គ្រាប់ស្វាយចន្ទី ដែលមិនទាន់បានកែច្នៃ។ ហុង មិនា
ភ្នំពេញៈ សិប្បកម្មកែច្នៃគ្រាប់ស្វាយចន្ទីជ័យ សំបូរ ក្រោមកិច្ចសហការជាមួយក្រុមហ៊ុន Top Planning Japan (TPJ) កំពុងសិក្សាពីលទ្ធភាពបង្កើនសមត្ថភាពផលិតកម្មរបស់ខ្លួនឱ្យដល់ ២០ តោនក្នុង ១ ខែ ដើម្បីឈានទៅនាំចេញគ្រាប់ស្វាយចន្ទីទៅទីផ្សារអន្តរជាតិឱ្យបានកាន់តែច្រើន បន្ទាប់ពីបានទទួលជោគជ័យលើការនាំទៅប្រទេសជប៉ុនចំនួន ២ លើករួចមក។ នេះបើតាម លោកស្រី អិន ឡៃហួត ម្ចាស់សិប្បកម្មកែច្នៃគ្រាប់ស្វាយចន្ទី ជ័យ សំបូរ។
ម្ចាស់សិប្បកម្មកែច្នៃគ្រាប់ស្វាយចន្ទី ជ័យ សំបូរ លោកស្រី អិន ឡៃហួត បានប្រាប់ភ្នំពេញប៉ុស្តិ៍កាលពីថ្ងៃទី ១៤ ខែមិថុនាថា សិប្បកម្មលោកស្រីកំពុងធ្វើការសិក្សាពីលទ្ធភាព និងស្វែងរកថវិកាមួយចំនួនមកពង្រីកចង្វាក់ផលិតកម្ម ដើម្បីត្រៀមឆ្លើយតបនឹងកំណើនតម្រូវការ បន្ទាប់ពីវិបត្តិសុខភាពកូវីដ ១៩ បញ្ចប់ទៅវិញ។
លោកស្រីបានបន្តថា បច្ចុប្បន្នក្រៅពីផលិតសម្រាប់ផ្គត់ផ្គង់ទីផ្សារប្រទេសជប៉ុន សិប្បកម្មកែច្នៃគ្រាប់ស្វាយចន្ទី ជ័យ សំបូរ ក៏បានចែកចាយនៅទីផ្សារក្នុងស្រុកមួយចំនួនដូចជា សហករណ៍សរីរាង្គខ្មែរ លក់ ដុំ លក់រាយជូនអតិថិជនទៅតាមបណ្តាខេត្ត និងតំបន់ទេសចរណ៍ប្រាសាទសំបូរព្រៃគុក ជាដើម។
លោកស្រីបញ្ជាក់ថា៖ «ខ្ញុំមិនទាន់អាចប្រាប់ថា ផែនការបង្កើតសមត្ថភាពផលិតឱ្យបាន ២០ តោននឹងចេញជារូបរាងនៅពេលណាទេ ព្រោះយើងមិនទាន់មានទុនគ្រប់គ្រាន់»។
នាពេលថ្មីៗនេះ លោកស្រី ឡៃហ៊ួត បានលើកឡើងថា វិបត្តិនៃការឆ្លងរាលដាលជំងឺកូវីដ ១៩ បានធ្វើឱ្យការបញ្ជាទិញធ្លាក់ចុះមួយកម្រិត។ គិតមកដល់ពេលនេះ សិប្បកម្មកែច្នៃគ្រាប់ស្វាយចន្ទីជ័យ សំបូរ ទើបបានបញ្ជូនគ្រាប់ស្វាយចន្ទីចំនួន ២ លើកប៉ុណ្ណោះទៅឱ្យក្រុមហ៊ុន TPJ ដោយលើកទី ១ កាលពីខែឧសភា ចំនួន ៧ តោន និងលើកទី ២ កាលពីថ្ងៃទី ១៣ ខែមិថុនា ចំនួន ៩ តោន។
