.jpg)
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងកិច្ចប្រជុំកាលពីថ្ងៃទី ១៧ មិថុនា។ រូបថត MPWT
ភ្នំពេញៈ រដ្ឋាភិបាលគ្រោងនឹងបើកការដ្ឋានសាងសង់មជ្ឈមណ្ឌលភ័ស្តុភារកម្មភ្នំពេញ (PPLC) នៅឆ្នាំក្រោយ ដែលជាការតភ្ជាប់វិស័យដឹកជញ្ជូនរបស់កម្ពុជាទៅកាន់ទីផ្សារពិភពលោក។
ការបង្ហើបពីផែនការនេះត្រូវធ្វើឡើងក្នុងកិច្ចប្រជុំពិគ្រោះយោបល់ដឹកនាំដោយរដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ជាមួយភាគីពាក់ព័ន្ធស្តីពីការរៀបចំផែនការមេ «ការតភ្ជាប់ប្រព័ន្ធដឹកជញ្ជូនពហុមធ្យោបាយ និងភ័ស្តុភារកម្ម» កាលពីថ្ងៃទី ១៧ ខែមិថុនា ឆ្នាំនេះ។
ក្នុងជំនួបនេះ លោក ស៊ុន ចាន់ថុល បានថ្លែងថា ការពិគ្រោះយោបល់នេះធ្វើឡើងក្នុងគោលបំណង ដើម្បីប្រមូលធាតុចូលបន្ថែមមុននឹងដាក់ឆ្លងទៅទីស្តីការគណៈរដ្ឋមន្ត្រីពិនិត្យ និងសម្រេចដោយលោកបង្ហាញក្តីសង្ឃឹមថា កម្ពុជានឹងអាចបើកការដ្ឋានសាងសង់ PPLC នៅឆ្នាំ ២០២២។
លោកបានថ្លែងថា៖ «យើងសង្ឃឹមថា ក្នុងឆ្នាំ ២០២២ ខាងមុខនៅពេលកម្ពុជាធ្វើជាម្ចាស់ផ្ទះកិច្ចប្រជុំកំពូលអាស៊ាន យើងអាចចុះហត្ថលេខាលើកិច្ចព្រមព្រៀងសម្បទានជាមួយក្រុមហ៊ុន YCH របស់សិង្ហបុរី និងឈានទៅបើកការដ្ឋានសាងសង់មជ្ឈមណ្ឌលភ័ស្តុភារកម្មភ្នំពេញនេះបាន»។
នៅថ្ងៃទី ១០ ខែកញ្ញា ឆ្នាំ ២០២០ ទាំងក្រសួងសាធារណការ និង YCH បានចាប់ផ្តើមការពិភាក្សាលើគម្រោង PPLC នេះដែលមានទីតាំងនៅលើដី ៩៨ ហិកតា នៅក្នុងឃុំសំរោងក្រោម ខណ្ឌដង្កោ នៅប៉ែកខាងលិចព្រលានយន្តហោះអន្តរជាតិភ្នំពេញ។
លោក ស៊ុន ចាន់ថុល បានឱ្យដឹងទៀតថា ការពិភាក្សាគ្នានេះបានផ្តោតទៅលើការច្របាច់បញ្ចូលគ្នានូវផែនការមេ ២ គឺ ផែនការមេដឹកជញ្ជូនតាមផ្លូវអាកាស និងផែនការមេដឹកជញ្ជូនពហុមធ្យោបាយ និងភ័ស្តុភារកម្ម ដើម្បីឱ្យមានភាពគ្រប់ជ្រុងជ្រោយ និងអាចយកទៅអនុវត្តបានប្រកបដោយប្រសិទ្ធភាពក្នុងការទាក់ទាញការវិនិយោគ និងជំរុញកំណើនសេដ្ឋកិច្ចកម្ពុជា។
លោកបន្តថា៖ «យើងនឹងកោះប្រជុំគណៈកម្មាធិការជាតិភ័ស្តុភារកម្មនៅសប្តាហ៍ក្រោយ មុននឹងដាក់ទៅគណៈរដ្ឋមន្ត្រី ដើម្បីសុំការអនុម័តលើផែនការមេស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភ័ស្តុភារកម្ម»។
កាលពីថ្ងៃទី ៤ ខែមីនា ឆ្នាំ ២០២១ ក្រសួងសាធារណការ និងដឹកជញ្ជូនបានចុះហត្ថលេខាលើកិច្ចព្រមព្រៀងក្របខ័ណ្ឌជាមួយក្រុមហ៊ុន YCH ដែលមានការគាំទ្រពីក្រុមហ៊ុន Infrastructure Asia (IA) ដើម្បីសិក្សាគម្រោងអភិវឌ្ឍន៍មជ្ឈមណ្ឌលភ័ស្តុភារកម្មភ្នំពេញក្នុងរយៈពេល ៩ ខែ ដើម្បីឈានទៅរកការចរចាកិច្ចព្រមព្រៀងសម្បទាន ដើម្បីអនុវត្តគម្រោងនេះ៕ LA
