ភ្នំពេញៈ ទំហំមូលធនូបនីយកម្មទីផ្សារសរុបនៃទីផ្សារមូលបត្រកម្មសិទ្ធិនៅចុងត្រីមាសទី១ ឆ្នាំ ២០២១ មានតម្លៃប្រហែល ២,៤០ ពាន់លានដុល្លារ កើនឡើងជាង ៣ ដង ខណៈដែលសន្ទស្សន៍ CSX មាន ៦៣៩,៣៦ ពិន្ទុ កើន ៨ ភាគរយធៀបរយៈពេលដូចគ្នាឆ្នាំមុន។ នេះបើតាមព្រឹត្តិបត្រស្ថិតិជួញដូរមូលបត្រចុងក្រោយរបស់និយតករមូលបត្រកម្ពុជា (SERC)។
យោងតាមព្រឹត្តិបត្រស្ថិតិនេះ ទំហំជួញដូរភាគហ៊ុនសរុបមានចំនួន ៥ ៥៣៤ ១៤៦ ភាគហ៊ុន កើនឡើង ៥១ ភាគរយធៀបនឹងត្រីមាសទី៤ ឆ្នាំ ២០២០ ខណៈតម្លៃជួញដូរមូលបត្រសរុបមានតម្លៃប្រហែល ៨,៦១ លានដុល្លារកើន ១៥២ ភាគរយធៀបត្រីមាសទី៤ ឆ្នាំ ២០២០ និងកើន ៧៩៣ ភាគរយធៀបរយៈពេលដូចគ្នាឆ្នាំ ២០២០។
លោក ស៊ូ សុជាតិ អគ្គនាយកនិយតករមូលបត្រកម្ពុជាបានប្រាប់ភ្នំពេញប៉ុស្ដិ៍កាលពីថ្ងៃទី ២១ ខែមិថុនាថា ទោះបីកម្ពុជាកំពុងប្រយុទ្ធនឹងការឆ្លងរាលដាលកូវីដ ១៩ ក្នុងសហគមន៍ ២០ កុម្ភៈក៏ផ្សារមូលធនបានប្រតិបត្តិការល្អប្រសើរ។
លោកបានថ្លែងថា៖ «ដូចដឹងហើយថា ប្រទេសយើងកំពុងប្រយុទ្ធនឹងការឆ្លងរីករាលដាលកូវីដ ១៩ ក្នុងសហគមន៍ ដែលបណ្ដាលឱ្យយើងបិទខ្ទប់មួយរយៈពេល។ ពិតហើយយើងប្រឈមនឹងបញ្ហាជាច្រើន ប៉ុន្តែវាមិនបានរារាំងប្រតិបត្តិការទីផ្សារយើងឡើយ។ ខ្ញុំបានអង្កេតឃើញថា ប្រតិបត្តិការអាជីវកម្មរបស់ក្រុមហ៊ុនចុះបញ្ជីកំពុងប្រតិបត្តិការជាធម្មតា ឧទាហរណ៍ រដ្ឋាករទឹកស្វយ័តភ្នំពេញនៅតែផ្គត់ផ្គង់ទឹកស្អាតដល់អតិថិជន ខណៈកំពង់ផែសំខាន់ៗទាំង ២ គឺកំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញក៏កំពុងមានប្រតិបត្តិការយ៉ាងសកម្ម។ ជាមួយគ្នានេះតំបន់សេដ្ឋកិច្ចពិសេសភ្នំពេញ បន្តប្រតិបត្តិការធម្មតា ដូច្នេះវាមិនរងផលប៉ះពាល់ដល់ស្ថានភាពរបស់ក្រុមហ៊ុននោះទេ»។
ទោះយ៉ាងណាលោកបញ្ជាក់ថា មានផលប៉ះពាល់មួយចំនួនលើឧស្សាហកម្មកាត់ដេរ ប៉ុន្តែវិស័យនេះនៅតែទទួលបានការបញ្ជាទិញ។ លោកអះអាងថា៖ «យើងមិនបដិសេធថាគ្មានផលប៉ះពាល់នោះទេ យើងពិតជារងផលប៉ះពាល់តិចតួច ពិសេសឧស្សាហកម្មកាត់ដេរ ប៉ុន្តែយើងបានមើលឃើញអ្នកទិញនៅបរទេសនៅតែបញ្ជាទិញក្នុងអំឡុងពេលនេះ»។
លោក ហុង សុខហួរ អគ្គនាយកផ្សារមូលបត្រកម្ពុជា CSX បានលើកឡើងថា ពេលវេលាដ៏ពិបាកនៃវិបត្តិសុខភាពនេះ ក្រុមវិនិយោគិនកំពុងបង្វែរចំណាប់អារម្មណ៍ពួកគេមករកការជួញដូរភាគហ៊ុន ព្រោះវាអាចឱ្យពួកគេរកបានប្រាក់ចំណេញ ទោះបីនៅផ្ទះក្នុងអំឡុងពេលការរឹតបន្តឹងការធ្វើដំណើរក៏ដោយ។
លោកនិយាយថា៖ «វាបង្ហាញយ៉ាងច្បាស់ពីភាពពិសេសនៃការវិនិយោគលើផ្សារភាគហ៊ុននាពេលនេះសម្រាប់សាធារណជនទូទៅ ខណៈពួកគេអាចក្លាយជាម្ចាស់ភាគហ៊ុនរបស់ក្រុមហ៊ុនធំៗ ដោយមិនចាំបាច់ចំណាយពេលវេលាច្រើន»។
ព្រឹត្តិបត្រនេះបានបង្ហាញថា ទំហំការជួញដូរប្រចាំថ្ងៃមធ្យមមានចំនួន ៩០ ៧២៤ ភាគរយ ខណៈតម្លៃជួញដូរប្រចាំថ្ងៃជាមធ្យមមានប្រហែល ១៤ ១១៨ ០០០ ដុល្លារ។ ដោយឡែកការបញ្ជាទិញសរុបមានប្រហែល ២០,៥៥ លានភាគហ៊ុន និងការបញ្ជាការលក់សរុបមានចំនួនប្រហែល ១៨,០៨ លានភាគហ៊ុន៕LA