ភ្នំពេញៈ ក្រសួងទេសចរណ៍ប្រកាសអនុញ្ញាតដល់អ្នកនៅក្នុងវិស័យទេសចរណ៍អាចស្នើសុំចុះបញ្ជិកាសាលាវិជ្ជាជីវៈទេសចរណ៍នៅតាមប្រព័ន្ធអនឡាញ ដែលបានអនុវត្តចាប់ពីថ្ងៃទី ២១ ខែមិថុនា។
សេចក្តីជូនដំណឹងឱ្យដឹងថា ដើម្បីសម្រួលដល់ដំណើរការស្នើសុំចុះបញ្ជិកាសាលាវិជ្ជាជីវៈទេសចរណ៍ ក្រសួងទេសចរណ៍បានរៀបចំប្រព័ន្ធចុះបញ្ជិកាសាលាវិជ្ជាជីវៈទេសចរណ៍តាមប្រព័ន្ធអនឡាញ។ ការចុះបញ្ជិកាតាមអនឡាញនឹងអនុញ្ញាតឱ្យសាលាវិជ្ជាជីវៈទេសចរណ៍ គ្រឹះស្ថានបណ្តុះបណ្តាល ដែលទទួលស្គាល់ ឬចុះបញ្ជីដោយក្រសួងទេសចរណ៍អាចស្នើសុំការចុះបញ្ជិកាទទួលស្គាល់ពីក្រសួងទេសចរណ៍តាមរយៈ https://bitly/3imFIjZ។
សេចក្តីជូនដំណឹងបញ្ជាក់ថា៖ «ក្រសួងសង្ឃឹមថា សាលាវិជ្ជាជីវៈទេសចរណ៍ គ្រឹះស្ថានបណ្តុះបណ្តាលដែលទទួលស្គាល់ ឬចុះបញ្ជីដោយក្រសួងទេសចរណ៍ និងអង្គភាពពាក់ព័ន្ធចូលរួមប្រើប្រាស់ប្រព័ន្ធចុះបញ្ជិកាសាលាវិជ្ជាជីវៈទេសចរណ៍នេះឱ្យបានផុសផុល និងប្រកបដោយប្រសិទ្ធភាពចាប់ពីពេលនេះតទៅ»។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន ឱ្យដឹងថា ការចុះបញ្ជិកាតាមអនឡាញនឹងជួយសម្រួលនីតិវិធីបានលឿនជាងមុន និងទប់ស្កាត់ការរីករាលដាលជំងឺកូវីដ ១៩ ហើយវាក៏នឹងជួយទាក់ទាញអ្នកក្នុងវិស័យទេសចរណ៍មកចុះបញ្ជិកាកាន់តែច្រើនផងដែរ។
អ្នកស្រីប្រាប់ថា៖ «ខ្ញុំសង្ឃឹមថា នឹងជំរុញពួកគាត់ចូលរួមច្រើនក្រោយពីស្ថានភាពជំងឺកូវីដ ១៩ ប្រសើរឡើង ដើម្បីជាធនធានក្នុងវិស័យទេសចរណ៍ដែលកំពុងប្រឈមនឹងកង្វះខាត ដោយសារជំងឺកូវីដ ១៩»។
អ្នកស្រីបន្ថែមថា៖ «វិស័យឯកជនត្រូវការពង្រឹងធនធានមនុស្សឡើងវិញ ដើម្បីឆ្លើយតបនឹងការបើកទទួលភ្ញៀវទេសចរឡើងវិញនាពេលខាងមុខ។ យើងឃើញហើយ អ្នកជំនាញភាគច្រើនក្នុងវិស័យនេះបានចាកចេញឆ្ងាយ និងនៅរប៉ាត់រប៉ាយ អ៊ីចឹងយើងត្រូវមានការជួបជុំឡើងវិញ ដើម្បីរៀបចំសេវាកម្មយើងឡើងវិញ»។
សព្វថ្ងៃ ក្រសួងទេសចរណ៍ បាននិងកំពុងអនុវត្តគម្រោងកម្មវិធីពង្រឹងសមត្ថភាពពាណិជ្ជកម្មក្នុងវិស័យទេសចរណ៍នៅកម្ពុជា (TCBP) ដែលក្រសួងទទួលបានជំនួយហិរញ្ញប្បទានពីទីភ្នាក់ងារអភិវឌ្ឍន៍បារាំង (AFD) ចំនួន ១,៥ លានអឺរ៉ូ (១,៧ លានដុល្លារ) ដើម្បីជួយស្តារវិស័យទេសចរណ៍ក្រោយកូវីដ ១៩។
កញ្ចប់ជំនួយនេះនឹងជួយសម្រាប់រៀបចំវគ្គបណ្តុះបណ្តាលក្នុងការពង្រឹងធនធានមនុស្សបន្ថែមទៀតក្នុងវិស័យទេសចរណ៍នៅកម្ពុជា។ គម្រោង TCBP ត្រូវបែងចែកជា ១៨ វគ្គបណ្តុះបណ្តាលលើជំនាញចំនួន ៧ ដែលរួមមាន ជំនាញទំនាក់ទំនង និងកន្លែងការងារ, ទីផ្សារ និងទេសចរណ៍, ការគ្រប់គ្រងគម្រោង, ស្ថិតិ និងការស្រាវជ្រាវ សុវត្ថិភាពចំណីអាហារ ការគ្រប់គ្រងហិរញ្ញវត្ថុ និង ICT។ នេះបើតាមក្រសួងទេសចរណ៍៕LA