.jpg)
គ្រូពេទ្យចាក់វ៉ាក់សាំងជូនប្រជាពលរដ្ឋរស់នៅខណ្ឌដង្កោ កាលពីថ្ងៃទី ៣ មីនា។ ហុង មិនា
ភ្នំពេញៈ ធនាគារពិភពលោកកាលពីថ្ងៃព្រហស្បតិ៍បានព្យាករថា កំណើនសេដ្ឋកិច្ចកម្ពុជានឹងកើនឡើង ៤ ភាគរយក្នុងឆ្នាំ ២០២១ ដោយសារតែការចាប់ផ្ដើមកម្មវិធីចាក់វ៉ាក់សាំងប្រឆាំងនឹងជំងឺកូវីដ ១៩ ដ៏រហ័ស និងការស្ទុះងើបឡើងវិញតម្រូវការពិភពលោក។
ប៉ុន្តែធនាគារមួយនេះក៏បានព្រមានថា ខ្លួនក៏បានពិនិត្យមើលឃើញនូវសេណារីយោអវិជ្ជមានផងដែរ ដែលក្នុងនោះអាចថា កម្មវិធីចាក់វ៉ាក់សាំងមានភាពយឺតយ៉ាវ ហើយវិធានការបិទខ្ទប់ទូទាំងប្រទេសនៅតែមានជាញឹកញាប់ និងអូសបន្លាយពេលយូរ។ ក្រោមលក្ខខណ្ឌបែបនេះ សេដ្ឋកិច្ចតាមការព្យាករនឹងមានកំណើនតែ ១ ភាគរយប៉ុណ្ណោះក្នុងឆ្នាំ ២០២១ នេះ។
យោងតាមការធ្វើបច្ចុប្បន្នភាពសេដ្ឋកិច្ចចុងក្រោយបំផុតរបស់ធនាគារពិភពលោកសម្រាប់ប្រទេសកម្ពុជាដែលបានធ្វើឡើងតាមវីដេអូក្នុងសន្និសីទព័ត៌មានកាលពីថ្ងៃទី ១៧ ខែមិថុនា ឆ្នាំ ២០២១ សេដ្ឋកិច្ចកម្ពុជាកំពុងស្ទុះងើបឡើងវិញជាបណ្ដើរៗ និងត្រូវបានព្យាករថា នឹងកើនឡើង ៤ ភាគរយក្នុងឆ្នាំ ២០២១ បន្ទាប់ពីធ្លាក់ចុះ ៣,១ ភាគរយកាលពី ឆ្នាំ ២០២០។
ទោះយ៉ាងណាការស្ទុះងើបឡើងវិញនេះនៅតែមិនស្មើគ្នា និងការប្រែប្រួលដោយសារតែមួយផ្នែកនៃការបិទខ្ទប់ក្នុងស្រុកជាថ្មី ដើម្បីគ្រប់គ្រងការរីករាលដាលជំងឺកូវីដ ១៩។ នេះបើយោងតាមដំណើរផ្លូវដើម្បីការស្ទុះងើបឡើងវិញ ដែលជាការធ្វើបច្ចុប្បន្នភាពសេដ្ឋកិច្ចចុងក្រោយបំផុតរបស់ធនាគារពិភពលោកសម្រាប់ប្រទេសកម្ពុជា។
«ចក្ខុវិស័យសេដ្ឋកិច្ចរបស់កម្ពុជានៅតែមិនច្បាស់លាស់ខ្លាំង ជាមួយនឹងការកើតឡើង និងល្បឿននៃការស្ទុះងើបឡើងវិញភាគច្រើនពឹងផ្អែកលើស្ថានភាពនៃវីរុស និងល្បឿនការចាក់វ៉ាក់សាំងអាចចាប់ផ្ដើមដំណើរការ»។ នេះបើតាមធនាគារពិភពលោក។
