប៉ុន្តែប្រសិនបើគាត់មានបំណងបង្កើតរោងចក្រផលិតមុខទំនិញដែលយកពីកៅស៊ូធម្មជាតិជាវត្ថុធាតុដើម គឺជាការប្រពៃបំផុតដែលរដ្ឋាភិបាលកំពុងតែចង់បាន»។
បើតាមការចេញផ្សាយរបស់ tyrepress media កាលពីថ្ងៃទី ៩ ខែ មីនា ឆ្នាំ ២០២១ ក្រុមហ៊ុន Sailun Group ក៏បានចាប់អារម្មណ៍បង្កើតរោងចក្រផលិតកង់រថយន្តអ្នកដំណើរនៅក្នុងតំបន់សេដ្ឋកិច្ចពិសេស QiLu (Cambodia) នៅខេត្តសា្វយរៀងដោយមានសមត្ថភាពផលិតកង់រថយន្តបាន ៥ លាន ក្នុង ១ ឆ្នាំ។
ក្រុមហ៊ុន Sailun Group បានប៉ាន់ប្រមាណថា ទុនវិនិយោគគម្រោងនេះមាន ១,១៨ ពាន់លានយន់ ដែលប្រតិបត្តិការដោយក្រុមហ៊ុន Qilu (Cambodia) Economic Co Ltd។
ជាមួយគ្នាក្រុមប្រឹក្សាអភិវឌ្ឍន៍កម្ពុជា កាលពីខែកុម្ភៈឆ្នាំនេះ បានអនុម័តរោងចក្រផលិតកង់រថយន្តមានតម្លៃ ១៥ លានដុល្លារ របស់ក្រុមហ៊ុន Cart Tire Co Ltd នៅក្នុងតំបន់សេដ្ឋកិច្ចពិសេស QiLu Bavet Special Economic Zone នៅក្រុងបាវិត ខេត្តស្វាយរៀងផងដែរ។
ទិន្នន័យក្រសួងពាណិជ្ជកម្មឱ្យដឹងថា កម្ពុជាបាននាំចេញកៅស៊ូក្រែបទៅកាន់ទីផ្សារអន្តរជាតិមានតម្លៃ ២៨០,៣៤ លានដុល្លារ កាលពីឆ្នាំ ២០២០ កើន ២៥,២១ ភាគរយធៀបនឹងឆ្នាំ ២០១៩ ដែលមាន ២២៣,៩ លានដុល្លារ។
ដោយឡែកនៅក្នុងឆ្នាំ ២០២០ កម្ពុជានាំចូលរថយន្តតម្លៃសរុប ១ ០៩៩,៥ លានដុល្លារ ថយចុះ ៣៦,៦ ភាគរយ ធៀបនឹងឆ្នាំ ២០១៩ ដែលមានចំនួន ១ ៧៣៤,៣១ លានដុល្លារ៕