ភ្នំពេញ៖ រដ្ឋាភិបាល​កម្ពុជា​កំពុង​ត្រៀម​បង្កើន​សក្តានុពល​សេដ្ឋកិច្ច​របស់​ខ្លួន​តាមរយៈ​ការ​ដាក់​ចេញ​នូវ​គោល​នយោបាយ​ប្រែ​ក្លាយ​ខេត្ត​ព្រះសីហនុ ដែល​ជា​ច្រក​ដឹក​ជញ្ជូន​ទំនិញ​តាម​ផ្លូវ​សមុទ្រ​សំខាន់​ជាង​គេ​របស់​កម្ពុជា ឱ្យ​ទៅ​ជា​តំបន់​សេដ្ឋកិច្ច​ពិសេស​គំរូ​ពហុ​បំណង ដែល​អាច​ឆ្លើយ​តប​ទៅ​ការ​អភិវឌ្ឍ​លើ​គ្រប់​វិស័យ។

លោក​នាយក​រដ្ឋមន្ត្រី ហ៊ុន សែន កាល​ពី​ថ្ងៃទី ៩ ខែ​មិថុនា បាន​ចុះ​ហត្ថលេខា​លើ​អនុក្រឹត្យ​លេខ ៨២ អនក្រ.បក ស្តីពី «ការ​រៀបចំ និង​ការ​ប្រព្រឹត្ត​ទៅ​របស់​គណៈកម្មាធិការ​បច្ចេកទេស​អន្តរ​ក្រសួង​រៀបចំ​គោល​នយោបាយ​គ្រប់គ្រង និង​ប្រើប្រាស់​ដី​ធ្លី ដើម្បី​អភិវឌ្ឍ​ខេត្ត​ព្រះសីហនុ​ឱ្យ​ទៅ​ជា​តំបន់​សេដ្ឋកិច្ច​ពិសេស​គំរូ​ពហុបំណង (គ.ប.ដ.)»។

យោង​តាម​ខ្លឹមសារ​អនុក្រឹត្យ​គណៈកម្មការ​អន្តរ​ក្រសួង​សម្រាប់​រៀបចំ​គោល​នយោបាយ​គ្រប់គ្រង និង​ប្រើប្រាស់​ដីធ្លី ដើម្បី​អភិវឌ្ឍ​ខេត្ត​ព្រះសីហនុ ដែល​មាន​សមាជិក​ជា​មន្ត្រី​ជាន់​ខ្ពស់​នៅ​តាម​ក្រសួង-ស្ថាប័ន និង​អភិបាល​ខេត្ត​ព្រះសីហនុ​សរុប ២៥ រូប នេះ​មាន​តួនាទី និង​ភារកិច្ច មួយ​ចំនួន​ដូចជា ដឹកនាំ និង​សម្របសម្រួល​អន្តរ​ក្រសួង ស្ថាប័ន ក្នុង​ការ​រៀបចំ​គោល​នយោបាយ​គ្រប់គ្រង និង​ប្រើប្រាស់​ដីធ្លី ដើម្បី​អភិវឌ្ឍ​ខេត្ត​ព្រះសីហនុ​ទៅ​ជា​តំបន់​សេដ្ឋកិច្ច​ពិសេស​គំរូ​ពហុ​បំណង, ផ្តល់​ការ​ណែនាំ​ជា​យុទ្ធសាស្ត្រ និង​បច្ចេកទេស​ក្នុង​ការ​រៀបចំ​គោល​នយោបាយ​គ្រប់គ្រង និង​ប្រើប្រាស់​ដី​ធ្លី ដើម្បី​អភិវឌ្ឍ​ខេត្ត​ព្រះសីហនុ, តាមដាន និង​ត្រួត​ពិនិត្យ​វឌ្ឍនភាព​នៃ​ការ​រៀបចំ​គោល​នយោបាយ, រៀបចំ​របាយការណ៍​ស្តីពី​វឌ្ឍនភាព​នៃ​ការ​រៀបចំ​គោល​នយោបាយ​គ្រប់គ្រង និង​ប្រើប្រាស់​ដីធ្លី ជូន​ក្រុម​ប្រឹក្សា​រៀបចំ​ផែនការ​មេ និង​ធ្វើ​កិច្ច​សហប្រតិបត្តិការ​បច្ចេកទេស និង​ហិរញ្ញវត្ថុ​ជាមួយ​ដៃគូ​អភិវឌ្ឍ​ជាតិ និង​អន្តរជាតិ។

