.jpg)
លោក ថោង ខុន រដ្ឋមន្ត្រីក្រសួងទេសចរណ៍ និងលោកស្រី Maria Amerita C. Aquino ឯកអគ្គរដ្ឋទូតប្រទេសហ្វីលីពីនប្រចាំកម្ពុជា ក្នុងជំនួបកាលពីថ្ងៃទី ៩ មិថុនា។ រូបថត ក្រសួងទេសចរណ៍
ភ្នំពេញៈ កម្ពុជាស្នើឱ្យឯកអគ្គរដ្ឋទូតហ្វីលីពីនជួយជំរុញភ្ញៀវទេសចរមកកម្សាន្តនៅកម្ពុជាឱ្យបានច្រើនបន្ទាប់ពីស្ថានភាពកូវីដ ១៩ បានធូរស្រាល ស្របពេលរដ្ឋាភិបាលកំពុងរៀបចំផែនការទទួលភ្ញៀវទេសចរដែលបានចាក់វ៉ាក់សាំងការពារជំងឺកូវីដ ១៩ រួចរាល់។
សំណើនេះត្រូវធ្វើឡើងក្នុងជំនួបរវាងរដ្ឋមន្ត្រីក្រសួងទេសចរណ៍កម្ពុជា លោក ថោង ខុន ជាមួយនឹងលោកស្រី Maria Amerita C. Aquino ឯកអគ្គរដ្ឋទូតប្រទេសហ្វីលីពីនប្រចាំកម្ពុជា កាលពីថ្ងៃទី ៩ ខែមិថុនា នៅទីស្តីការក្រសួង។
លោក ថោង ខុន បានលើកឡើងថា រដ្ឋាភិបាលកម្ពុជាកំពុងខិតខំប្រឹងប្រែងទប់ស្កាត់ការរីករាលដាលជំងឺកូវីដ ១៩ ហើយរដ្ឋាភិបាលក៏កំពុងរៀបចំផែនការយុទ្ធសាស្ត្រក្នុងការត្រៀមបើកដំណើរការវិស័យទេសចរណ៍ឡើងវិញផងដែរ។
លោកឱ្យដឹងថា៖ «បច្ចុប្បន្នក្រសួងទេសចរណ៍កំពុងសិក្សា និងរៀបចំឯកសារទស្សនទានស្តីពីកញ្ចប់ទេសចរណ៍ចាក់វ៉ាក់សាំងនៅក្នុងគោលដៅពិនិត្យលទ្ធភាពសម្រាប់ប្រទេសដែលមានហានិភ័យទាបបានមកទស្សនានៅប្រទេសកម្ពុជា ក្នុងតំបន់ដែលមានសុវត្ថិភាព ដោយគោរពតាមវិធានសុវត្ថិភាពរបស់ប្រទេសកម្ពុជា គឺធ្វើយ៉ាងណាចូលរួមទប់ស្កាត់ជំងឺកូវីដ ១៩»។
លោកបានរំឭកថា កាលពីដើមឆ្នាំ ២០២១ កម្ពុជាបានធ្វើជាម្ចាស់ផ្ទះរៀបចំកិច្ចប្រជុំរដ្ឋមន្ត្រីទេសចរណ៍អាស៊ាន ដោយបានសម្រេចនូវវិធានការ និងគោលដៅនានា ដើម្បីបើកទេសចរណ៍ក្នុងតំបន់អាស៊ានឡើងវិញ ដោយផ្តោតលើទេសចរ ដែលចាក់វ៉ាក់សាំងរួចហើយ។
លោកថ្លែងថា៖ «យើងបានដាក់ចេញផែនការមួយចំនួន ដើម្បីទប់ស្កាត់ជំងឺកូវីដ ១៩ ក្នុងនោះក៏មានផែនការស្តារវិស័យទេសចរណ៍ឡើងវិញដោយគោរពតាមវិធានសុវត្ថិភាព អនាម័យ សម្រាប់អនុវត្តក្នុងឧស្សាហកម្មទេសចរណ៍អាស៊ាន។ នេះជាផ្នែកមួយនៃការត្រៀមលក្ខណៈរបស់កម្ពុជាធ្វើជាម្ចាស់ផ្ទះរៀបចំវេទិកាទេសចរណ៍អាស៊ានឆ្នាំ ២០២២ ផងដែរ»។
លោកស្រី Maria Amerita C. Aquino បានឯកភាព និងប្តេជ្ញាជួយជំរុញបន្ថែមទៀត ដើម្បីជំរុញកំណើនទេសចរមកទស្សនាកម្ពុជា ក្រោយពីស្ថានភាពជំងឺកូវីដ ១៩ មានភាពធូរស្រាល។
លោកស្រីបញ្ជាក់ថា៖ «ខ្ញុំជឿថា ពន្លឺថ្មីនៃការរីកចម្រើនរបស់ឧស្សាហកម្មទេសចរណ៍កម្ពុជានឹងរះឡើងនៅក្នុងពេលឆាប់ៗខាងមុខ ព្រោះអាស្រ័យលើសក្តានុពលដ៏សម្បូរបែបនៃបេតិកភណ្ឌវប្បធម៌ ប្រវត្តិសាស្ត្រ និងធនធានធម្មជាតិ»។
រដ្ឋាភិបាលកម្ពុជារំពឹងថា នឹងបើកទេសចរណ៍ជាបណ្តើរៗក្នុងត្រីមាសទី៤ ឆ្នាំ ២០២១ ដោយផ្តោតអាទិភាពការអនុវត្តគម្រោងក្នុងជំហានទី១ នៅតំបន់អង្គរនៃខេត្តសៀមរាប។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាឱ្យដឹងថា វិស័យឯកជនក្នុងវិស័យទេសចរណ៍បាននិងកំពុងត្រៀមខ្លួនរួចហើយ។
អ្នកស្រីថ្លែងថា៖ «យើងបានត្រៀមរួចហើយក្នុងការចូលរួមសហការជាមួយនឹងរដ្ឋាភិបាល ដើម្បីកសាងទំនុកចិត្តសម្រាប់ភ្ញៀវ។ យើងរង់ចាំពេលវេលានេះយូរមកហើយ។ យើងត្រូវប្រមូលផ្តុំគ្នាឡើងវិញ ដើម្បីរៀបចំសេវាកម្មយើងឡើងវិញរួមគ្នាទទួលភ្ញៀវទេសចរ»។
របាយការណ៍ក្រសួងទេសចរណ៍បានឱ្យដឹងថា កាលពីឆ្នាំ ២០២០ កម្ពុជាទទួលបានភ្ញៀវទេសចរអន្តរជាតិ ១,៣១ លាននាក់ ថយចុះ ៨០ ភាគរយ និងភ្ញៀវទេសចរផ្ទៃក្នុងប្រមាណ ៩ លាននាក់ថយចុះ ២០ ភាគរយធៀបនឹងឆ្នាំ ២០១៩៕ LA
