.jpg)
កម្ពុជាជាប្រទេសឈានមុខគេទី២ នៅអាស៊ាននៃការពន្លឿនការចាក់វ៉ាក់សាំងកូវីដ ១៩ ជំរុញឱ្យកំណើនសេដ្ឋកិច្ចត្រូវបានព្យាករណ៍ថា មានកំណើន ៤ ភាគរយក្នុង ២០២១ នេះ។ ហុង មិនា
ភ្នំពេញៈ ធនាគារពិភពលោក (WB) កាលពីថ្ងៃព្រហស្បតិ៍ បានធ្វើការព្យាករសេដ្ឋកិច្ចរបស់កម្ពុជាកំពុងរើបឡើងវិញបន្តិចម្តងៗហើយ ជាមួយនឹងការព្យាករទុកថា វានឹងទទួលបានកំណើនជិត ៤ ភាគរយ ក្នុងឆ្នាំ ២០២១ ដោយសារការពន្លឿនកម្មវិធីចាក់វ៉ាក់សាំងដល់ប្រជាពលរដ្ឋបង្កើនទំនុកចិត្តទីផ្សារ រួមជាមួយការងើបឡើងវិញនៃតម្រូវការសកល។
ប៉ុន្តែធនាគារមួយនេះក៏បានព្រមានថា ខ្លួនក៏បានពិនិត្យមើលឃើញនូវសេណារីយោអវិជ្ជមានផងដែរ ដែលក្នុងនោះអាចថា កម្មវិធីចាក់វ៉ាក់សាំងមានភាពយឺតយ៉ាវ ហើយវិធានការបិទខ្ទប់ទូទាំងប្រទេសនៅតែមានភាពញឹកញាប់ និងអូសបន្លាយយូរ។ ក្រោមលក្ខខណ្ឌបែបនេះ សេដ្ឋកិច្ចតាមការព្យាករ នឹងមានកំណើនតែ ១ ភាគរយ ប៉ុណ្ណោះក្នុងឆ្នាំ ២០២១ នេះ។
ធនាគារពិភពលោកបានឱ្យដឹងក្នុងរបាយការណ៍បច្ចុប្បន្នភាពសេដ្ឋកិច្ចរបស់កម្ពុជា ក្រោមចំណងជើងថា «ដំណើរឆ្ពោះទៅការរើបឡើងវិញ» ដែលបានធ្វើសន្និសីទកាសែតតាមប្រព័ន្ធវីដេអូកាលពីព្រឹកថ្ងៃដដែលនេះថា ការព្យាករទុកថា វានឹងទទួលបានកំណើនជិត ៤ ភាគរយក្នុងឆ្នាំ ២០២១ បន្ទាប់ពីរួញទំហំអស់ ៣,១ ភាគរយក្នុងឆ្នាំ ២០២០។
ធនាគារនេះបានបន្តថា យ៉ាងណាក្តីការរើបឡើងវិញនេះមានលក្ខណៈមិនដូចគ្នាទេនៅតាមផ្នែកនានានៃសេដ្ឋកិច្ច ហើយវាក៏ស្ថិតនៅក្នុងសភាពផុយស្រួយនៅឡើយដែរ មួយផ្នែកដោយសារតែវិធានការបិទខ្ទប់ត្រូវបានដាក់អនុវត្តម្តងទៀត ដើម្បីទប់ស្កាត់ការរាលដាលនៃការឆ្លងវីរុសកូវីដ ១៩ ខណៈដែលវិស័យមួយចំនួនមានការរីកចម្រើន ផ្នែកដទៃទៀតនៅគាំងទ្រឹង ដោយសារការរាតត្បាតនៃជំងឺ។ វិស័យកសិកម្មនៅតែរក្សាភាពធន់បានគួរសម ដោយសារតែមានតម្រូវការខ្ពស់ អមដោយការនាំចេញក្រោមកិច្ចព្រមព្រៀងពាណិជ្ជកម្មសេរីដែលកម្ពុជា និងចិនបានចុះហត្ថលេខាជាមួយគ្នា។
លោកស្រី អ៊ិនហ្គូណា ដូប្រាចា ប្រធានគ្រប់គ្រងការិយាល័យធនាគាពិភពលោកប្រចាំកម្ពុជាមានប្រសាសន៍ថា៖ «ដូចប្រទេសជាច្រើនទៀតនៅក្នុងតំបន់ដែរ កម្ពុជាបានរងការប៉ះទង្គិចខ្លាំងពីការធ្លាក់ចុះនៃតម្រូវការលើសកលលោក ដោយសារតែកូវីដ ១៩។ ប៉ុន្តែដំណឹងល្អនៅត្រង់ថា កម្ពុជាបានចាក់វ៉ាក់សាំងឱ្យមនុស្សក្នុងប្រទេសបានជាង ៣ លាននាក់រួចហើយដែលជាអត្រាខ្ពស់មួយនៅក្នុងតំបន់»។
លោកស្រីបន្ថែមទៀតថា៖ «ធនាគារពិភពលោកនៅតែបន្តធ្វើការជាមួយកម្ពុជា ដើម្បីជួយប្រទេសនេះបន្ថែមទៀតក្នុងការប្រយុទ្ធនឹងការឆ្លងរាតត្បាតនៃវីរុសកូវីដ ១៩ និងជួយស្តារសេដ្ឋកិច្ច និងសង្គមឱ្យមានភាពធន់រឹងមាំឡើងវិញ»៕
វីដេអូ៖
