.jpg)
ការបង្ហាញពីរបៀបប្រើអំពូលពន្លឺព្រះអាទិត្យខ្នាតតូចដោយកម្មវិធី «Switch To Solar»។ រូបថត PIN
ភ្នំពេញៈ សហភាពអឺរ៉ុប និងទីភ្នាក់ងារអភិវឌ្ឍន៍ឆែកបានដាក់ឱ្យដំណើរការកម្មវិធី SWITCH ដល់គម្រោងសូឡា ដោយមានបំណងគាំទ្រកំណើនសេដ្ឋកិច្ចប្រកបដោយនិរន្តរភាព និងបរិយាប័ន្ន នៅតាមតំបន់ជនបទនៅក្នុងប្រទេសកម្ពុជា។ នេះបើយោងតាមសេចក្ដីប្រកាសព័ត៌មាន។
តាមរយៈគម្រោងអភិវឌ្ឍន៍លើកកម្ពស់ការប្រើប្រាស់ថាមពលកកើតឡើងវិញនេះ សហភាពអឺរ៉ុប (EU) រួមចំណែកផ្ដល់ មូលនិធិ ២,៥៦ លានអឺរ៉ូ ហើយគម្រោងនេះត្រូវអនុវត្តរយៈពេល ៤ ឆ្នាំចាប់ពីឆ្នាំ ២០២០ ដល់ឆ្នាំ ២០២៤។
ទិសដៅរបស់គម្រោងនេះគឺជំរុញសហគ្រាសធុនតូច មធ្យម និងមីក្រូសហគ្រាសឱ្យផ្លាស់ប្តូរពីការប្រើប្រាស់ថាមពលដែលមិនមាននិរន្តរភាព ទៅប្រើប្រាស់ថាមពលកកើតឡើងវិញមាននិរន្តរភាពគឺ «សូឡា» ហើយដើម្បីជួយកែលម្អទម្លាប់អតិថិជននៅតាមតំបន់ជនបទរបស់ប្រទេសកម្ពុជា។
លោកស្រី Darina Vlckova មកពីទីភ្នាក់ងារអភិវឌ្ឍន៍ឆែក ដែលទទួលបន្ទុកជំនួយគាំទ្រសម្រាប់គម្រោងត្រីភាគីនេះបានកត់សម្គាល់ថា គម្រោងនេះនឹងជួយកម្ពុជាសម្រេចទិសដៅរបស់ខ្លួនសម្រាប់ ផែនការសកម្មភាពកិច្ចសហប្រតិបត្តិការថាមពលអាស៊ានឆ្នាំ ២០១៦-២០២៥ ដែលបណ្ដាប្រទេសអាស៊ានមានគោលបំណងក្នុងការសម្រេចបានចំណែកកាន់តែខ្ពស់ជារួមនៃថាមពលកកើតឡើងវិញ។
លោកស្រី Darina Vlckova បានថ្លែងថា៖ «គម្រោងនេះភាគច្រើនផ្ដោតការយកចិត្តទុកដាក់លើការបង្កើនសមត្ថភាពក្នុងស្រុកតាមរយៈការបណ្ដុះបណ្ដាល ឬការផ្ដល់ជំនួយឧបត្ថម្ភចាំបាច់ ព្រមទាំងការគាំទ្រទំនាក់ទំនងរវាងតួអង្គពាក់ព័ន្ធនៅក្នុងវិស័យនេះ ដូចជាក្រុមហ៊ុនផ្គត់ផ្គង់ថាមពលសូឡា អតិថិជន និងគ្រឹះស្ថានហិរញ្ញវត្ថុ»។
គម្រោង «Switch to Solar» នឹងអនុវត្តវិធីសាស្ដ្រជាប្រព័ន្ធដើម្បីអភិវឌ្ឍទីផ្សារតាមរយៈការជំរុញតម្រូវការ និងគាំទ្រការអភិវឌ្ឍចង្វាក់ផ្គត់ផ្គង់របស់ក្រុមហ៊ុនផ្គត់ផ្គង់ថាមពលសូឡា។
លោក Hugo Agostinho នាយកគ្រប់គ្រងកម្មវិធីគ្រប់គ្រងថាមពលស្អាត និងធនធានធម្មជាតិនៅក្នុង People in Need ដែលដឹកនាំការអនុវត្តគម្រោងនេះ បានលើកឡើងថា៖ «ខ្ញុំជឿជាក់ថា គម្រោងនេះនឹងរួមចំណែកដ៏សំខាន់ដល់ឯករាជភាពសេដ្ឋកិច្ច និងកែលម្អលក្ខខណ្ឌរស់នៅរបស់ប្រជាជនក្នុងតំបន់ជនបទ។ បច្ចុប្បន្នសូឡាគឺជាបច្ចេកវិទ្យាមួយក្នុងចំណោមបច្ចេកវិទ្យាថាមពលកកើតឡើងវិញដែលប្រើប្រាស់ងាយស្រួល និងរីកចម្រើន»។
ក្នុងអំឡុងរយៈពេល ៤ ឆ្នាំនៃគម្រោងនេះ សិក្ខាសាលា ៤ ត្រូវបានគ្រោងធ្វើឡើងដែលអ្នកជំនាញខាងកសិកម្ម និងនេសាទនឹងធ្វើជាអ្នកឧទ្ទេសនាមដល់សហគមន៍មូលដ្ឋាន និងបង្ហាញបញ្ហាប្រឈម និងដំណោះស្រាយដែលអាចធ្វើបានជាប់ទាក់ទងនឹងការប្រើប្រាស់បច្ចេកវិទ្យាផលិតថាមពលស្អាត «បៃតង»៕LA
