ភ្ញៀវទេសចរចូលទស្សនាប្រសាទអង្គរវត្ត នាពេលកន្លងទៅ។ ហុង មិនា
ភ្នំពេញៈ ក្រសួងទេសចរណ៍បានប្រកាសលើកទឹកចិត្តឱ្យយុវជនវ័យក្មេងក្នុងវិស័យទេសចរណ៍ចូលរួមដាក់ពាក្យប្រកួតប្រជែងក្នុងកម្មវិធី «សហគ្រិនវ័យក្មេងក្នុងវិស័យទេសចរណ៍ជនបទ» (UNWTO Rural Tourism Startup Competition) របស់អង្គការទេសចរណ៍ពិភពលោក (UNWTO) ដែលកម្មវិធីនេះនឹងអាចជួយឱ្យអ្នកចូលរួមទទួលបាននូវជំនួយបច្ចេកទេសសម្រាប់ពង្រឹងអាជីវកម្ម និងការធ្វើបទបង្ហាញពីទម្រង់អាជីវកម្មរបស់ខ្លួននៅក្នុងមហាសន្និបាទអង្គការទេសចរណ៍ពិភពលោកនៅខែតុលាខាងមុខ។
លិខិតជូនដំណឹងផ្សព្វផ្សាយលើបណ្តាញសង្គមផ្លូវការរបស់ក្រសួងទេសចរណ៍នាថ្ងៃទី ១៧ ខែមិថុនា ឱ្យដឹងថា ក្រោមកិច្ចសហការ និងការគាំទ្រពីអង្គការទេសចរណ៍ពិភពលោក ក្រសួងទេសចរណ៍សូមជូនដំណឹង និងលើកទឹកចិត្តដល់យុវជនដែលជាសហគ្រិនវ័យក្មេងក្នុងវិស័យទេសចរណ៍ ឬមានគម្រោងបង្កើតមុខរបរដែលអាចជួយដល់សហគមន៍ជនបទងើបចេញពីវិបត្តិកូវីដ ១៩ ទាំងអស់ឱ្យចូលរួមក្នុងកម្មវិធីប្រកួតប្រជែង «សហគ្រិនវ័យក្មេងក្នុងវិស័យទេសចរណ៍ជនបទ» របស់អង្គការទេសចរណ៍ពិភពលោក។
សេចក្តីជូនដំណឹងបានបញ្ជាក់ថា៖ «កម្មវិធីប្រកួតប្រជែងនេះមានគោលដៅជ្រើសរើសសហគ្រិនវ័យក្មេងឆ្នើមពីប្រទេសសមាជិកអង្គការទេសចរណ៍ពិភពលោក ដើម្បីជំរុញការបង្កើតអាជីវកម្មទេសចរណ៍ ជាពិសេសនៅតាមតំបន់គោលដៅទេសចរណ៍ជនបទ ដើម្បីទ្រទ្រង់ជីវភាពរស់នៅរបស់ប្រជាពលរដ្ឋមូលដ្ឋានឆ្ពោះទៅកាន់ការអភិវឌ្ឍទេសចរណ៍ប្រកបដោយចីរភាព បរិយាបន្ន និងភាពធន់កាន់តែប្រសើរ ជាពិសេសចូលរួមដោះស្រាយផលប៉ះពាល់នៃវិបត្តិកូវីដ ១៩ ក្នុងវិស័យទេសចរណ៍»។
យោងតាមលិខិតខាងលើ សហគ្រិនដែលទទួលជយលាភីនឹងទទួលបាននូវជំនួយបច្ចេកទេសពង្រឹងអាជីវកម្មពីអង្គការទេសចរណ៍ពិភពលោកនឹងក្លាយជាសមាជិកនៃបណ្តាញសហគ្រិនវ័យក្មេងរបស់ពិភពលោក ព្រមទាំងទទួលបាននូវឱកាសបង្ហាញអំពីអាជីវកម្មរបស់ខ្លួនចំពោះមុខថ្នាក់ដឹកនាំទេសចរណ៍ពិភពលោកនៃប្រទេសជុំវិញពិភពលោកមកពី ១៥៩ ប្រទេស និងអង្គការពិភពលោកធំៗនាឱកាសមហាសន្និបាទអង្គការទេសចរណ៍ពិភពលោកលើកទី ២៤ នាខែតុលា ឆ្នាំ ២០២១ ក្នុងប្រទេសម៉ារ៉ុក។
