ភ្នំពេញៈ ក្រុមហ៊ុន KrisEnergy Ltd ដែលកំពុងអភិវឌ្ឍន៍អណ្ដូងប្រេងអប្សរានៅក្នុងសមុទ្រកម្ពុជាបានអះអាងថា រាល់ប្រតិបត្តិការក្រុមហ៊ុនបុត្រសម្ព័ន្ធរបស់ខ្លួននៅកម្ពុជា គ្រីសអេនើជី (ខេមបូឌា) អិលធីឌី [KRISENERGY (CAMBODIA) LTD)] នៅបន្តជាធម្មតា ទោះបីជាក្រុមហ៊ុនមេរបស់ខ្លួនបានប្រកាសរំលាយអាជីវកម្មកាលពីថ្ងៃសុក្រកន្លងមកនេះក្តី។ នេះបើយោងតាមមន្ត្រីជាន់ខ្ពស់របស់ក្រុមហ៊ុនរុករកប្រេង និងឧស្ម័នដែលមានមូលដ្ឋាននៅប្រទេសសិង្ហបុរីមួយនេះ។
កាលពីថ្ងៃសុក្រទី ៤ ខែមិថុនា ក្រុមហ៊ុន KrisEnergy Ltd បានប្រកាសថា ខ្លួនមិនមានលទ្ធភាពក្នុងការសងបំណុលរបស់ខ្លួនដោយផ្អែកលើបំណុលជាក់ស្ដែង និង/ឬ បំណុលត្រៀមសង ហើយនឹងបន្តទៅដល់ការជម្រះបញ្ជី។ ក្រុមហ៊ុនមួយនេះបានឱ្យដឹងថា បំណុលរបស់ខ្លួនលើសពីតម្លៃទ្រព្យសកម្មរបស់ក្រុមហ៊ុន។ ជាមួយគ្នានេះ ការស្ទុះងើបឡើងវិញកាន់តែទាបបំផុតដែរ។ ចំណែកលំហូរសាច់ប្រាក់ពីការអភិវឌ្ឍ Apsara Mini Phase 1A នឹងមានការរៀបចំរចនាសម្ព័ន្ធជាថ្មី និងកង្វះជម្រើសការរៀបចំរចនាសម្ព័ន្ធឡើងវិញដែលអាចទទួលយកបាន និងកង្វះការចាក់បញ្ចូលមូលនិធិថ្មីៗរយៈពេលខ្លី។
ក្រុមហ៊ុន KrisEnergy ឱ្យដឹងថា៖ «ក្រុមហ៊ុនបានដាក់ពាក្យបញ្ចប់ប្រតិបត្តិការអាជីវកម្មកាលពីថ្ងៃទី ៤ ខែ មិថុនា ឆ្នាំ ២០២១ ទៅតុលាការ Grand Court តំបន់ Cayman Islands (ពាក្យបញ្ចប់)។ កាលបរិច្ឆេទការបើកសវនាការសម្រាប់ពាក្យបញ្ចប់នេះនឹងត្រូវបានកំណត់»។
លោកស្រី Tanya Pang អនុប្រធានផ្នែកទំនាក់ទំនងវិនិយោគិន និងទំនាក់ទំនងសាជីវកម្មក្រុមហ៊ុន KrisEnergy Ltd បានប្រាប់ភ្នំពេញប៉ុស្តិ៍នៅថ្ងៃទី ៨ ខែមិថុនាថា សេចក្តីប្រកាសរំលាយក្រុមហ៊ុនដែលចេញផ្សាយកាលពីថ្ងៃទី ៤ ខែមិថុនា កន្លងមកនេះគឺសំដៅដល់ការរំលាយក្រុមហ៊ុនមេតែប៉ុណ្ណោះ ខណៈរាល់ប្រតិបត្តិការរបស់ក្រុមហ៊ុនបុត្រសម្ព័ន្ធនៅតែបន្តដំណើរការជាធម្មតា។
