ភ្នំពេញៈ បុគ្គលិករបស់ធនាគារ អេស៊ីលីដា ភីអិលស៊ី អាចធ្វើការទិញលក់ភាគហ៊ុនរបស់ខ្លួនដោយសេរី និងផ្ទាល់នៅលើផ្សារមូលបត្រកម្ពុជា (CSX) បន្ទាប់ពីធនាគារនេះបានធ្វើនិយតកម្មភាគហ៊ុនទាំងអស់ទៅឱ្យភាគហ៊ុនិកជាក់ស្តែងម្នាក់ៗរបស់ក្រុមហ៊ុន អេ អេស អេ ភីអិលស៊ី (ASA) ដែលជាភាគហ៊ុនិកនីតិបុគ្គលមួយរបស់ខ្លួន។
យោងតាមសេចក្តីជូនដំណឹងរបស់ធនាគារអេស៊ីលីដាកាលពីថ្ងៃ ១៥ ខែមិថុនា បានសម្រេចជាផ្លូវការក្នុងការដាក់ភាគហ៊ុន ៤ ភាគរយស្មើនឹង ១៧ ៣២៦ ៥២១ ភាគហ៊ុនរបស់ក្រុមហ៊ុន អេ អេស អេ ភីអិលស៊ី (ASA, Plc) ដែលជាភាគហ៊ុនិកនីតិបុគ្គលមួយរបស់ខ្លួនអាចធ្វើការជួញដូរបាននៅលើផ្សារមូលបត្រកម្ពុជា (CSX) សម្រាប់ឆ្នាំ ២០២១។ ការដាក់ឱ្យជួញដូរភាគហ៊ុនរបស់ អេ អេស អេ ភីអិលស៊ី នៅផ្សារមូលបត្រកម្ពុជាធ្វើឡើងប្រមាណជាង ១ ឆ្នាំ បន្ទាប់ពីធនាគារមួយនេះបានបោះផ្សាយមូលបត្រកម្មសិទ្ធិជាផ្លូវការលើ CSX កាលពីចុងខែឧសភា ឆ្នាំ ២០២០។
យោងតាមសេចក្តីជូនដំណឹងរបស់ធនាគារអេស៊ីលីដា កាលពីថ្ងៃ ១៥ ខែមិថុនា ឱ្យដឹងថា អេ អេស អេ ភីអិលស៊ី ដែលជាភាគហ៊ុនិកនីតិបុគ្គលមួយរបស់ធនាគារ បានធ្វើនិយតកម្មភាគហ៊ុនទាំងអស់ទៅឱ្យភាគហ៊ុនិកជាក់ស្តែងម្នាក់ៗដែលមានសមាជិកសរុប ១១ ៤៨៨ នាក់ និងមានភាគហ៊ុនសរុប ១០៧ ២០៤ ៥៤៧ ភាគហ៊ុន ស្មើនឹងចំនួន ២៤,៧៩២ ភាគរយនៃភាគហ៊ុនសរុបរបស់ធនាគារ ដោយអនុលោមតាមវិធានច្បាប់ និងបទប្បញ្ញត្តិពាក់ព័ន្ធរបស់និយតករមូលបត្រកម្ពុជា និងដោយមានការឯកភាពពីភាគហ៊ុនិកនីមួយៗនៃ អេ អេស អេ ភីអិលស៊ី។
សេចក្តីជូនដំណឹងនេះបានបញ្ជាក់ថា៖ «ភាគហ៊ុនដែលបានធ្វើនិយតកម្មរួចរាល់នឹងត្រូវដាក់ឱ្យជួញដូរបាននៅលើផ្សារមូលបត្រកម្ពុជាត្រឹម ៤ ភាគរយស្មើនឹង ១៧ ៣២៦ ៥២១ ភាគហ៊ុនសម្រាប់ឆ្នាំ ២០២១។ ចំណែកភាគហ៊ុនដែលនៅសល់ ២០,៧៤៩២ ភាគរយទៀតនឹងត្រូវអនុវត្តតាមផែនការជាបន្តបន្ទាប់»។
លោកស្រី គីម សុផានីតា ប្រធាននាយកដ្ឋានប្រតិបត្តិការទីផ្សាររបស់ CSX បានប្រាប់ភ្នំពេញប៉ុស្ដិ៍កាលពីថ្ងៃទី ១៦ ខែមិថុនាថា ការធ្វើនិយតកម្មនឹងអនុញ្ញាតឱ្យនិយោជិតអេស៊ីលីដា កាន់កាប់ភាគហ៊ុនរបស់ពួកគេនៅអេស៊ីលីដា និងអាចធ្វើការជួញដូរដោយផ្ទាល់ក្នុងគណនីផ្ទាល់ខ្លួន។ មកដល់ពេលនេះមាននិយោជិតជាង ១១ ០០០ នាក់មិនអាចធ្វើការជួញដូរភាគហ៊ុនរបស់ធនាគារអេស៊ីលីដាបានទេ ព្រោះពួកគេជាម្ចាស់ភាគហ៊ុនរបស់ក្រុមហ៊ុន ASA។
លោកស្រីថ្លែងថា៖ «ឥឡូវនិយោជិតអាចជួញដូរភាគហ៊ុនរបស់ពួកគេនៅក្នុងទីផ្សារធំជាងមុនដោយសេរី និងស្របច្បាប់។ ខ្ញុំរំពឹងថា ទីផ្សារនឹងកាន់តែសកម្មជាមួយនឹងវត្តមានរបស់ពួកគេ និងមានភាគហ៊ុនដាក់ជួញដូរច្រើនជាង ១៧ លានភាគហ៊ុនទៀត»។
អេស៊ីលីដា ដែលជាធនាគារគ្រប់គ្រងដោយវិនិយោគិនក្នុងស្រុកធំជាងគេនៅកម្ពុជា បានប្រមូលនិធិប្រហែល ១៧,៥ លានដុល្លារពីការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO) របស់ខ្លួននៅលើក្រុមហ៊ុនផ្សារមូលបត្រកម្ពុជា (CSX) កាលពីថ្ងៃទី ២៤ ខែឧសភា ឆ្នាំ ២០២០ ដែលបានក្លាយជាធនាគារពាណិជ្ជដំបូងគេដែលបានបោះផ្សាយលក់ភាគហ៊ុននៅលើផ្សារហ៊ុននេះជាមួយនឹងភាគហ៊ុនសរុប ៤,៣៤ លាន ឬស្មើនឹង ១ ភាគរយនៃភាគហ៊ុនសរុបរបស់ខ្លួនជាង ៤៣៣ លានដុល្លារ ខណៈតម្លៃនៅក្នុង ១ ហ៊ុន ១៦ ២០០ រៀល (៤,០៥ ដុល្លារ)។ នេះបើតាមឯកសារចុះបញ្ជីដែលផ្ញើទៅ CSX៕