តំបន់សេដ្ឋកិច្ចពិសេសក្រុងព្រះសីហនុ (Sihanoukville Special Economic Zone: SSEZ)។ ហ៊ាន រង្សី
ភ្នំពេញៈ បើទោះវិបត្តិជំងឺកូវីដ១៩ បាននិងកំពុងធ្វើឱ្យប៉ះពាល់ដល់ខ្សែចង្វាក់ផលិតកម្ម និងការផ្គត់ផ្គង់នៅលើពិភពលោក ប៉ុន្តែសកម្មភាពនាំចេញ និងនាំចូលរបស់សហគ្រាស នៅក្នុងតំបន់សេដ្ឋកិច្ចពិសេសក្រុងព្រះសីហនុ (Sihanoukville Special Economic Zone: SSEZ) មិនបានធ្លាក់ចុះនោះទេ ដោយសម្រេចបានទំហំទឹកប្រាក់សរុបជិត ៨០០ លានដុល្លារក្នុងរយៈពេល ៥ខែដើមឆ្នាំ ២០២១ កើនឡើងប្រមាណ ៥០ភាគរយបើធៀបនឹងរយៈពេលដូចគ្នាឆ្នាំ ២០២០។
យោងតាមស្ថិតិពីក្រុមហ៊ុន SSEZ ចាប់ពីខែមករាដល់ខែឧសភា បរិមាណនាំចូល និងនាំចេញរបស់សហគ្រាសក្នុងតំបន់ SSEZ សម្រេចបានសរុប ៧៩៩ លានដុល្លារកើនឡើង ៤៩,៩១ ភាគរយ ធៀបនឹងរយៈពេលដូចគ្នាកាលពីឆ្នាំមុន។
ស្ថិតិពី SSEZ ដែលបានផ្សាយកាលពីថ្ងៃទី ៧ ខែមិថុនា បង្ហាញទៀតថា សម្រាប់ខែឧសភា ឆ្នាំនេះ សហគ្រាសនៅតំបន់សេដ្ឋកិច្ចពិសេស SSEZ ទទួលបានបរិមាណនាំចូល និងនាំចេញសរុប ១៧៨ លានដុល្លារកើន ១៨,៦៧ ភាគរយធៀបនឹងខែមេសា ឆ្នាំ ២០២១។
SSEZ បានឱ្យដឹងថា ទោះនៅក្នុងបរិបទនៃការរីករាលដាលជំងឺកូវីដ១៩ ដែលនៅតែបន្តអូសបន្លាយនៅកម្ពុជា ប៉ុន្តែកំណើននេះនឹងឆ្លុះបញ្ចាំងនៃការពង្រឹងទំនុកចិត្តកាន់តែខ្លាំងពីសហគ្រាសនៅក្នុងតំបន់មកវិនិយោគ និង អភិវឌ្ឍនៅកម្ពុជានាពេលអនាគត។
SSEZ អះអាងថា តម្លៃទិន្នផលពីឧស្សាហកម្មនេះបានរួមចំណែកច្រើនជាង ៥០ ភាគរយដល់សេដ្ឋកិច្ចក្នុងខេត្តព្រះសីហុន។ បច្ចុប្បន្ន តំបន់សេដ្ឋកិច្ចពិសេសក្រុងព្រះសីហនុ មានក្រុមហ៊ុនវិនិយោគសរុប ១៦៥ ក្រុមហ៊ុនដោយបង្កើតការងារបាន ៣០ ០០០ កន្លែង៕
