ទិដ្ឋភាពខេត្តព្រះសីហនុថតពីលើអាកាស។ រូបថត រ៉ាស់ហ៊ីម
ភ្នំពេញៈ រាជរដ្ឋាភិបាលកម្ពុជាកំពុងត្រៀមបង្កើនសក្តានុពលសេដ្ឋកិច្ចរបស់ខ្លួនតាមរយៈការដាក់ចេញនូវគោលនយោបាយប្រែក្លាយខេត្តព្រះសីហនុដែលជាច្រកដឹកជញ្ជូនទំនិញតាមផ្លូវសមុទ្រសំខាន់ជាងគេរបស់ប្រទេសកម្ពុជា ឱ្យក្លាយទៅជាតំបន់សេដ្ឋកិច្ចពិសេសគំរូពហុបំណងដែលអាចឆ្លើយតបទៅការអភិវឌ្ឍលើគ្រប់វិស័យ។
លោកនាយករដ្ឋមន្ត្រី ហ៊ុន សែន កាលពីថ្ងៃទី ៩ មិថុនា បានចុះហត្ថលេខាលើអនុក្រឹត្យលេខ ៨២ អនក្រ.បក ស្តីពី «ការរៀបចំ និងការប្រព្រឹត្តទៅរបស់គណៈកម្មាធិការបច្ចេកទេសអន្តរក្រសួងរៀបចំគោលនយោបាយគ្រប់គ្រង និងប្រើប្រាស់ដីធ្លី ដើម្បីអភិវឌ្ឍខេត្តព្រះសីហនុឱ្យទៅជាតំបន់សេដ្ឋកិច្ចពិសេសគំរូពហុបំណង (គ.ប.ដ.)»។
យោងតាមខ្លឹមសារអនុក្រឹត្យ គណៈកម្មការអន្តរក្រសួងដែលមានសមាជិកជាមន្ត្រីជាន់ខ្ពស់នៅតាមក្រសួងស្ថាប័ន និងអភិបាលខេត្តព្រះសីហនុសរុប ២៥ រូបនេះមានតួនាទី និងភារកិច្ចដូចជា ដឹកនាំ និងសម្របសម្រួលអន្តរក្រសួងស្ថាប័នក្នុងការរៀបចំគោលនយោបាយគ្រប់គ្រង និងប្រើប្រាស់ដីធ្លី ដើម្បីអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង, ផ្តល់ការណែនាំជាយុទ្ធសាស្ត្រ និងបច្ចេកទេសក្នុងការរៀបចំគោលនយោបាយគ្រប់គ្រង និងប្រើប្រាស់ដីធ្លី ដើម្បីអភិវឌ្ឍខេត្តព្រះសីហនុ, តាមដាន និងត្រួតពិនិត្យវឌ្ឍនភាពនៃការរៀបចំគោលនយោបាយ, រៀបចំរបាយការណ៍ពីវឌ្ឍនភាពនៃការរៀបចំគោលនយោបាយគ្រប់គ្រង និងប្រើប្រាស់ដីធ្លី ជូនក្រុមប្រឹក្សារៀបចំផែនការមេ និងធ្វើកិច្ចសហប្រតិបត្តិការបច្ចេកទេស និងហិរញ្ញវត្ថុជាមួយដៃគូអភិវឌ្ឍន៍ជាតិ និងអន្តរជាតិ។
ប្រធានសមាគមភ័ស្តុភារកម្មកម្ពុជាលោក ស៊ិន ចន្ធី បានប្រាប់ភ្នំពេញប៉ុស្តិ៍ថា ការកំណត់គោលនយោបាយប្រើប្រាស់ដីឱ្យមានភាពច្បាស់លាស់នឹងជួយធ្វើឱ្យការអភិវឌ្ឍលើគ្រប់វិស័យមានភាពឆាប់រហ័ស និងអាចមានទីតាំងបម្រុងសម្រាប់ការប្រើប្រាស់រយៈពេលយូរអង្វែង។ លោកបន្ថែមថា ទីតាំងដែលអ្នកវិនិយោគចូលចិត្ត គឺជាកន្លែងដែលមានភាពអំណោយផលសម្រាប់ការដឹកជញ្ជូនផ្លូវទឹក ដែលជាមធ្យោបាយដឹកជញ្ជូនលក្ខណៈអន្តរជាតិពេញនិយម និងមានតម្លៃថោក។
លោក ចន្ធី បាននិយាយថា៖ «បច្ចុប្បន្នទំនិញកម្ពុជាដែលត្រូវនាំចេញទីផ្សារអន្តរជាតិ គឺមានប្រមាណជិត ៨០ ភាគរយត្រូវឆ្លងកាត់តាមកំពង់ផែស្វយ័តក្រុងព្រះសីហនុ»។
អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) លោក ហុង វណ្ណៈ បានប្រាប់ថា ការគ្រប់គ្រងដីធ្លីឱ្យមានប្រសិទ្ធភាព គឺជាចំណែកមួយដែលនឹងជួយពង្រឹងជំនឿចិត្តរបស់វិនិយោគិនក្នុងខេត្តព្រះសីហនុ ព្រោះបញ្ហានេះវាមិនត្រឹមតែជាបញ្ហាសង្គមនោះទេ ប៉ុន្តែជាបញ្ហាសេដ្ឋកិច្ចផងដែរ។ វិនិយោគិនល្អ តែងចង់ទៅបណ្តាក់ទុននៅកន្លែងដែលមានការគ្រប់គ្រងដីធ្លី និងមានច្បាប់ច្បាស់លាស់។
