ភ្នំពេញៈ ប្រទេស ៤ ក្នុងចំណោម ៥ នៃសហភាពសេដ្ឋកិច្ចអឺរ៉ុប-អាស៊ី (EAEU) បានគាំទ្រចំពោះការចរចាកិច្ចព្រមព្រៀងពាណិជ្ជកម្មសេរីកម្ពុជា-EAEU បន្ទាប់ពីសហព័ន្ធរុស្ស៊ីនឹងជួយសម្របសម្រួលលើកិច្ចចរចា។
EAEU ជាសហព័ន្ធសេដ្ឋកិច្ចតំណាងឱ្យប្រទេសចំនួន ៥ រួមមានរុស្ស៊ី អាមេនី កាហ្សាក់ស្ថាន បេឡារុស និងកៀហ្ស៊ីស៊ីស្ថានដែលមានប្រជាជនសរុបជាង ១៨៤ លាននាក់ក្នុងឆ្នាំ ២០២០ និងមានផលិតផលក្នុងស្រុក GDP សរុបរួមគ្នា ៤,៧៧ ពាន់ពាន់លានដុល្លារ។
លោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្មប្រាប់ ភ្នំពេញ ប៉ុស្តិ៍ថា ក្រសួងពាណិជ្ជកម្មដែលជាក្រសួងសាម៉ីក្នុងការចរចាលើកិច្ចព្រមព្រៀងពាណិជ្ជកម្មសេរីកម្ពុជា-EAEU កំពុងធ្វើការយ៉ាងសកម្ម ដើម្បីជំរុញការចាប់ផ្តើមចរចាឱ្យបានឆាប់តាមដែលអាចធ្វើបាន។
លោកថ្លែងថា៖ «ក្នុងចំណោម ៥ ប្រទេសដែលជាសមាជិកនៃ EAEU មាន ៤ ប្រទេសហើយ ដែលគាំទ្រឱ្យមានកិច្ចចរចាពាណិជ្ជកម្មសេរីជាមួយកម្ពុជា។ ក្នុងនោះយើងមានសហព័ន្ធរុស្ស៊ីដែលជាប្រទេសធំនាំមុខក្នុង EAEU ជួយជំរុញសម្របសម្រួលឱ្យកិច្ចការនេះអាចប្រព្រឹត្តទៅតាមការរំពឹងទុក»។
លោកឱ្យដឹងទៀតថា កម្ពុជានឹងទទួលបានផលចំណេញជាច្រើនពីទំនាក់ទំនងទ្វេភាគីនេះ ទាំងការបើកច្រកទីផ្សារបន្ថែមទៀត ការទទួលបានវិនិយោគពីបណ្តាប្រទេសទាំង ៥ ព្រមទាំងការទទួលបានបច្ចេកវិទ្យាថ្មីៗ និងសហប្រតិបត្តិការវិទ្យាសាស្ត្រ និងសេដ្ឋកិច្ច។
លោកបញ្ជាក់ថា៖ «ក្រសួងពាណិជ្ជកម្មជឿជាក់មុតមាំថាកិច្ចចរចានេះអាចនឹងចាប់ផ្តើមបានក្នុងពេលឆាប់ៗខាងមុខអាស្រ័យដោយការឯកភាពគ្នាក្នុងចំណោមប្រទេសទាំង ៥ ដែលមានសហព័ន្ធរុស្ស៊ីជាអ្នកសម្របសម្រួល»។
កាលពីថ្ងៃទី ១ ខែមិថុនា ឆ្នាំ ២០២១ ឯកអគ្គរាជទូតកម្ពុជាប្រចាំប្រទេសតួកគី បានជួបជាមួយឯកអគ្គរដ្ឋទូតកៀហ្ស៊ីស៊ីស្ថានប្រចាំនៅប្រទេសតួកគី។
