ភ្នំពេញៈ សហគមន៍កសិកម្មយ៉ាងហោច ២១ នៃគម្រោងកម្មវិធីស្តីពីសហគ្រាសកែច្នៃផលិតផលមាន់ស្រែខ្មែរនឹងទទួលបានរថយន្ត និងរ៉ឺម៉កកង់បីទាំងអស់ ២១ គ្រឿងពីអង្គការហេហ្វឺអន្តរជាតិកម្ពុជា (HEIFER International Cambodia) ពីគម្រោងដែលមានទឹកប្រាក់សរុបជិត ៥០ ម៉ឺនដុល្លារ ដើម្បីអភិវឌ្ឍយីហោមាន់ស្រែចូលទៅក្នុងទីផ្សារ។
អង្គការហេហ្វឺអន្តរជាតិកម្ពុជានឹងជួយជ្រោមជ្រែងកម្មវិធីនេះរយៈពេល ៥ ឆ្នាំចាប់ពីឆ្នាំ ២០២១ ដល់ឆ្នាំ ២០២៦ ដើម្បីពន្លឿនការរីកលូតលាស់នៃផលិតកម្មមាន់ស្រែខ្មែរតាមរយៈការពង្រឹងសមត្ថភាពសហគមន៍ និងអភិវឌ្ឍស្ថាប័នសហគមន៍កសិកម្ម។
គម្រោងនេះក៏ជំរុញការវិនិយោគលើការកសាងសហគ្រាសកែច្នៃផលិតផលមាន់ស្រែខ្មែរ ការកសាងកសិដ្ឋានភ្ញាស់កូនមាន់ស្រែស្តង់ដា និងការគាំទ្រវិនិយោគលើគ្រួសារកសិករឱ្យឈានទៅរកការបង្កើតសហគ្រាសកសិកម្មខ្នាតតូច និងមធ្យម។
លោក ញ៉ែម សារ៉េត នាយកអង្គការហេហ្វឺអន្តរជាតិកម្ពុជាបានថ្លែងក្នុងកម្មពិធីប្រគល់ និងទទួលកាលពីថ្ងៃចន្ទថា ការប្រគល់នេះមានរថយន្តចំនួន ៧ គ្រឿង និងរ៉ឺម៉កកង់បីចំនួន ១៤ គ្រឿងដល់សហគមន៍ កសិកម្មចំនួន ២១ ដែលជាតម្រូវការបន្ទាន់សម្រាប់ការប្រកបអាជីវកម្មក្នុងអំឡុងពេលវិបតិ្តជំងឺកូវីដ ១៩។
ក្រៅពីនេះ អង្គការក៏នឹងប្រគល់ផ្សារសហគមន៍ចំនួន ៥ កន្លែង ការិយាល័យ សហគមន៍កសិកម្ម ៣ កន្លែង និង ឃ្លាំងត្រជាក់ ២ កន្លែង ដើម្បីរួមចំណែកអនុវត្តគម្រោងនេះ។
លោក សារ៉េត ថ្លែងទៀតថា៖ «កម្មវិធីនេះនឹងផ្តល់ប្រយោជន៍ដោយផ្ទាល់ដល់គ្រួសារកសិករប្រមាណជាង ៥៣ ៣០០ គ្រួសារក្នុងខេត្តចំនួន ១១ ដើម្បីឈានទៅរកបង្កើនប្រាក់ចំណូលបានច្រើនសម្រាប់គ្រួសារកសិករ និងរួមចំណែកយ៉ាងសំខាន់ដល់ការបង្កើនការផ្គត់ផ្គង់ស៊ុតមាន់ស្រែខ្មែរ កូនមាន់ស្រែខ្មែរការចិញ្ចឹមមាន់យកសាច់មាន់ស្រែខ្មែរ និងការកែច្នៃ និងវេចខ្ចប់សាច់មាន់ស្រែខ្មែរនៅក្នុងស្រុក ព្រមទាំងចូលរួមការកាត់បន្ថយការនាំចូលសាច់មាន់ពីប្រទេសជិតខាងផងដែរ»។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានអះអាងថា គម្រោងនេះមានលក្ខណៈជោគជ័យខ្ពស់ ដោយសារផលិតផលមាន់ស្រែមានតម្រូវការខ្ពស់នៅលើទីផ្សារ ហើយកសិករចិញ្ចឹមមាន់មានជំនាញ និងបច្ចេកទេសខ្លះរួចមកហើយ។
លោកបានឱ្យដឹងទៀតថា ជំនួយនេះជាសក្ខីកម្មបង្ហាញឱ្យឃើញយ៉ាងច្បាស់ពីការអនុវត្តប្រកបដោយប្រសិទ្ធភាពនៃអភិក្រម «រដ្ឋដៃគូ អភិវឌ្ឍន៍វិស័យឯកជន និងសហគមន៍កសិកម្ម» ដែលស្របនឹងគោលនយោបាយ និងផែនការអភិវឌ្ឍន៍វិស័យកសិកម្មឆ្នាំ ២០១៩-២០២៥។
លោករដ្ឋមន្ត្រីថ្លែងថា៖ «ខ្ញុំសង្ឃឹមថាអង្គការនឹងបន្តពិនិត្យលទ្ធភាពជួយឧបត្ថម្ភដល់សហគមន៍កសិកម្មឱ្យបានកាន់តែច្រើនថែមទៀត ដើម្បីឆ្លើយតបតម្រូវការជាក់ស្តែង»៕ LA