លោក គង់ ភាជ ប្រធាននាយកដ្ឋានកសិឧស្សាហកម្មនៃក្រសួងកសិកម្ម រុក្ខាប្រមាញ់ និងនេសាទនិយាយថាផែនការពង្រីកសមត្ថភាពផលិតរបស់សិប្បកម្មនេះ គឺមិនត្រឹមតែដើរស្របនឹងគោលនយោបាយរបស់រដ្ឋាភិបាលកម្ពុជាក្នុងការលើកកម្ពស់ឧត្តមភាពផលិតផលកសិកម្មក្នុងចំណែកនៃការនាំចេញសរុបរបស់កម្ពុជាប៉ុណ្ណោះទេ ប៉ុន្តែថែមទាំងជួយបង្កើតការងារថ្មីៗ ក៏ដូចជាអាចទាញយកតម្លៃបន្ថែមពីការផលិត និងកាត់បន្ថយការនាំចេញវត្ថុធាតុដើមផងដែរ។
លោកអះអាងថា៖ «គ្រាប់ស្វាយចន្ទីកែច្នៃ គឺជាទំនិញមានសក្តានុពលខ្ពស់សម្រាប់នាំចេញទៅប្រទេសជាច្រើនលើពិភពលោក។ តាមខ្ញុំដឹង បច្ចុប្បន្នមានក្រុមហ៊ុនជាច្រើនកំពុងចង់បានគ្រាប់ស្វាយចន្ទីកែច្នៃរួចរបស់កម្ពុជា។ យើងពិតជាស្វាគមន៍ចំពោះផែនការពង្រីកសមត្ថភាពផលិតនេះ»។
នៅកម្ពុជាសព្វថ្ងៃផ្ទៃដីចម្ការស្វាយចន្ទីមានប្រមាណជាង ៥០ ម៉ឺនហិកតា ដោយក្នុង ១ ហិកតា អាចផ្តល់ផលជាមធ្យម ១,៥ តោន ក្នុង ១ ឆ្នាំ។ នេះបើតាមលោក គង់ ភាជ។
ក្នុងអំឡុងពេលពិនិត្យសកម្មភាពនៅសិប្បកម្មកែច្នៃគ្រាប់ស្វាយចន្ទីជ័យ សំបូរ កាលពីថ្ងៃទី ១៣ ខែមិថុនា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានលើកទឹកចិត្ត និងជំរុញឱ្យសហគមន៍ត្រូវខំស្វែងរកដៃគូឱ្យបានច្រើន ដើម្បីទទួលបានបច្ចេកទេសដាំដុះ បច្ចេកទេសកែច្នៃ និងទីផ្សារថ្មីៗបន្ថែមទៀត។
លោកថ្លែងថា៖ «នៅពេលផលិតផលមានទីផ្សារ នឹងនាំឱ្យផលិតកម្មមានការកើនឡើង ដែលនាំឱ្យមានកំណើនប្រាក់ចំណូល បង្កើតឱកាសការងារថ្មីៗ។ នេះគឺជាបំណងប្រាថ្នារបស់រាជរដ្ឋាភិបាលក្នុងគោលនយោបាយជំរុញការនាំចេញកសិផលក្នុងបរិបទនៃការរីករាលដាលជំងឺកូវីដ ១៩»។
របាយការណ៍ក្រសួងកសិកម្ម រុក្ខាប្រមាញ់ និងនេសាទឱ្យដឹងថា ក្នុងឆ្នាំ ២០២០ កម្ពុជានាំចេញគ្រាប់ស្វាយចន្ទីបាន ២១៨ ៩៨១ តោនកើនឡើង ៨,២៤ ភាគរយពីចំនួន ២០២ ៣១៨ តោនក្នុងឆ្នាំ ២០១៩។ គ្រាប់ស្វាយចន្ទីត្រូវបាននាំទៅប្រទេសវៀតណាម ជប៉ុន រុស្ស៊ី ចិន ហុងកុង ថៃ បារាំង កូរ៉េខាងត្បូង បង់ក្លាដែស ម៉ាឡេស៊ី ហូឡង់ តួកគី និងឡាវ៕ LA
