ភ្នំពេញៈ រដ្ឋាករទឹកស្វយ័តភ្នំពេញ (PWSA) ដែលចុះបញ្ជីនៅផ្សារហ៊ុនកម្ពុជា (CSX) បានរាយការណ៍ពីប្រតិបត្តិការអាជីវកម្មដ៏រឹងមាំរបស់ខ្លួននៅក្នុងត្រីមាសទី១ ឆ្នាំនេះ ទោះបីការរីករាលដាលវីរុសកូរ៉ូណាបានប៉ះពាល់ដល់សកម្មភាពសេដ្ឋកិច្ចក៏ដោយ។
បើយោងតាមរបាយការណ៍ហិរញ្ញវត្ថុរបស់ PWSA ផ្ញើទៅ CSX កាលពីថ្ងៃទី ១៥ ខែមិថុនា ឱ្យដឹងថា ក្នុងត្រីមាសទី១ ឆ្នាំ ២០២១ PWSA ទទួលបានប្រាក់ចំណេញសុទ្ធ ៣០,៧ ពាន់លានរៀល កើន ៤,១ ពាន់លានរៀល ឬ ១៥,៦៧ ភាគរយធៀបនឹងត្រីមាសទី១ ឆ្នាំ ២០២០។
របាយការណ៍បន្តថា៖ «មូលហេតុនៃការកើនឡើងប្រាក់ចំណេញសុទ្ធនៅក្នុងត្រីមាសទី១ ឆ្នាំ ២០២១ ដោយសារការកើនឡើងនៃចំណូលការប្រាក់សុទ្ធចំនួន ៦,១ ពាន់លានរៀល ឬ ៣៦១,៨៦ ភាគរយបើធៀបត្រីមាសទី ១ ឆ្នាំ ២០២០»។
ប្រធាននាយកដ្ឋានប្រតិបត្តិការទីផ្សារនៅ CSX អ្នកស្រី គឹម សុផានីតា បានប្រាប់ ភ្នំពេញ ប៉ុស្ដិ៍ កាលពីថ្ងៃទី ១៥ ខែមិថុនាថា ទោះបីការរីករាលដាលវីរុសកូរ៉ូណាកំពុងប៉ះពាល់ដល់អាជីវកម្មជាច្រើន ក៏តម្រូវការទឹកស្អាតនៅតែមានសម្រាប់គ្រួសារ និងពាណិជ្ជកម្ម។
អ្នកស្រីថ្លែងថា៖ «យើងមិនមានការសង្ស័យលើប្រតិបត្តិការហិរញ្ញវត្ថុដ៏ល្អរបស់ PWSA ទេ។ ការលក់ទឹកស្អាតជាលក្ខណៈគ្រួសារ និងអតិថិជនពាណិជ្ជកម្មដែលជាប្រភពដ៏សំខាន់នៃប្រាក់ចំណូលនៅតែរឹងមាំ ដោយមិនជាប់ទាក់ទងនឹងវិបត្តិជំងឺកូវីដ ១៩ ទេ។ នេះគឺជាអត្ថប្រយោជន៍ដ៏រឹងមាំរបស់ខ្លួននៃការធ្វើអាជីវកម្មលើមូលដ្ឋានការលក់ផ្ដាច់មុខនៃការប្រើប្រាស់ទំនិញ ដើម្បីបម្រើការរស់នៅប្រចាំថ្ងៃរបស់ប្រជាជន»។
ក្នុងរយៈពេលពេញមួយឆ្នាំ ២០២០ PWSA បានឱ្យដឹងថា ប្រាក់ចំណូលមានចំនួន ៣២៤ ៣៦៧ ៨៥៦ ០០០ រៀល (៧៩,៦៨ លានដុល្លារ) កើនឡើង ១០៧ ៨៧១ ០៤០ ០០០ រៀល ឬ ៤៩,៨៣ ភាគរយធៀបទៅនឹងឆ្នាំ ២០១៩។ ប្រាក់ចំណេញសុទ្ធពេញមួយឆ្នាំមានចំនួន ៨៨ ៣៥១ ៨៤៥ ០០០ រៀលកើនឡើង ៥៥ ០៥៩ ៩៣២ ០០០រៀល ឬ ១៦៥,៣៩ ភាគរយធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាម PWSA។
PWSA កាលពីថ្ងៃទី ១ ខែកុម្ភៈ ឆ្នាំ ២០២១ បានចាប់ផ្ដើមដំណើរការសាងសង់រោងចក្រប្រព្រឹត្តិកម្មទឹកស្អាតបាក់ខែងតម្លៃ ៣៨០ លានដុល្លារ នៅជាយរាជធានីភ្នំពេញ ដើម្បីជាការឆ្លើយតបនឹងតម្រូវការដែលកើនឡើងដែលផ្ដល់សក្ដានុពលកំណើនវិនិយោគថ្មីសម្រាប់ក្រុមហ៊ុន។
ការសាងសង់រោងចក្រនេះនឹងអនុវត្តជា ២ ដំណាក់កាល ដោយដំណាក់កាលទី១ គ្រោងនឹងបញ្ចប់ត្រឹមចុងឆ្នាំក្រោយ ហើយការផលិតទឹកស្អាតនឹងធ្វើឡើងភ្លាមៗក្នុងចំនួន ១៩៥ ០០០ ម៉ែត្រគុបក្នុងមួយថ្ងៃ។
ដោយគ្រោងនឹងធ្វើការចែកចាយនៅត្រឹមចុងឆ្នាំ ២០២៣ ដំណាក់កាលទី២ នឹងបន្ថែម ១៩៥ ០០០ ម៉ែត្រគុបទៀតដល់សមត្ថភាពផលិតប្រចាំថ្ងៃរបស់រោងចក្រក្នុងចំនួនសរុប ៣៩០ ០០០៕ LA