ភ្នំពេញៈ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន (MPWT) រំពឹងថា កម្ពុជានឹងអាចបើកការដ្ឋានសាងសង់មជ្ឈមណ្ឌលភ័ស្តុភារកម្មភ្នំពេញ (PPLC )នៅឆ្នាំក្រោយ។
ការលើកឡើងរបស់លោករដ្ឋមន្ត្រីនេះត្រូវបានធ្វើឡើងនៅក្នុងកិច្ចប្រជុំពិគ្រោះយោបល់ជាមួយភាគីពាក់ព័ន្ធ (Stakeholder Consultation) ស្តីពីការរៀបចំផែនការមេស្តីពី «ការតភ្ជាប់ប្រព័ន្ធដឹកជញ្ជូនពហុមធ្យោបាយ និងភ័ស្តុភារកម្ម» ដើម្បីប្រមូលធាតុចូលបន្ថែមមុននឹងដាក់ឆ្លងទៅទីស្តីការគណៈរដ្ឋមន្ត្រីពិនិត្យ និងសម្រេចកាលពីថ្ងៃទី ១៧ ខែមិថុនា ឆ្នាំនេះ។
លោក ស៊ុន ចាន់ថុល ថ្លែងថា៖ «យើងសង្ឃឹមថាក្នុងឆ្នាំ ២០២២ ខាងមុខនៅពេលកម្ពុជាធ្វើជាម្ចាស់ផ្ទះកិច្ចប្រជុំកំពូលអាស៊ាន យើងអាចចុះហត្ថលេខាលើកិច្ចព្រមព្រៀងសម្បទានជាមួយក្រុមហ៊ុន YCH របស់សិង្ហបុរី និងឈានទៅបើកការដ្ឋានសាងសង់មជ្ឈមណ្ឌលភ័ស្តុភារកម្មភ្នំពេញនេះបាន»។
កាលពីថ្ងៃទី ៤ ខែមីនា ឆ្នាំ ២០២១ ក្រសួងសាធារណការ និងដឹកជញ្ជូនបានចុះហត្ថលេខាលើកិច្ចព្រមព្រៀងក្របខ័ណ្ឌជាមួយក្រុមហ៊ុន YCH ដែលមានការគាំទ្រពីក្រុមហ៊ុន Infrastructure Asia (IA) ដើម្បីសិក្សាគម្រោងអភិវឌ្ឍមជ្ឈមណ្ឌលភ័ស្តុភារកម្មភ្នំពេញក្នុងរយៈពេល ៩ ខែដើម្បីឈានទៅរកការចរចាកិច្ចព្រមព្រៀងសម្បទាន ដើម្បីអនុវត្តគម្រោងនេះ។
កិច្ចពិភាក្សានេះបានផ្តោតទៅលើការច្របាច់បញ្ចូលគ្នានូវផែនការមេ ២ គឺផែនការមេដឹកជញ្ជូនតាមផ្លូវអាកាស និងផែនការមេដឹកជញ្ជូនពហុមធ្យោបាយ និងភ័ស្តុភារកម្ម ដើម្បីឱ្យមានភាពគ្រប់ជ្រុងជ្រោយ និងអាចយកទៅអនុវត្តបានប្រកបដោយប្រសិទ្ធភាពក្នុងការទាក់ទាញការវិនិយោគ និងជំរុញកំណើនសេដ្ឋកិច្ចកម្ពុជា។
លោកថ្លែងទៀតថា៖ «យើងនឹងកោះប្រជុំគណៈកម្មាធិកាជាតិភ័ស្តុភារកម្មនៅសប្តាហ៍ក្រោយ មុននឹងដាក់ទៅគណៈរដ្ឋមន្ត្រី ដើម្បីស្នើសុំការអនុម័តលើផែនការមេស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភ័ស្តុភារកម្ម»។
នៅថ្ងៃទី ១០ ខែ កញ្ញា ឆ្នាំ ២០២០ ទាំង MPWT និង YCH បានចាប់ផ្តើមការពិភាក្សាលើគម្រោង PPLC នេះដែលមានទីតាំងនៅលើដី ៩៨ ហិកតាក្នុងឃុំសំរោងក្រោម ខណ្ឌដង្កោ នៅប៉ែកខាងលិចព្រលានយន្តហោះអន្តរជាតិភ្នំពេញ៕