ដើម្បីអាចចូលរួមបានបេក្ខជនត្រូវបង្ហាញអំពីលក្ខណៈពិសេសនៃអាជីវកម្មរបស់ខ្លួនដែលរំលេចអំពីកម្រិតច្នៃប្រឌិត នវានុវត្តន៍ និងការដោះស្រាយផលប៉ះពាល់នៃជីវភាពប្រជាពលរដ្ឋរងផលប៉ះពាល់ពីកូវីដ ១៩ ព្រមទាំងចូលរួមដល់ការអភិវឌ្ឍប្រកបដោយចីរភាពនៅមូលដ្ឋាន។ ជាមួយគ្នាអ្នកមានបំណងចូលរួមអាចចូលទៅកាន់គេហទំព័រ https://www.unwto.org/unwto-global-rural-tourism-startup-competition។ នេះបើតាមសេចក្តីជូនដំណឹង។
Chhay Sivlin President at Cambodia Association of Travel Agents (CATA) អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានប្រាប់ភ្នំពេញប៉ុស្តិ៍ថា យុវជនគឺជាកម្លាំងចលករដ៏ចម្បងសម្រាប់ផ្សព្វផ្សាយពីសក្តានុពលនៃសម្បត្តិទេសចរណ៍ធម្មជាតិ និងជនបទនៅកម្ពុជា ហេតុនេះការចូលរួមរបស់ពួកគេក្នុងកម្មវិធីប្រកួតប្រជែងកម្រិតពិភពលោកបែបនេះ គឺពិតជាមានសារៈសំខាន់ណាស់ ដើម្បីពង្រឹកសមត្ថភាពខ្លួនឯង និងការទទួលបានបទពិសោធន៍ថ្មីៗ។ អ្នកស្រីបន្ថែមថា ដោយសារកម្ពុជាជាប្រទេសមានតំបន់ធម្មជាតិ និងជនបទច្រើន ហេតុនេះការប្រកួតប្រជែងនេះ គឺពិតជាឱកាសដ៏ពិសេសសម្រាប់យុវជនកម្ពុជាក្នុងការទាក់ទាញចំណាប់អារម្មណ៍ភ្ញៀវទេសចរបរទេសឱ្យធ្វើដំណើរមកកម្ពុជា ពិសេសបន្ទាប់ពីស្ថានភាពនៃការឆ្លងរាលដាលជំងឺកូវីដ ១៩ ត្រូវគ្រប់គ្រងបាន។
អ្នកស្រី ស៊ីវលីន បានថ្លែងថា៖ «កម្មវិធីនេះរៀបចំឡើងចំពេលដែលកម្ពុជាកំពុងសិក្សាពីលទ្ធភាពក្នុងការបើកទទួលភ្ញៀវទេសចរបរទេសឡើងវិញ ហេតុនេះវាជាឱកាសដែលយុវជនអាចធ្វើការផ្សព្វផ្សាយពីតំបន់ទេសចរណ៍ជនបទរបស់កម្ពុជាតែម្តង»។
រដ្ឋមន្ត្រីក្រសួងទេសចរណ៍ លោក ថោង ខុន កាលពីថ្ងៃទី ៧ ខែមេសា បានឱ្យដឹងថា លោកបានស្នើសុំឱ្យលោកនាយករដ្ឋមន្ត្រី ហ៊ុន សែន ពិចារណាពីការបើកទ្វារទទួលភ្ញៀវទេសចរអន្តរជាតិដែលបានចាក់វ៉ាក់សាំងបង្ការជំងឺកូវីដ ១៩ រួចហើយ ដោយអនុញ្ញាតឱ្យពួកគេចូលមកទស្សនាគោលដៅទេសចរណ៍សៀមរាប-អង្គរ ចាប់ពីត្រីមាសទី ៤ ឆ្នាំ ២០២១ តទៅ ខណៈដែលការគ្រប់គ្រងសហគមន៍នៅខេត្តសៀមរាប-អង្គរ ស្ថិតក្នុងភាពល្អប្រសើរ ព្រមជាមួយនឹងការជំរុញដំណើរការចាក់វ៉ាក់សាំងឱ្យបានលឿនដល់មន្ត្រីរាជការ អ្នកបម្រើការក្នុងឧស្សាហកម្មទេសចរណ៍ និងវិស័យផ្សេងៗទៀត៕
