.jpg)
អតិថិជនកម្ម៉ង់ទិញទំនិញតាមប្រព័ន្ធអនឡាញ នាពេលកន្លងទៅ។ ហុង មិនា
ភ្នំពេញៈ ជាមួយនឹងការអភិវឌ្ឍដ៏ឆាប់រហ័សនៃបច្ចេកវិទ្យា និងនវានុវត្តន៍ ប្រទេសកម្ពុជាទទួលបានចំណូលជិតកន្លះពាន់លានដុល្លារអាមេរិកពីអាជីវកម្មបចេ្ចកវិទ្យា និងឌីជីថលកាលពីឆ្នាំ ២០១៩។ នេះបើយោងតាមរបាយការណ៍ថ្មីបំផុតពីធនាគារអភិវឌ្ឍន៍អាស៊ី (ADB) ដែលចេញផ្សាយកាលពីចុងខែឧសភា។
របាយការណ៍សមាហរណកម្មសេដ្ឋកិច្ចអាស៊ីឆ្នាំ ២០២១ របស់ ADB អំពី «ការធ្វើឱ្យដំណើរការវេទិកាឌីជីថលសម្រាប់អាស៊ី» បានបង្ហាញថា ប្រាក់ចំណូលឌីជីថលនៅកម្ពុជាកាលពីឆ្នាំ ២០១៩ មានចំនួនសរុប ៤៧០ លានដុល្លារ។ បើគិតតាមវិស័យ ពាណិជ្ជកម្មអេឡិចត្រូនិកមានចំនួន ២៧,៦ ភាគរយ សេវាកម្មអេឡិចត្រូនិក មាន ៧,៨ ភាគរយ ប្រព័ន្ធព័ត៌មានឌីជីថល ១០,២ ភាគរយ បច្ចេកវិទ្យាផ្សព្វផ្សាយពាណិជ្ជកម្ម (AdTech) ១២,៧ ភាគរយ ការដឹកជញ្ជូន ៣,៨ ភាគរយ និងការធ្វើដំណើរអនឡាញ ៣៧,៩ ភាគរយ។
លោក Yasuyuki Sawada ប្រធានសេដ្ឋវិទូជាន់ខ្ពស់របស់ ADB បានឱ្យដឹងក្នុងអំឡុងពេលសិក្ខាសាលារបស់ ADB និងក្រសួងសេដ្ឋកិច្ច និងហិរញ្ញវត្ថុ ស្ដីពី «វេទិកាឌីជីថល និងការស្ទុះងើបឡើងវិញនៃសេដ្ឋកិច្ចក្រោយកូវីដ ១៩ របស់ប្រទេសកម្ពុជា» កាលពីថ្ងៃទី ២៨ ឧសភា តាមប្រព័ន្ធវីដេអូថា អំណាចកុំព្យូទ័រដែលកើនឡើង និងលទ្ធភាពទទួលបានឧបករណ៍វៃឆ្លាតតម្លៃសមរម្យ បាននាំយកបចេ្ចកវិទ្យាឌីជីថលទៅក្នុងដៃរបស់ប្រជាជនកាន់តែច្រើនឡើងៗ។
លោកថ្លែងថា៖ «កំណើនការប្រើប្រាស់កម្មវិធីឌីជីថលទាំងនេះត្រូវបានរំពឹងថា នឹងបន្តនៅឆ្នាំនេះ និងក្នុងរយៈពេលច្រើនឆ្នាំទៅខាងមុខ។ ដោយពឹងផ្អែកលើការសិក្សាពេលថ្មីៗ ប្រសិនបើវិស័យនានាកើនឡើង ២០ ភាគរយធៀបនឹងមូលដ្ឋានគ្រឹះឆ្នាំ ២០២០ ទៅដល់ឆ្នាំ ២០២៥ ទិន្នផលពិភពលោកនឹងកើនឡើង ៤,៣ ពាន់ពាន់លានដុល្លារប្រចាំឆ្នាំ ទិន្នផលរបស់អាស៊ី ១,៧ ពាន់ពាន់លានដុល្លារប្រចាំឆ្នាំ»។
លោក ហួត ពុំ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានឱ្យដឹងនៅក្នុងអំឡុងសិក្ខាសាលានោះថា រដ្ឋាភិបាលកំពុងតែរៀបចំក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលដែលនឹងដាក់ឱ្យដំណើរការក្នុងរយៈពេលដ៏ខ្លីខាងមុខនេះ ដើម្បីផ្ដល់ទិសដៅគោលនយោបាយកាន់តែច្បាស់លាស់សម្រាប់ប្រទេសកម្ពុជា ក្នុងការធ្វើឱ្យមានលក្ខណៈឌីជីថលដល់សេដ្ឋកិច្ច និងសង្គម និងត្រូវប្រើប្រាស់ជាយុទ្ធសាស្ដ្រដ៏សំខាន់សម្រាប់ការស្ទុះងើបឡើងវិញនៃសេដ្ឋកិច្ច បន្ទាប់ពីវិបត្តិជំងឺកូវីដ ១៩។
