កាលពីឆ្នាំ ២០២០ កម្ពុជាប្រមូលចំណូលពន្ធគយសរុបបានប្រមាណ ២ ៤១៩ លានដុល្លារ ខណៈចំណូលពន្ធគយសរុបនៅឆ្នាំ ២០១៩ មានចំនួន ៣ ២០០ លានដុល្លារ។ រូបថត FN
ភ្នំពេញៈ ប្រព័ន្ធស្វ័យប្រវត្តិកម្មទិន្នន័យគយ (អាស៊ីគូដា) ជំនាន់ថ្មី ៤.៣.៣ ដែលចាប់ផ្តើមអនុវត្តចាប់ពីថ្ងៃចន្ទនេះត្រូវរំពឹងថា នឹងជួយឱ្យការបំពេញបែបបទបញ្ចេញទំនិញពីគយ កាន់តែងាយស្រួល ឆាប់រហ័ស និងមានប្រសិទ្ធភាពសម្រាប់កិច្ចសម្រួលពាណិជ្ជកម្មនៅក្នុងប្រទេសកម្ពុជា។
បើយោងតាមលិខិតរបស់អគ្គនាយកដ្ឋានគយ និងរដ្ឋាករកម្ពុជា ដែលចុះកាលបរិច្ឆេទនាថ្ងៃទី ១៧ ខែមិថុនា ឱ្យដឹងថា ដើម្បីចូលរួមលើកកម្ពស់បន្ថែមទៀតនូវប្រសិទ្ធភាពនៃកិច្ចការសម្រួលពាណិជ្ជកម្មស្របតាមគោលនយោបាយរបស់រាជរដ្ឋាភិបាល អគ្គនាយកដ្ឋានគយ និងរដ្ឋាករកម្ពុជា បានរៀបចំរួចរាល់នូវការធ្វើវិសិដ្ឋកម្មប្រព័ន្ធស្វ័យប្រវត្តិកម្មទិន្នន័យគយ (អាស៊ីគូដា) ជំនាន់ ៤.៣.៣ សម្រាប់បម្រើឱ្យការបំពេញបែបបទបញ្ចេញទំនិញពីគយ។
លិខិតបានបន្តថា អគ្គនាយកដ្ឋានគយ និងរដ្ឋាករកម្ពុជា សម្រេចដាក់ឱ្យអនុវត្តប្រព័ន្ធស្វ័យប្រវត្តិកម្មទិន្នន័យជំនាន់ ៤.៣.៣ ចាប់ពីថ្ងៃទី ២១ ខែមិថុនា ឆ្នាំ ២០២១ តទៅ។
លោក ប៉ាត់ ចំណាន ស្ថាបនិក និងជានាយកប្រតិបត្តិនៃក្រុមហ៊ុន Super App Technology Plc. ដែលជាក្រុមហ៊ុនជំនាញផ្នែកដឹកជញ្ជូន និងបច្ចេកវិទ្យា បានប្រាប់ភ្នំពេញប៉ុស្តិ៍កាលពីថ្ងៃទី ២០ ខែមិថុនាថា សព្វថ្ងៃរដ្ឋាភិបាលកំពុងធ្វើកិច្ចការជាច្រើន ដើម្បីវិវឌ្ឍខ្លួនឱ្យស្របតាមបរិបទនៃការរីកចម្រើននៃសម័យបច្ចេកវិទ្យា តាមរយៈការធ្វើបច្ចុប្បន្នភាពលើគ្រប់ទម្រង់នៃបែបបទឯកសារពាក់ព័ន្ធនឹងការធ្វើពាណិជ្ជកម្មទាំងក្នុងកម្រិតជាតិ និងអន្តរជាតិ ដើម្បីបង្កើនសមត្ថភាពនាំចេញ នាំចូល និងការប្រកួតប្រជែងលើទីផ្សារអន្តរជាតិ។
លោកបន្តថា ទោះបីលោកមិនទាន់ថា ការធ្វើវិសិដ្ឋកម្មប្រព័ន្ធស្វ័យប្រវត្តិកម្មទិន្នន័យគយ (អាស៊ីគូដា) ជំនាន់ ៤.៣.៣ សម្រាប់បម្រើឱ្យការបំពេញបែបបទបញ្ចេញទំនិញពីគយ ដែលនឹងចាប់ផ្តើមអនុវត្តចាប់ពីថ្ងៃទី ២១ ខែមិថុនា ឆ្នាំ ២០២១ នឹងមានលក្ខណៈខុសប្លែកអ្វីខ្លះពីការអនុវត្តកន្លងមក ប៉ុន្តែលោកជឿថា ប្រព័ន្ធស្វ័យប្រវត្តិកម្មទិន្នន័យគយ (អាស៊ីគូដា) ជំនាន់ ៤.៣.៣ ថ្មីនេះនឹងបង្កលក្ខណៈកាន់តែងាយស្រួល និងឆាប់រហ័សជាងអ្វីដែលបាននិងកំពុងអនុវត្ត។
លោកអះអាងថា៖ «ខ្ញុំគិតថា ប្រព័ន្ធស្វ័យប្រវត្តិកម្មទិន្នន័យគយ នឹងជួយឱ្យការបំពេញបែបបទបញ្ចេញទំនិញពីគយកាន់តែមានប្រសិទ្ធភាពឆាប់រហ័ស និងមិនមានភាពស្មុគស្មាញ»។
លោកលើកឡើងទៀតថា នៅពេលនីតិវិធីកាន់តែងាយស្រួលនឹងធ្វើឱ្យតម្លៃផលិតផល និងរយៈពេលបញ្ជូនទំនិញពីកន្លែង ១ ទៅកន្លែង ១ ទៀតធ្លាក់ចុះទាបជាងមុន។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជាឱ្យដឹងថា ការប្រមូលចំណូលរបស់អគ្គនាយកដ្ឋានគយ និងរដ្ឋាករកម្ពុជាក្នុងត្រីមាសទី ១ ឆ្នាំ ២០២១ សម្រេចបាន ៦១៤,៨ លានដុល្លារ ធ្លាក់ចុះ ១៥,២ ភាគរយ ធៀបនឹងរយៈពេលដូចគ្នាឆ្នាំ ២០២០។
កាលពីឆ្នាំ ២០២០ កម្ពុជាប្រមូលចំណូលពន្ធគយសរុបបានប្រមាណ ២ ៤១៩ លានដុល្លារ ខណៈចំណូលពន្ធគយសរុបនៅឆ្នាំ ២០១៩ មានចំនួន ៣ ២០០ លានដុល្លារ៕ LA
