ភ្នំពេញៈ ក្រសួងពាណិជ្ជកម្មអំពាវនាវដល់វិស័យឯកជនឱ្យចូលរួមតាំងពិព័រណ៍ផលិតផលកាហ្វេ និងភោជនីយដ្ឋានអាស៊ីឆ្នាំ ២០២១ ដែលនឹងធ្វើឡើងក្នុងខែវិច្ឆិកា នៅសិង្ហបុរី ដើម្បីផ្សព្វផ្សាយផលិតផល និងស្វែងរកដៃគូពាណិជ្ជកម្ម។
សេចក្តីជូនដំណឹងក្រសួងពាណិជ្ជកម្មកាលពីថ្ងៃទី ២២ ខែមិថុនា ឱ្យដឹងថា ក្រុមហ៊ុន Conference & Exhibition Management Services Pte Ltd-CEMS នឹងរៀបចំពិព័រណ៍ផលិតផលកាហ្វេ និងភោជនីយដ្ឋានអាស៊ីឆ្នាំ ២០២១ ដែលនឹងប្រព្រឹត្តទៅពីថ្ងៃទី ១៨-២០ ខែវិច្ឆិកា ឆ្នាំ ២០២១ នៅមជ្ឈមណ្ឌលតាំងពិព័រណ៍ Marina Bay Sands Singapore Hall-B & C។ ក្នុងព្រឹតិ្តការណ៍នេះ ក្រុមហ៊ុន CEMS នឹងរៀបចំជា ២ ទម្រង់ដើម្បីផ្តល់ជម្រើសដល់អ្នកចូលរួម គឺការចូលរួមដោយផ្ទាល់នៅសិង្ហបុរី និងតាមប្រព័ន្ធអនឡាញ។
សេចក្តីជូនដំណឹងបន្តថា អ្នករៀបចំកម្មវិធីបានផ្តល់ទីតាំងដល់ប្រទេសកម្ពុជា ចំនួន ៣៦ ម៉ែត្រការ៉េក្នុងនោះ ៩ ម៉ែត្រការ៉េ ផ្តល់ជូនស្ថានទូតកម្ពុជាប្រចាំនៅសិង្ហបុរី ដោយឥតគិតថ្លៃសម្រាប់ផ្សព្វផ្សាយផលិតផលវប្បធម៌ និងទេសចរណ៍។ ចំណែក ២៧ ម៉ែត្រការ៉េ ស្មើនឹង ៣ ស្តង់សម្រាប់ជួលឱ្យក្រុមហ៊ុនពីកម្ពុជាយកទៅផ្សព្វផ្សាយផលិតផលកាហ្វេ និងផលិតផលផ្ទះបាយ។
លោក ហេង សេងលី នាយកគ្រប់គ្រងទូទៅក្រុមហ៊ុន ផាក កាហ្វេ អេនបេវើរីច បានឱ្យដឹងថា ព្រឹត្តិការណ៍នេះនឹងផ្តល់អត្ថប្រយោជន៍សម្រាប់ក្រុមហ៊ុនដែលមានចក្ខុវិស័យពង្រីកអាជីវកម្ម និងកសាងបណ្តាញទៅក្រៅប្រទេស ប៉ុន្តែក្រុមហ៊ុនលោកមិនមានចំណាប់អារម្មណ៍ចូលរួមទេ ព្រោះវិបត្តិជំងឺកូវីដ។
លោកប្រាប់ ភ្នំពេញ ប៉ុស្តិ៍ថា៖ «ក្នុងបរិបទនេះ ហាងយើងខ្ញុំមិនចង់បំបែកកម្លាំងទេ យើងចង់ផ្តោតលើស្ថានភាពរាល់ថ្ងៃនេះសិន។ ការចូលរួមព្រឹត្តិការណ៍នេះ អាស្រ័យលើក្រុមហ៊ុននីមួយៗថាតើបើគាត់មានចក្ខុវិស័យពង្រីកអាជីវកម្មទៅក្រៅប្រទេសដែរ ឬទេ»។
លោកកត់សម្គាល់ថា នៅប្រទេសកម្ពុជាពុំទាន់មានការវិនិយោគលើឧស្សាហកម្មផលិតកាហ្វេនោះទេ។
ទិន្នន័យក្រសួងពាណិជ្ជកម្មឱ្យដឹងថា កម្ពុជាបាននាំចេញកាហ្វេ ២,២ តោនដែលមានតម្លៃ ១០ ០០០ ដុល្លារកាលពីឆ្នាំ ២០២០ ទៅទីផ្សារប្រទេសរុស្ស៊ី និងអាហ្វ្រិកខាងត្បូង។
សេចក្តីជូនដំណឹងនេះបញ្ជាក់ថា ការចូលរួមតាំងពិព័រណ៍ផ្ទាល់នឹងត្រូវបង់កម្រៃស្តង់ ១៥ ៦៦០ ដុល្លារសិង្ហបុរី (១១ ៦០០ ដុល្លារអាមេរិក) ស្តង់ ១ មានតម្លៃ ៣ ៨៦៦ ដុល្លារ។ រីឯការចូលរួមតាមប្រព័ន្ធអនឡាញត្រូវបង់កម្រៃជាកញ្ចប់ ១ ៥០០ ដុល្លារសិង្ហបុរី (១ ១១០ ដុល្លារ) ក្នុង ១ ក្រុមហ៊ុន។
ក្រសួងពាណិជ្ជកម្មបានបញ្ជាក់ថា៖ «ដំណឹងនេះចាត់ទុកជាការអញ្ជើញដល់ម្ចាស់សហគ្រាសផលិត និងកែច្នៃគ្រាប់កាហ្វេ និងផលិតផលផ្ទះបាយដែលមានចំណាប់អារម្មណ៍ និងមានបំណងស្វែងរកដៃគូផ្គត់ផ្គង់នៅទីផ្សារសិង្ហបុរី ឬទីផ្សារក្នុងតំបន់»។
ទិន្នន័យបង្ហាញថា កម្ពុជាបាននាំចូលកាហ្វេចំនួន ៧៧០ តោន ដែលមានតម្លៃ ៣,៦ លានដុល្លារកាលពីឆ្នាំ ២០២០ ធ្លាក់ចុះពី ៤,១ លានដុល្លារកាលពីឆ្នាំ ២០១៩។
យោងតាមសមាគម British Coffee Association បានឱ្យដឹងថា កាហ្វេប្រមាណ ២ ពាន់លានពែងត្រូវបានផឹកនៅទូទាំងពិភពលោកជារៀងរាល់ថ្ងៃ ហើយគ្រាប់កាហ្វេបានក្លាយជាផលិតផលមួយដែលត្រូវបានគេស្វែងរកច្រើនបំផុតលើពិភពលោកបន្ទាប់ពីប្រេងឆៅ៕ LA