លោកលើកឡើងថា៖ «ស្ថិតក្រោមក្របខ័ណ្ឌគោលនយោបាយនេះ ទិន្នន័យ និងកម្មវិធីឌីជីថលមានសារៈសំខាន់ក្នុងការទទួលយក និងប្រើប្រាស់បច្ចេកវិទ្យាទំនើប។ តាមន័យនេះភាគីពាក់ព័ន្ធសំខាន់ៗដែលរួមមានរដ្ឋាភិបាល និងវិស័យឯកជនត្រូវតម្រូវឱ្យធ្វើការងារជាមួយគ្នា ដើម្បីផ្ដួចផ្ដើម និងអភិវឌ្ឍកម្មវិធីឌីជីថល ដែលរួមបញ្ចូលគ្នា និងសហការបង្កើតផលិតផល និងសេវាកម្មឌីជីថលដើម្បីបម្រើប្រជាជន»។
លោកបន្តទៀតថា ក្រៅពីនេះដើម្បីជំរុញ និងបង្កើនល្បឿនការទទួលយកឌីជីថលនៅក្នុងចំណោមប្រជាជនតាមរយៈការទទួលបានសេវាកម្មសាធារណៈកាន់តែទូលំទូលាយ រដ្ឋាភិបាលនឹងដឹកនាំក្នុងការបង្កើតកម្មវិធីឌីជីថលរដ្ឋ ដោយលើកកម្ពស់មាតិកាឌីជីថល និងធ្វើពិពិធកម្មកម្មវិធី។
ជាផ្នែកមួយនៃយុទ្ធសាស្ដ្រនៃការស្ទុះងើបឡើងវិញរហ័ស លោកបន្តថា កម្មវិធីឌីជីថលសំខាន់ៗមួយចំនួន និងហេដ្ឋារចនាសម្ព័ន្ធត្រូវបានដាក់ឱ្យប្រើប្រាស់រួចហើយ ជាពិសេសកម្មវិធីការផ្លាស់ប្តូរទិន្នន័យកម្ពុជារបស់ក្រសួងសេដ្ឋកិច្ច និងហិរញ្ញវត្ថុនឹងក្លាយទៅជាផ្លេតហ្វមមូលដ្ឋានដែលផ្ដល់ការចុះបញ្ជីអាជីវកម្មអនឡាញ ខណៈច្រកទ្វារទូទាត់ជាតិ ដែលជាការទូទាត់ឌីជីថល និងគម្រោងបាគង រូបិយប័ណ្ណឌីជីថលធនាគារកណ្ដាល (CBDC) ព្រមទាំងគំនិតផ្ដួចផ្ដើមផ្សេងៗទៀតដូចជាការចុះហត្ថលេខា និងអត្តសញ្ញាឌីជីថលជាដើម។
លោក ពុំ បន្ថែមថា៖ «កម្ពុជាមានសុទិដិ្ឋនិយមថា ការធ្វើឱ្យមានលក្ខណៈឌីជីថល និងព័ត៌មានឌីជីថលនឹងជំរុញភាពធន់ និងការអភិវឌ្ឍសេដ្ឋកិច្ចបរិយាប័ន្ននៅក្នុងបរិបទការស្ទុះងើបឡើងវិញក្រោយជំងឺកូវីដ ១៩។ ភាពជោគជ័យនៃការផ្លាស់ប្តូរនេះនឹងទាមទារឱ្យមានការគាំទ្រដ៏ពេញទំហឹង និងការសហការពីភាគីពាក់ព័ន្ធទាំងអស់»។
កាលពីដើមខែមិថុនា រដ្ឋាភិបាលបានដាក់ឱ្យដំណើរការក្របខ័ណ្ឌគោលនយោបាយរយៈពេល ១៥ ឆ្នាំ សម្រាប់បរិស្ថានសេដ្ឋកិច្ចសង្គមឌីជីថលដែលជាការវិវត្តមួយរបស់កម្ពុជា។ ក្របខ័ណ្ឌសេដ្ឋកិច្ចឌីជីថល និងគោលនយោបាយសង្គមរបស់កម្ពុជាឆ្នាំ ២០២១-២០៣៥ ត្រូវរំពឹងថានឹងបញ្ចូលសម្ទុះថ្មីៗក្នុងវិស័យព័ត៌មាន និងព័ត៌មានបចេ្ចកវិទ្យា (ICT) របស់កម្ពុជា និងក្រឹតល្បឿននៃការអភិវឌ្ឍរបស់ខ្លួន ដើម្បីផ្លោះដំណាក់កាលទៅសម័យឌីជីថល។
ទិន្នន័យថ្មីបំផុតពីនិយតករទូរគមនាគមន៍កម្ពុជាឱ្យដឹងថា គិតត្រឹមខែឧសភា ឆ្នាំ ២០២០ ចំនួននៃការជាវទូរស័ព្ទចល័តរបស់ប្រតិបត្តិករទាំង ៦ មានចំនួន ២០ ៤៨១ ០៥១។
ជាមួយគ្នានេះដែរ ចំនួនការជាវអ៊ីនធឺណិតខ្សែ និងលើតុមាន ៥២ ៤៨០ និងចំនួនការជាវអ៊ីនធឺណិតចល័តនៅក្នុងក្រុមហ៊ុនផ្គត់ផ្គង់សេវាទាំង ៧ បានកត់ត្រាចំនួន ២,៣៦ ភាគរយធ្លាក់ចុះមកនៅត្រឹម ១៤ ៨៦៣ ៤៣៥ ចំណែកការជាវអ៊ីនធឺណិតនៅក្រុមហ៊ុនផ្គត់ផ្គង់សេវាទាំង ៣៧ បានកត់ត្រាចំនួន ៣៣,០៧ ភាគរយ កើនដល់ ២៤៩ ១៣២៕LA
