ភ្នំពេញ៖ ធនាគារ អេស៊ីលីដា ភីអិលស៊ី បានសម្រេចជាផ្លូវការក្នុងការដាក់ភាគហ៊ុន ៤ ភាគរយ ស្មើនឹង ១៧ ៣២៦ ៥២១ ភាគហ៊ុនរបស់ក្រុមហ៊ុន អេ អេស អេ ភីអិលស៊ី (ASA, Plc) ដែលជាភាគហ៊ុនិកនីតិបុគ្គលមួយរបស់ខ្លួនអាចធ្វើការជួញដូរបាននៅលើផ្សារមូលបត្រកម្ពុជា (CSX) សម្រាប់ឆ្នាំ ២០២១។
ការណ៍ដាក់ឱ្យជួញដូរភាគហ៊ុនរបស់ អេ អេស អេ ភីអិលស៊ី នៅផ្សារមូលបត្រកម្ពុជា ធ្វើឡើងប្រមាណជាជាងមួយឆ្នាំ បន្ទាប់ពីធនាគារមួយនេះបានបោះផ្សាយមូលបត្រកម្មសិទ្ធិជាផ្លូវការលើ CSX កាលពីចុងខែឧសភាឆ្នាំ ២០២០។
យោងតាមសេចក្តីជូនដំណឹងរបស់ ធនាគារ អេស៊ីលីដា កាលពីថ្ងៃ១៥ ខែមិថុនា ឆ្នាំ ២០២១ បានឱ្យដឹងថា ក្រុមហ៊ុន អេ អេស អេ ភីអិលស៊ី ដែលជាភាគហ៊ុនិកនីតិបុគ្គលមួយរបស់ធនាគារ បានធ្វើនិយ័តកម្មភាគហ៊ុនទាំងអស់ទៅឱ្យភាគហ៊ុនិកជាក់ស្តែងម្នាក់ៗ ដែលមានសមាជិកសរុបចំនួន ១១ ៤៨៨នាក់ និងមានភាគហ៊ុនសរុបចំនួន ១០៧ ២០៤ ៥៤៧ ភាគហ៊ុន ស្មើនឹងចំនួន ២៤,៧៩២ ភាគរយ នៃភាគហ៊ុនសរុបរបស់ធនាគារ ដោយអនុលោមតាមវិធានច្បាប់ និងបទប្បញ្ញត្តិពាក់ព័ន្ធរបស់និយ័តករមូលបត្រកម្ពុជា និងដោយមានការឯកភាពពីភាគហ៊ុនិកនីមួយៗនៃក្រុមហ៊ុន អេ អេស អេ ភីអិលស៊ី។
សេចក្តីជូនដំណឹងនេះបានបញ្ជាក់ថា៖ «ភាគហ៊ុនដែលបានធ្វើនិយ័តកម្មរួចរាល់នឹងត្រូវដាក់ឱ្យជួញដូរបាននៅលើផ្សារមូលបត្រកម្ពុជាត្រឹម ៤ ភាគរយ ស្មើនឹង ១៧ ៣២៦ ៥២១ ភាគហ៊ុន សម្រាប់ឆ្នាំ ២០២១។ ចំណែកភាគហ៊ុនដែលនៅសល់ចំនួន ២០,៧៤៩២ ភាគរយទៀតនឹងត្រូវអនុវត្តតាមផែនការជាបន្តបន្ទាប់»។
អេស៊ីលីដា ដែលជាធនាគារគ្រប់គ្រងដោយវិនិយោគិនក្នុងស្រុកធំជាងគេនៅកម្ពុជា បានប្រមូលនិធិប្រហែល ១៧,៥លានដុល្លារពីការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO) របស់ខ្លួននៅលើក្រុមហ៊ុនផ្សារមូលបត្រកម្ពុជា (CSX) កាលពីថ្ងៃទី ២៤ ខែឧសភា ឆ្នាំ ២០២០ ដែលបានក្លាយជាធនាគារពាណិជ្ជដំបូងគេដែលបានបោះផ្សាយលក់ភាគហ៊ុននៅលើផ្សារហ៊ុននេះ ជាមួយនឹងភាគហ៊ុនសរុបចំនួន ៤,៣៤លាន ឬស្មើនឹងចំនួន ១ភាគរយនៃភាគហ៊ុនសរុបរបស់ខ្លួនជាង ៤៣៣ លានដុល្លារ ខណៈតម្លៃក្នុង ១ហ៊ុន គឺ ១៦ ២០០រៀល (៤,០៥ដុល្លារ)។ នេះបើយោងតាមឯកសារចុះបញ្ជីដែលផ្ញើទៅ CSX៕