ម្ទេសស្រស់ដែលឈ្មួញប្រមូលទិញពីប្រជាកសិករ យកមកស្តុកទុកសម្រាប់នាំចេញ។ រូបថត សហការី
ភ្នំពេញៈ កម្ពុជាបាននាំចេញម្ទេសស្រស់ជាង ៥៦ ពាន់តោន ទៅទីផ្សារក្រៅប្រទេសក្នុងរយៈពេល ៥ ខែដើមឆ្នាំ ២០២១ កើនជាង ៩០ ភាគរយ ធៀបនឹងរយៈពេលដូចគ្នាឆ្នាំ ២០២០ ក្នុងនោះទីផ្សារប្រទេសថៃគ្របដណ្តប់ស្ទើរ ១០០ ភាគរយ។ នេះបើតាម លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
ទិន្នន័យឱ្យដឹងថា ក្នុងរយៈពេល ៥ ខែ ឆ្នាំ ២០២១ កម្ពុជានាំចេញម្ទេសស្រស់ចំនួន ៥៦ ៥០៧,១២ តោន កើន ៩៤,៨៦ ភាគរយធៀបទៅរយៈពេលដូចគ្នាឆ្នាំមុន ក្នុងនោះការនាំទៅប្រទេសថៃ មាន ៥៦ ៥០៧,១២ តោន និងប្រទេសអារ៉ាប់រួម ០,០០២ តោន។ ជាមួយគ្នានេះកម្ពុជាក៏នាំចេញម្ទេសក្រៀមទៅប្រទេសថៃ ៦០០ តោនផងដែរ ថយចុះ ៥០ ភាគរយ។
ប្រធានមន្ទីរពាណិជ្ជកម្មខេត្តបាត់ដំបង លោក គឹម ហួត បានប្រាប់ ភ្នំពេញ ប៉ុស្តិ៍ នៅថ្ងៃទី ៨ ខែមិថុនាថា ទោះបីខេត្តបាត់ដំបងមិនមែនជាកន្លែងដាំម្ទេសច្រើនជាងគេនៅកម្ពុជា ប៉ុន្តែដោយសារខេត្តបាត់ដំបងនៅជាប់ព្រំដែនប្រទេសថៃ ដែលជាទីផ្សារម្ទេសធំជាងគេរបស់កម្ពុជាហេតុនេះបានធ្វើឱ្យចំនួននៃការសុំលិខិតអនុញ្ញាតនាំចេញម្ទេសទៅប្រទេសថៃ នាដើមឆ្នាំនេះកើនគួរឱ្យកត់សម្គាល់។
លោកបន្តថា កំណើនតម្រូវការម្ទេសនៅប្រទេសថៃអាចបណ្តាលមកពីកត្តា ២ គឺឧបសគ្គនៃការដឹកជញ្ជូន និងទីផ្សារពីប្រទេសមីយ៉ាន់ម៉ា (បញ្ហាក្នុងប្រទេស) និងការត្រួតពិនិត្យ កត់ត្រាបរិមាណនាំចេញរបស់កម្ពុជាមានភាពច្បាស់លាស់ជាងមុន។
លោកថ្លែងថា៖« ចាប់ពីដើមឆ្នាំមកចំនួនការសុំ CO សម្រាប់នាំចេញម្ទេសពីមន្ទីរពាណិជ្ជកម្មខេត្តបាត់ដំបងពិតជាកើនឡើងគួរឱ្យកត់សម្គាល់»។
លោកបន្ថែមថា ទន្ទឹមនឹងកំណើននាំចេញនេះ តម្លៃម្ទេសស្រស់ក៏កើនឡើងតិចតួចដែរបើធៀបនឹងដើមឆ្នាំ ២០២០។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង លោក ឈឹម វជិរា បាននិយាយថា ផ្ទៃដី និងទិន្នផលម្ទេសនៅខេត្តបាត់ដំបងដើមឆ្នាំ ២០២១ មានប្រហាក់ប្រហែលឆ្នាំ ២០២០ ប៉ុន្តែតម្លៃបានខ្ពស់ជាងឆ្នាំមុនបន្តិច ដោយពេលប្រមូលផលដើមឆ្នាំម្ទេសស្រស់បានកើនដល់រង្វង់ ៩ ០០០ រៀល ក្នុង ១ គីឡូក្រាម ខណៈពេលនេះធ្លាក់មកនៅប្រមាណ ២ ៥០០ រៀល។
លោកប្រាប់ទៀតថា ចាប់ពីឆ្នាំ ២០២០ មកផ្ទៃដីដាំដំណាំនៅខេត្តបាត់ដំបងបានកើនស្ទើរគ្រប់មុខទំនិញ ដែលកំណើននេះដោយសារផ្ទៃដីដែលគេទុកទំនេរចោលពីមុននោះ ពេលនេះត្រូវគេយកមកដាំដំណាំជាបន្តបន្ទាប់។ លោកអះអាងថា៖ «ម្ទេសកំពុងមានទីផ្សារល្អ ដោយការសារមានតម្រូវការច្រើនពីប្រទេសថៃ»។
យោងតាមលោក វជិរា ផ្ទៃដីដាំដុះម្ទេសនៅខេត្តបាត់ដំបងក្នុងឆ្នាំ ២០២១ មានចន្លោះពី ៥៨០-១ ១០០ ហិកតា។ ជាមធ្យមក្នុងដី ១ ហិកតា ម្ទេសផ្តល់ផល ៣,៥ តោន ក្នុង ១ ឆ្នាំ។ ម្ទេសនឹងឱ្យផលក្នុងរង្វង់ ៥០-៦០ ថ្ងៃ បន្ទាប់ពីដាំដុះ។
លោក មាស សុផល ដែលមានដីដាំម្ទេសក្នុងខេត្តកំពង់ធំ សៀមរាប និងកំពង់ឆ្នាំង និងជាអ្នកទទួលទិញម្ទេសពីកសិករ ដើម្បីយកទៅសម្ងួតសម្រាប់នាំចេញទៅប្រទេសចិននាពេលកន្លងមក បានប្រាប់ថា ការឆ្លងរាលដាលជំងឺកូវីដ ១៩ បានធ្វើឱ្យការប្រមូលទិញម្ទេសទៅប្រទេសចិនរបស់លោកត្រូវទុកចោល ហើយការចុះមកពិនិត្យរបស់អ្នកបញ្ជាទិញពីប្រទេសចិន ក៏មិនមាននោះទេ។
លោកនិយាយ៖ «ចាប់តាំងពីដើមឆ្នាំមុន ខ្ញុំមិនបាននាំចេញម្ទេសក្រៀមទៅប្រទេសចិនដូចពេលមុនទេ»។
ទិន្នន័យក្រសួងកសិកម្ម រុក្ខាប្រមាញ់ និងនេសាទឱ្យដឹងថា ក្នុងឆ្នាំ ២០២០ ការនាំចេញម្ទេសស្រស់សម្រេចបាន ៧០ ៥៤៦ តោន កើន ២៧,០៨ ភាគរយពីចំនួន ៥៥ ៥១៣ តោន កាលពីឆ្នាំ ២០១៩៕ LA
