.jpg)
សកម្មភាពលើកដាក់កុងតឺន័រទំនិញនៅកំពង់ផែក្រុងព្រះសីហនុ។ ហេង ជីវ័ន
ភ្នំពេញៈ ទឹកប្រាក់នៃការផ្លាស់ប្តូរពាណិជ្ជកម្មទ្វេភាគីកម្ពុជា និងប្រទេសកូរ៉េខាងត្បូង រយៈពេល ៥ ខែដើមឆ្នាំ ២០២១ មានប្រមាណជាង ៣០២ លានដុល្លារកើនជិត ៣ ភាគរយបើធៀបរយៈពេលដូចគ្នាឆ្នាំ ២០២០។ នេះបើយោងតាមទិន្នន័យពីក្រសួងពាណិជ្ជកម្មកម្ពុជា។
បើតាមទិន្នន័យក្នុងរយៈពេលនេះ ការធ្វើពាណិជ្ជកម្មទ្វេភាគីមានទឹកប្រាក់សរុប ៣០២,២៣១ លានដុល្លារ កើនឡើង ២,៦៦ ភាគរយពីចំនួន ២៩៤,៣៩៧ លានដុល្លារ កាលពីរយៈពេល ៥ ខែ ឆ្នាំ ២០២០។ ក្នុងនេះកម្ពុជានាំទំនិញទៅកូរ៉េមានទឹកប្រាក់ ៧៥,៣៦៩ លានដុល្លារ ធ្លាក់ចុះ ០,៤៧ ភាគរយ ចំណែកកូរ៉េនាំមកកម្ពុជាមានទឹកប្រាក់ ២២៦,៨៦១ លានដុល្លារ កើនឡើង ៣,៧៥ ភាគរយ។
ទំនិញដែលកម្ពុជានាំទៅប្រទេសកូរ៉េមានដូចជា ផលិតផលវាយនភណ្ឌ គ្រឿងផ្គុំអេឡិចត្រូនិក កៅស៊ូ និងផលិតផលកសិកម្ម រីឯផលិតផលកូរ៉េ ភាគច្រើនជាយានយន្ត គ្រឿងអេឡិចត្រូនិក សម្ភារអគ្គិសនី ភេសជ្ជៈ និងផលិតផលប្លាស្ទិក ជាដើម។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) បានប្រាប់ភ្នំពេញប៉ុស្តិ៍នៅថ្ងៃទី ១៥ ខែមិថុនាថា ទោះជាក្នុងអំឡុងពេលនៃវិបត្តិការឆ្លងរាលដាលខ្លាំងនៃជំងឺកូវីដ ១៩ ក៏សកម្មភាព និងទំហំពាណិជ្ជកម្មរវាងប្រទេសទាំង ២ មិនបានស្រកចុះ។
លោកនិយាយថា៖ «ប្រទេសទាំង ២ នៅតែមានទំនាក់ទំនងពាណិជ្ជកម្មល្អជាមួយគ្នា ហើយវានឹងកាន់តែពិសេស នៅពេលដែលកិច្ចព្រមព្រៀងពាណិជ្ជកម្មសេរីទ្វេភាគីរវាងប្រទេសទាំង ២ ចូលជាធរមាន»។
លោកបានបន្ថែមថា ខណៈកិច្ចព្រមព្រៀងពាណិជ្ជកម្មសេរីទ្វេភាគីប្រទេសទាំង ២ ត្រូវរំពឹងថា នឹងចូលជាធរមាននៅចុងឆ្នាំ ២០២១ នេះ កម្ពុជាចាំបាច់ត្រូវតែខិតខំបន្ថែមទៀត ដើម្បីធ្វើខ្លួនឱ្យក្លាយជាប្រទេសផលិត និងនាំចេញ ដោយមិនត្រឹមតែជាមួយកូរ៉េប៉ុណ្ណោះទេ ប៉ុន្តែសម្រាប់គ្រប់ទីផ្សារលើពិភពលោក។ ការធ្វើពិពិធកម្មលើផលិតផលនាំចេញទៅទីផ្សារអន្តរជាតិនឹងជួយធ្វើឱ្យកម្ពុជាអាចមានឧត្តមភាពលើការធ្វើពាណិជ្ជកម្មជាអន្តរជាតិ។
កាលពីដើមខែកុម្ភៈ ឆ្នាំ ២០២១ ភាគីកម្ពុជា និងកូរ៉េ ការប្រកាសរួមគ្នាថា ការចរចាលើលក្ខខណ្ឌផ្សេងៗនៃកិច្ចព្រមព្រៀងពាណិជ្ជកម្មសេរីកម្ពុជា និងប្រទេសកូរ៉េបានបញ្ចប់រួចរាល់ហើយ ដោយនៅរង់ចាំតែការចុះហត្ថលេខាជាផ្លូវការតែប៉ុណ្ណោះ។
ឯកអគ្គរាជទូតកម្ពុជាប្រចាំនៅកូរ៉េខាងត្បូងលោក ឡុង ឌីម៉ង់ បានប្រាប់ថា កិច្ចព្រមព្រៀងពាណិជ្ជកម្មសេរីទ្វេភាគីនឹងជំរុញឱ្យវិនិយោគិនបរទេស ពិសេសជនជាតិកូរ៉េចូលមកវិនិយោគនៅកម្ពុជា ដែលជាប្រទេសមានស្ថិរភាពនយោបាយ និងទំនាក់ទំនងការទូតល្អ មានកំណើនសេដ្ឋកិច្ចរឹងមាំ និងមានកម្លាំងពលកម្មជំនាញច្រើន និងមានតម្លៃសមរម្យ។
លោកបន្ថែមថា ក្រៅពីទទួលចំណាប់អារម្មណ៍ពីការចូលមកបណ្តាក់ទុននៅកម្ពុជាកាន់តែច្រើន បច្ចុប្បន្នរូបលោកព្រមទាំងក្រុមការងារនៅប្រទេសកូរ៉េ ក៏តែងធ្វើការផ្សព្វផ្សាយជាប្រចាំអំពីសក្តានុពលឱកាសវិនិយោគនៅកម្ពុជាផងដែរ។
លោកថ្លែងថា៖ «បន្ទាប់ពីស្ថានភាពជំងឺកូវីដ ១៩ លើពិភពលោកធូរស្រាល ការធ្វើដំណើរទេសចរណ៍ និងការចូលមកបណ្តាក់ទុនរបស់កូរ៉េនៅកម្ពុជាប្រាកដជាមានកំណើនថែមទៀត»។
ការធ្វើពាណិជ្ជកម្មទ្វេភាគីកម្ពុជា និងកូរ៉េកាលពីឆ្នាំ ២០២០ មានតម្លៃសរុប ៧២៩,១៣ លានដុល្លារ កើនឡើង ១៧,៣១ ភាគរយបើធៀបនឹងឆ្នាំ ២០១៩ ក្នុងនោះការនាំចេញរបស់កម្ពុជាមានតម្លៃ ១៨៥,០២ លានដុល្លារ កើនឡើង ១២,៦១ ភាគរយ និងកូរ៉េនាំមកកម្ពុជាមានតម្លៃ ៥៤៤,១១ លានដុល្លារ កើនឡើង ១៨,៧៩ ភាគរយ។ នេះបើយោងតាមក្រសួងពាណិជ្ជកម្មកម្ពុជា៕