លោកស្រីអះអាងថា៖ «ដាក់ពាក្យបញ្ចប់ប្រតិបត្តិការអាជីវកម្ម ដូចដែលបានប្រកាសនៅថ្ងៃទី ៤ ខែមិថុនា ឆ្នាំ ២០២១ ទាក់ទងតែក្រុមហ៊ុន KrisEnergy Ltd ដែលជាក្រុមហ៊ុនមេបានចុះបញ្ជីនៅលើផ្សារភាគហ៊ុនសិង្ហបុរីតែប៉ុណ្ណោះ គឺមិនមែនសំដៅដល់ដំណើរការអាជីវកម្មក្រុមហ៊ុនបុត្រសម្ព័ន្ធទេ។ ដូច្នេះរាល់ប្រតិបត្តិការនៃក្រុមហ៊ុនបុត្រសម្ព័ន្ធរបស់ក្រុមហ៊ុនមេ KrisEnergy គឺនៅតែបន្តដំណើរការជាធម្មតា»។
ប្រទេសកម្ពុជាបានទាញយកតំណក់ប្រេងឆៅលើកដំបូងរបស់ខ្លួនកាលពីថ្ងៃទី ២៨ ខែធ្នូពីអណ្ដូងប្រេង A-01D ជាផ្នែកមួយនៃការកសាងផ្លាតហ្វមក្បាលអណ្ដូងផលិតកម្មចំនួន ៥ នៅក្នុងការអភិវឌ្ឍ Mini-Phase 1A របស់ក្រុមហ៊ុន KrisEnergy។
សេចក្ដីប្រកាសព័ត៌មានរបស់ក្រុមហ៊ុនកាលពីថ្ងៃទី ២៨ ខែមេសា បានឱ្យដឹងថា ផលិតកម្មដែលកាត់បន្ថយនឹងមានផលប៉ះពាល់ខ្លាំងលើប្រាក់ចំណូលដែលរកបានពីការអភិវឌ្ឍ Mini Phase 1A ទោះបីជាការស្ទុះងើបឡើងវិញនៃតម្លៃប្រេងសកល ចាប់តាំងពីការធ្លាក់ចុះដល់កម្រិតទាបកាលពីឆ្នាំ ២០២០ នៅពេលការរីករាលដាលជំងឺកូវីដ ១៩ បានចាប់ផ្ដើមផ្ទុះឡើង។
លោក ជៀប សួរ អគ្គនាយកនៃអគ្គនាយកដ្ឋានប្រេងនៃក្រសួងរ៉ែ និងថាមពល បានប្រាប់ភ្នំពេញប៉ុស្ដិ៍កាលពីថ្ងៃទី ៨ ខែមិថុនាឆ្នាំ ២០២១ ថា លោកបានទទួលព័ត៌មានរួចហើយជុំវិញការប្រកាសរំលាយក្រុមហ៊ុនមេរបស់ក្រុមហ៊ុនដែលវិនិយោគក្នុងវិស័យប្រេង និងឧស្ម័ននៅកម្ពុជានេះ និងក៏បានទាក់ទងទៅក្រុមហ៊ុនដើម្បីព័ត៌មានលម្អិតបន្ថែម និងនីតិវិធីនៅតុលាការផងដែរ។
លោកថ្លែងថា៖ «យើងបានសួរក្រុមហ៊ុននេះរួចហើយអំពីការប្រកាសរំលាយនេះ ហើយពួកគេនឹងរាយការណ៍មកពួកយើង។ សម្រាប់ខាងយើងវិញ យើងនឹងពិនិត្យលក្ខខណ្ឌក្នុងកិច្ចព្រមព្រៀងប្រេងកាត។ តើអ្វីដែលក្រុមហ៊ុននេះត្រូវបំពេញ? ដើម្បីយើងនឹងជូនព័ត៌មានដល់ពួកគេលើអ្វីដែលបានលើកឡើងនៅក្នុងកិច្ចព្រមព្រៀងនេះ»។