លោក Ly Sodeth សេដ្ឋវិទូជាន់ខ្ពស់នៅធនាគារពិភពលោកបានឲ្យដឹងនៅពេលការធ្វើបទបង្ហាញក្នុងសន្និសីទព័ត៌មានថា ការនាំចេញទំនិញត្រូវបានផ្លាស់ប្តូរ ដោយកើន ១២,២ ភាគរយបើធៀបនឹងរយៈពេលដូចគ្នាឆ្នាំមុនក្នុងអំឡុងពីខែមករា ដល់ខែមេសា ឆ្នាំ ២០២១ ឬ ៣១,៨ ភាគរយក្នុងខែមេសា ឆ្នាំ ២០២១ ធៀបខែមេសា ឆ្នាំ ២០២០ ខណៈដែលតម្រូវការខាងក្រៅបានកើនឡើង។
ការធ្លាក់ចុះការនាំចេញសម្លៀកបំពាក់ ស្បែកជើង និងទំនិញធ្វើដំណើរ (GFT) មួយផ្នែកត្រូវបានប៉ះប៉ូវដោយការកើនឡើងគ្រឿងបន្លាស់រថយន្ត គ្រឿងអេឡិចត្រូនិកកង់ កសិកម្ម និងការនាំចេញផ្សេងៗទៀតដែលបានជំរុញមួយផ្នែកដោយកិច្ចព្រមព្រៀងពាណិជ្ជកម្មសេរីរវាងកម្ពុជា និងចិន។
យោងតាមលោក Sodeth ចំណែកនៃការនាំចេញសម្លៀកបំពាក់ក្នុងការនាំចេញទំនិញសរុបបានធ្លាក់ចុះមកនៅត្រឹម ៤៥,៦ ភាគរយនៅរយៈពេល ៤ ខែដំបូងឆ្នាំ ២០២១ ដោយធ្លាក់ចុះពី ៥២,២ ភាគរយកាលពីឆ្នាំ ២០២០ និង ៥៧,៦ ភាគរយកាលពីឆ្នាំ ២០១៩។
លោកបន្តថា អាមេរិកជាទីផ្សារឈានមុខគេសម្រាប់ការនាំចេញ GFT របស់កម្ពុជាដែលបានកើនឡើងដល់ ៣,៥ ពាន់លានដុល្លារ ឬ ៣,៦ ភាគរយធៀបនឹងរយៈពេលដូចគ្នាកាលពីឆ្នាំមុន ដែលមានចំនួន ៣៦,៧ ភាគរយនៃការនាំចេញ GFT សរុបកាលពីឆ្នាំមុន។ ផ្ទុយទៅវិញការនាំចេញ GFT ទៅអឺរ៉ុបបានធ្លាក់ចុះខ្លាំងដោយធ្លាក់ចុះ ៣៥ ភាគរយធៀបនឹងរយៈពេលដូចគ្នាឆ្នាំមុន មកនៅត្រឹម ២,៦ ពាន់លានដុល្លារកាលពីឆ្នាំ ២០២០ ដែលមានចំនួន ២៧,៥ ភាគរយនៃការនាំចេញ GFT សរុប។
លោកស្រី Inguna Dobraja នាយកប្រចាំប្រទេសនៃធនាគារពិភពលោកទទួលបន្ទុកប្រទេសកម្ពុជាបានថ្លែងថា៖ «ដូចបណ្ដាប្រទេសជាច្រើនទៀតនៅក្នុងតំបន់ កម្ពុជាបានរងផលប៉ះពាល់យ៉ាងខ្លាំងដោយសារតែវិបត្តិតម្រូវការលើពិភពលោកដែលបណ្តាលមកពីជំងឺកូវីដ ១៩។ ប៉ុន្តែព័ត៌មានល្អ គឺថា កម្ពុជានៅពេលនេះបានចាក់វ៉ាក់សាំងប្រជាជន ៣ លាននាក់ជាអត្រាមួយខ្ពស់បំផុតនៅក្នុងតំបន់»។
លោកស្រីបន្តថា៖ «ធនាគារពិភពលោកកំពុងធ្វើការងារជាមួយកម្ពុជា ដើម្បីផ្ដល់ការគាំទ្របន្ថែម ដើម្បីប្រឆាំងការរីករាលដាលជំងឺ និងជួយដល់ការស្ទុះងើបឡើងវិញនៃសេដ្ឋកិច្ច និងសង្គមប្រកបដោយភាពធន់របស់កម្ពុជា»៕LA