លោក ឃាង ភារម្យ អ្នក​នាំពាក្យ​រដ្ឋបាល​ខេត្ត​ព្រះសីហនុ​បាន​ថ្លែង​ថា តាម​ពិត​ទៅ​កន្លង​មក រដ្ឋាភិបាល​បាន​កំណត់​ខេត្ត​ព្រះសីហនុ ជា​ប៉ូល​សេដ្ឋកិច្ច​ពិសេស​ពហុបំណង​រួច​ហើយ។ ការ​កំណត់​នេះ គឺ​មាន​យន្តការ​ក្នុង​ការ​អនុវត្ត​តែ​ប៉ុណ្ណោះ។

អនុ​ក្រឹត្យ​នេះ កើត​ឡើង​ស្រប​ពេល​ដែល​កំពង់ផែ​ស្វយ័ត​ក្រុង​ព្រះសីហនុ បាន​និង​កំពុង​ខិតខំ​ពង្រីក​សក្តានុពល​របស់​ខ្លួន​តាមរយៈ​គម្រោង​សាងសង់​កំពង់ផែ​កុងតឺន័រ​ថ្មី​ដែល​មាន​ប្រវែង ៣៥០ ម៉ែត្រ និង​ជម្រៅ​ទឹក ១៤,៥ ម៉ែត្រ។ កំពង់ផែ​ថ្មី​នេះ នឹង​អនុញ្ញាត​ឱ្យ​នាវា​ធំ​លំដាប់​អន្តរជាតិ ដែល​មាន​សមត្ថភាព​ផ្ទុក​កុងតឺន័រ​ចំនួន ៦០,០០០ DWT (៥០០០ TEUs) ចូល​ចត​បាន។

តាម​ផែនការ​កំពង់ផែ​នេះ នឹង​ចាប់​ផ្តើម​សាងសង់​នៅ​ដើម​ឆ្នាំ ២០២២ ខាង​មុខ ដោយ​គ្រោង​បញ្ចប់​នៅ​ចុង​ឆ្នាំ ២០២៤។

ប្រធាន​សមាគមភ័​ស្តុភារកម្ម​កម្ពុជា លោក ស៊ិន ចន្ធី បាន​ប្រាប់​ ភ្នំពេញ ប៉ុស្តិ៍​ថា ការ​កំណត់​គោល​នយោបាយ​ប្រើប្រាស់​ដីធ្លី​ឱ្យ​មាន​ភាព​ច្បាស់លាស់ នឹង​ជួយ​ធ្វើ​ឱ្យ​ការ​អភិវឌ្ឍ​លើ​គ្រប់​វិស័យ​មាន​ភាព​ឆាប់​រហ័ស និង​អាច​មាន​ទីតាំង​គ្រោង​សម្រាប់​ការ​ប្រើប្រាស់​រយៈពេល​យូរ​ផង​ដែរ។ លោក​បន្ថែម​ថា ទីតាំង​ដែល​អ្នក​វិនិយោគ​ចូល​ចិត្ត គឺ​ជា​កន្លែង​ដែល​មាន​ភាព​អំណោយ​ផល​សម្រាប់​ការ​ដឹក​ជញ្ជូន ពិសេស​ផ្លូវ​ទឹក ដែល​ជា​មធ្យោបាយ​ដឹក​ជញ្ជូន​លក្ខណៈ​អន្តរជាតិ​ដ៏​ពេញ​និយម និង​មាន​តម្លៃ​ថោក។

យោង​តាម​លោក ចន្ធី បច្ចុប្បន្ន​ទំនិញ​កម្ពុជា​ដែល​ត្រូវ​នាំចេញ​ទីផ្សារ​អន្តរ​ជាតិ គឺ​មាន​ប្រមាណ​ជិត ៨០ ភាគរយ ត្រូវ​ឆ្លង​កាត់​តាម​កំពង់ផែ​ស្វយ័ត​ក្រុង​ព្រះសីហនុ៕