លោកបន្ថែមទៀតថា៖ «សម្រាប់ប្រេងឆៅដែលក្រុមហ៊ុនបានបូមរួចហើយ ពួកគេនឹងបំពេញកាតព្វកិច្ចរបស់ពួកគេ។ ដូច្នេះនៅពេលពួកគេបំពេញកាតព្វកិច្ចរបស់ពួកគេ យើងអាចវាយតម្លៃការងាររបស់ពួកគេបាន។ នៅពេលនេះយើងក៏ចង់ឃើញវិវឌ្ឍរបស់ក្រុមហ៊ុនទៅជាយ៉ាងណា បន្ទាប់ពីប្រកាសរំលាយ ជាពិសេសនីតិវិធីតុលាការ ព្រោះយើងចង់បានព័ត៌មានពីក្រុមហ៊ុន»។
ក្រុមហ៊ុន គ្រីសអេនើជី (ខេមបូឌា) អិលធីឌី និងរដ្ឋាភិបាលកម្ពុជាតាមរយៈក្រសួងរ៉ែ និងថាមពលបានចុះហត្ថលេខាលើកិច្ចព្រមព្រៀងប្រេងកាតក្នុងការចាប់ផ្តើមអាជីវកម្មលើប្លុក A កាលពីថ្ងៃទី ២៣ ខែសីហាឆ្នាំ ២០១៧។ ចាប់ពីពេលនោះមក ភាគីក្រុមហ៊ុននេះបានអភិវឌ្ឍវិស័យប្រេងនៅកម្ពុជាតាមផែនការរហូតឈានដល់បូមប្រេងបានសម្រេច។
រដ្ឋាភិបាលកម្ពុជាបានគណនាថាប្រាក់ចំណូលប្រចាំឆ្នាំពីការអភិវឌ្ឍប្លុក A នេះដែលមានចំនួន ៣០ លានដុល្លារ ប្រសិនបើតម្លៃប្រេងលើសពី ៥៥ ដុល្លារក្នុង ១ បារ៉ែល។
វាអាចមានហេតុផលច្រើនថា តម្លៃប្រេងឆៅកើនឡើង របាយការណ៍ឯករាជ្យឆ្នាំ ២០១៥ របស់ក្រុមហ៊ុន Resources for Development Consulting ដែលមានមូលដ្ឋាននៅប្រទេសកាណាដាបានបង្ហាញថា ប្រសិនការអភិវឌ្ឍពេញលេញនៃដំណាក់កាលទី ២ ចាប់ផ្ដើម ប្រាក់ចំណូលរដ្ឋាភិបាលសរុបអាចនៅចន្លោះ ៦៣០ លានដុល្លារ សម្រាប់តម្លៃប្រេង ៧០ ដុល្លារក្នុង ១ បារ៉ែល និង ១ ពាន់លានដុល្លារ ពេលប្រេងមានតម្លៃ ៩០ ដុល្លារក្នុង ១ បារ៉ែលនោះ។
ក្រុមហ៊ុន Chevron ទទួលបានអាជ្ញាប័ណ្ណ Block A របស់កម្ពុជាកាលពីឆ្នាំ ២០០២ ហើយកាលពីឆ្នាំ ២០១៦ ក្រុមហ៊ុន KrisEnergy បានទិញភាគហ៊ុនក្រុមហ៊ុន Chevron នៅក្នុងគម្រោងរុករកប្រេង Block A។ ក្រុមហ៊ុន KrisEnergy បានទិញភាគហ៊ុនទាំងអស់របស់ Chevron ក្នុងតម្លៃ ៦៥ លានដុល្លារ។
អណ្ដូងប្រេង Block A របស់កម្ពុជា គ្របដណ្ដប់លើផ្ទៃ ៤ ៧០៩ គីឡូម៉ែត្រនៅឈូងសមុទ្រថៃ នៅខ្មែរបាសាំង និងចម្ងាយប្រហែល ១៥០ គីឡូម៉ែត្រពីច្រាំងសមុទ្ររបស់ប្រទេសកម្ពុជាជាមួយនឹងជម្រៅទឹកចាប់ពី ៥០ ទៅ ៨០ ម៉ែត្រ៕LA