លោកលើកឡើងថា៖ «ទោះអនុក្រឹត្យនេះមិនបានសំដៅផ្ទាល់ទៅដល់ការជំរុញកំណើនសេដ្ឋកិច្ច ប៉ុន្តែការរៀបចំ និងការគ្រប់គ្រងតំបន់មួយឱ្យមានសណ្តាប់ធ្នាប់ និងមានផែនការប្រើប្រាស់ដីធ្លីច្បាស់លាស់ គឺពិតជាសំខាន់សម្រាប់ការដាក់ផែនការវិនិយោគ»។
អនុក្រឹត្យនេះកើតឡើងស្របពេលដែលកំពង់ផែស្វយ័តក្រុងព្រះសីហនុបាននិងកំពុងខិតខំពង្រីកសក្តានុពលរបស់ខ្លួនតាមរយៈគម្រោងសាងសង់កំពង់ផែកុងតឺន័រថ្មីដែលមានប្រវែង ៣៥០ ម៉ែត្រ និងជម្រៅទឹក ១៤,៥ ម៉ែត្រ។ កំពង់ផែថ្មីនេះនឹងអនុញ្ញាតឱ្យនាវាធំលំដាប់អន្តរជាតិ ដែលមានសមត្ថភាពផ្ទុកកុងតឺន័រចំនួន ៦០ ០០០ DWT (៥ ០០០ TEUs) ចូលចតបាន។
លោក លូ គឹមឈន់ ប្រធានអគ្គនាយកកំពង់ផែស្វយ័តក្រុងព្រះសីហនុបានប្រាប់ ភ្នំពេញ ប៉ុស្តិ៍ កាលពីខែមេសាថា កំពង់ផែក្រុងព្រះសីហនុ កំពុងត្រៀមចាប់ផ្តើមសង់កំពង់ផែកុងតឺន័រថ្មី ១ នៅដើមឆ្នាំ ២០២២ ខាងមុខ ដោយគ្រោងបញ្ចប់នៅចុងឆ្នាំ ២០២៤។
ការអភិវឌ្ឍកំពង់ផែក្រុងព្រះសីហនុឱ្យមានទំហំធំ និងជម្រៅទឹកកាន់តែជ្រៅនឹងជួយឱ្យកម្ពុជាមានសមត្ថភាពទទួលបានការចូលចតរបស់នាវាលំដាប់អន្តរជាតិដោយផ្ទាល់កាន់តែច្រើន ខណៈបច្ចុប្បន្នការដឹកទំនិញធំៗតាមផ្លូវទឹក កម្ពុជាត្រូវពឹងផ្អែកលើកំពង់ផែប្រទេសក្នុងតំបន់។
លោកបន្ថែមថា៖ «ខ្ញុំយល់ថា នៅពេលកម្ពុជាមានផែទឹកជ្រៅនឹងមាននាវាធំៗចូលចតកាន់តែច្រើន ដែលវានឹងជួយធ្វើឱ្យថ្លៃដឹកជញ្ជូនទំនិញតាមសមុទ្រចុះថ្លៃ និងចំណាយពេលតិចព្រមទាំងចូលរួមបង្កើនភាពប្រកួតប្រជែងសម្រាប់កម្ពុជាផងដែរ»។
ទាក់ទងនឹងការឆ្លងរាលដាលជំងឺកូវីដ ១៩ លោក គឹមឈន់ បានប្រាប់ថា ការផ្ទុះជំងឺកូវីដ ១៩ បានបង្កឱ្យមានផលប៉ះពាល់មួយចំនួនដល់អាជីវកម្មរបស់កំពង់ផែស្វយ័តក្រុងព្រះសីហនុ។
អភិបាលខេត្តព្រះសីហនុលោក គួច ចំរើន ធ្លាប់និយាយថា ខេត្តព្រះសីហនុ គឺជាខេត្តតំបន់ឆ្នេរមួយដែលមានការអភិវឌ្ឍលើគ្រប់វិស័យ ទាំងហេដ្ឋារចនាសម្ព័ន្ធផ្លូវថ្នល់ ភ្លើងបំភ្លឺផ្លូវ និងសំណង់អគារតូច ធំ ក៏ដូចជានៅតាមតំបន់ទេសចរណ៍នានា។ មួយវិញទៀតខេត្តនេះក៏សម្បូររមណីយដ្ឋានទេសចរណ៍ ដើម្បីឱ្យភ្ញៀវមកទស្សនា និងលេងកម្សាន្តផងដែរ។
លោកថ្លែងថា៖ «ទោះបីកម្ពុជា និងពិភពលោកព្រួយបារម្ភពីជំងឺកូវីដ ១៩ ប៉ុន្តែចំពោះការវិនិយោគនៅប្រទេសកម្ពុជា ក៏ដូចជាក្នុងខេត្តព្រះសីហនុ នៅតែមានសកម្មភាពជាបន្តបន្ទាប់»។
លោក គួច ចំរើន ក្នុងសន្និសីទសារព័ត៌មានកន្លងមកបានឱ្យដឹងថា គិតពីឆ្នាំ ១៩៩៤ រហូតដល់ពាក់កណ្តាលឆ្នាំ ២០២០ ខេត្តព្រះសីហនុមានក្រុមហ៊ុនចំនួន ២០ បានមកវិនិយោគលើគម្រោងអភិវឌ្ឍន៍លើកោះ និងឆ្នេរសមុទ្រ នៅលើផ្ទៃដីសរុប ១១ ៦៣៧ ហិកតា ដោយមានទុនវិនិយោគសរុបជាង ៣,៩ ពាន់លានដុល្លារ៕ LA