ក្នុងជំនួបនោះភាគីទាំង ២ បានពិភាក្សាគ្នាពីទស្សនវិស័យសម្រាប់កិច្ចសហប្រតិបត្តិការពាណិជ្ជកម្ម និងសេដ្ឋកិច្ចរួមទាំងក្នុងក្របខ័ណ្ឌនៃសហភាពសេដ្ឋកិច្ចអឺរ៉ុប-អាស៊ី ព្រមទាំងអំពីលទ្ធភាពនៃការពិចារណាលើកិច្ចព្រមព្រៀងដាច់ដោយឡែករវាងកម្ពុជា និងកៀហ្ស៊ីស៊ីស្ថានលើវិស័យពាណិជ្ជកម្មសេរីពន្ធត្រួតស៊ីគ្នា និងតំបន់មិនត្រូវការទិដ្ឋាការ។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (បណ្ឌិត្យសភាកម្ពុជា) បានប្រាប់ថា កាហ្សាក់ស្ថាន គឺជាសមាជិកនៃបណ្តាប្រទេសសហភាពសេដ្ឋកិច្ចអឺរ៉ុប-អាស៊ីដែលមានសក្តានុពលសេដ្ឋកិច្ចខ្លាំងនៅអឺរ៉ុបខាងកើត។
លោកប្រាប់ថា៖ «កិច្ចសន្ទនានេះខ្ញុំគិតថា ភាគីទាំង ២ ចង់ដឹងឱ្យបានច្បាស់នូវប្រភេទទំនិញអ្វីខ្លះដែលអាចដោះដូរជាមួយគ្នាបាន ដើម្បីងាយសម្រួចទៅលើផលិតផលក្នុងស្រុកក្នុងការជំរុញផលិតកម្មឱ្យស្របទៅតាមតម្រូវការប្រទេសដៃគូ»។
បើតាមលោក ប៉ែន សុវិជាតិ ប្រទេសកាហ្សាក់ស្ថាន ដែលស្ថិតនៅក្នុងដំណាក់កាលសិក្សាក៏បានធ្វើការពិចារណាយ៉ាងល្អិតល្អន់ដើម្បីចូលរួមជាមួយប្រទេសជាសមាជិក EAEU ដទៃទៀតផងដែរ។
លោកនិយាយថា៖ «បើតាមការគ្រោងទុក ឯកអគ្គរាជទូតកម្ពុជានឹងធ្វើដំណើរទៅសាធារណរដ្ឋកាហ្សាក់ស្ថាន ដើម្បីជូនសារតាំងដល់ប្រធានាធិបតីសាធារណរដ្ឋកាហ្សាក់ស្ថាន និងជួបសម្តែងការគួរសមជាមួយនឹងរដ្ឋមន្ត្រីក្រសួងការបរទេសកាហ្សាក់ស្ថាន នៅពេលឆាប់ៗខាងមុខនេះ»។
យោងតាមទិន្នន័យពីក្រសួងពាណិជ្ជកម្មទំហំពាណិជ្ជកម្មរវាងកម្ពុជា និង EAEU ក្នុងឆ្នាំ ២០២០ មានតម្លៃសរុប ៦៧,៣៧ លានដុល្លារកើន ១៨,២២ ភាគរយធៀបនឹងឆ្នាំ ២០១៩។ ក្នុងនោះការនាំចេញរបស់កម្ពុជាមានតម្លៃ ៥២,១៩ លានដុល្លារ កើន ០,៧៣ ភាគរយ និងការនាំចូលវិញពី EAEU មានតម្លៃ ១៥,១៨ លានដុល្លារ កើនឡើង ១៩៣,៥៧ ភាគរយ។
ផលិតផលដែលកម្ពុជានាំចេញទៅ EAEU មានភាគច្រើនជាផលិតផលកសិកម្ម និងវាយនភណ្ឌ ខណៈផលិតផលដែល EAEU នាំមកកម្ពុជារួមមានគ្រឿងម៉ាស៊ីន ត្រាក់ទ័រ និងគ្រឿងបន្លាស់យានយន្តកសិកម្ម៕ LA