.jpg)
ក្រុមហ៊ុនសិង្ហបុរី ទទួលសិទ្ធិរុករករ៉ែនៅក្នុងស្រុកឱរ៉ាល់ ខេត្តកំពង់ស្ពឺ។ រូបថត HONG LAI HUAT GROUP
ភ្នំពេញៈ ក្រុមហ៊ុន HLH Agriculture (Cambodia) ដែលជាក្រុមហ៊ុនបុត្រសម្ព័ន្ធគ្រប់គ្រងទាំងស្រុងរបស់ក្រុមហ៊ុន Hong Lai Huat''s ដែលចុះបញ្ជីនៅប្រទេសសិង្ហបុរី និងក្រុមហ៊ុន Cambodia Hei Shi Mineral Co ចុះកិច្ចព្រមព្រៀងអនុស្សរណៈនៃការយោគយល់គ្នា (MoU) ដើម្បីវិនិយោគជាទឹកប្រាក់ចំនួន ២០ លានដុល្លារអាមេរិក សហការលើការរុករក ធនធានរ៉ែនៅក្នុងមជ្ឈមណ្ឌលកសិកម្មកម្ពុជា-សិង្ហបុរី ក្នុងស្រុកឱរ៉ាល់ ខេត្តកំពង់ស្ពឺ។
យោងតាមសារព័ត៌មាន The EDGE ចេញផ្សាយកាលពីថ្ងៃទី ៨ ខែមិថុនា កិច្ចសហការគ្នានេះមានតម្លៃវិនិយោគតាមការប៉ាន់ប្រមាណចំនួន ២០ លានដុល្លារអាមេរិក ហើយ MoU បញ្ជាក់ថា ទាំងក្រុមហ៊ុន HLH Agriculture និងក្រុមហ៊ុន Cambodia Hei Shi Mineral ចាត់ទុកជាដៃគូយុទ្ធសាស្ដ្រមួយ ហើយផ្ដោតការយកចិត្តទុកដាក់លើចក្ខុវិស័យបន្ទាប់ក្នុងរយៈពេល ៣ ខែក្រោយ ដើម្បីចូលទៅក្នុងកិច្ចព្រមព្រៀងភ្ជាប់កាតព្វកិច្ចមួយ។
សេចក្ដីប្រកាសព័ត៌មានបានឱ្យដឹងថា តាមរយៈ MoU នេះភាគីទាំងពីរនឹងបង្កើតការវិនិយោគរួម (JV) មួយដែលក្រុមហ៊ុន HLH Agriculture នឹងទទួលខុសត្រូវខាងការផ្តល់ដី និងការបែងចែកសិទ្ធិធ្វើអាជីវកម្មរ៉ែ។ ក្រុមហ៊ុន Cambodia Hei Shi Mineral នឹងសម្រេចឱ្យបានលើកំណត់ត្រាតាមដានរ៉ែដែលបានបង្កើតឡើងរបស់ខ្លួន ដើម្បីដំណើរការប្រតិបត្តិការរុករករ៉ែ និងទទួលខុសត្រូវលើការចំណាយទាំងអស់ដែលធ្វើឡើង ដើម្បីជ្រើសរើសបុគ្គលិក និងកម្មករដែលមានជំនាញគ្រប់គ្រាន់ គ្រឿងម៉ាស៊ីន និងគាំទ្រផ្នែកបច្ចេកវិទ្យា ព្រមទាំង ការអភិវឌ្ឍហេដ្ឋារចនាសម្ព័ន្ធសម្រាប់ប្រតិបត្តិការរុករករ៉ែ នៅក្នុងថវិកាប្រតិបត្តិការដែលបានយល់ព្រមរវាងភាគីទាំង ២។
លោក Ong Jia Jing នាយកគ្រប់គ្រងទូទៅ និងជានាយកប្រតិបត្តិក្រុមហ៊ុន Hong Lai Huat''s បានឱ្យដឹងថា ប្រតិបត្តិការរុករករ៉ែ នឹងស្ថិតក្រោមតំបន់សម្ភារសំណង់ដែលបានលៃទុកនៃមជ្ឈមណ្ឌលកសិកម្ម ដែលគ្រប់គ្រងដោយក្រុមហ៊ុន។
លោកថ្លែងថា៖ «ខណៈដែលរ៉ែធម្មជាតិល្អបំផុតត្រូវបានរកឃើញនៅលើដីរបស់យើង ដូចជារ៉ែថ្មម៉ាប និងថ្មរ៉ែក្រានីត ភាពជាដៃគូនេះនឹងជំរុញឱ្យក្រុមហ៊ុនមួយនេះរុករករ៉ែ និងផ្គត់ផ្គង់រ៉ែធម្មជាតិល្អបំផុតទាំងនេះ ដើម្បីឆ្លើយតបនឹងតម្រូវការទីផ្សារ និងដើម្បីអភិវឌ្ឍហេដ្ឋារចនាសម្ព័ន្ធនៅមជ្ឈមណ្ឌលកសិកម្មនេះ»។
លោក Ong លើកឡើងថា៖ «ធនធានរ៉ែដែលដែលបានទាញយកនឹងរួមចំណែកច្រើនដល់កំណើនអាជីវកម្មរបស់ក្រុមហ៊ុននេះ ព្រមទាំងភាគទុនិករបស់យើងក្នុងរយៈពេលជាច្រើនឆ្នាំខាងមុខ»។
ក្រុមហ៊ុន HLH Agriculture នឹងមានសិទ្ធិទទួល ៦០ ភាគរយនៃប្រាក់ចំណេញដែលរកបានពីក្រុមហ៊ុនវិនិយោគរួមមួយនេះ។ រយៈពេលរបស់ក្រុមហ៊ុនចូលទុន (JV) នេះគឺ ១០ ឆ្នាំ ដែលមានជម្រើសក្នុងការបន្តជាថ្មីសម្រាប់រយៈពេលបន្ថែម។
ភាគហ៊ុនក្រុមហ៊ុន Hong Lai Huat ជួញដូរនៅទីផ្សារហ៊ុនសិង្ហបុរីបានបិទការជួញដូរដោយកើនឡើង ០,២ ភាគរយ ឬ ២,២ ភាគរយក្នុងតម្លៃ ៩,៤ សេនកាលពីថ្ងៃទី ៨ ខែមិថុនា៕LA
