ភ្នំពេញៈ និយតករមូលបត្រកម្ពុជា (SERC) កាលពីថ្ងៃអង្គារបានអនុម័តការចុះបញ្ជីសាធារណៈរបស់ក្រុមហ៊ុន DBD Engineering Plc លើទីផ្សារកំណើននៃក្រុមហ៊ុនមូលបត្រកម្ពុជា (CSX)។ ក្រុមហ៊ុននេះនឹងក្លាយជាក្រុមហ៊ុនទី១ ដែលបានចុះបញ្ជីនៅទីផ្សារកំណើនចាប់តាំងពីបានដំណើរការកាលពីឆ្នាំ ២០១៥។
លោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ ដែលដឹកនាំកិច្ចប្រជុំកាលពីថ្ងៃទី ២២ ខែ មិថុនា ឆ្នាំ ២០២១ បានសម្រេចអនុម័តការចុះបញ្ជីជាសាធារណៈរបស់ក្រុមហ៊ុន DBD Engineering។
លោក ស៊ូ សុជាតិ អគ្គនាយក SERC បានប្រាប់ ភ្នំពេញ ប៉ុស្ដិ៍ថា ការអនុម័តនេះនឹងបើកផ្លូវសម្រាប់ក្រុមហ៊ុនក្នុងការបន្តការបរិវិសកម្ម និងនីតិវិធីចុះបញ្ជីនៅទីផ្សារកំណើនរបស់ CSX។ លោកថ្លែងថា៖ «យើងស្វាគមន៍ការចូលរួមរបស់ក្រុមហ៊ុនក្នុងការចុះបញ្ជីលើទីផ្សារកំណើននៃក្រុមហ៊ុនមូលបត្រកម្ពុជា។ ក្រុមហ៊ុនមួយនេះបានក្លាយជាក្រុមហ៊ុនដំបូងគេនៅលើទីផ្សារកំណើន»។
លោកបន្ថែមថា៖ «ការអនុម័តនេះដើម្បីបង្ហាញដល់សហគ្រាសធុនតូច និងមធ្យមថា ក្រុមហ៊ុនអាចមានលទ្ធភាពក្នុងការប្រមូលមូលនិធិបានកាន់តែច្រើនពីផ្សារមូលបត្រកម្ពុជា។ នេះមានន័យថា យើងមិនមានតែក្រុមហ៊ុនធំទើបអាចមានលទ្ធភាពក្នុងការប្រមូលមូលនិធិពីទីផ្សារមូលធននោះទេ»។
លោកពន្យល់ថា វានឹងមិនចំណាយពេលច្រើនលើការធ្វើបរិវិសកម្ម និងនីតិវិធីចុះបញ្ជីផ្សេងទៀតសម្រាប់ក្រុមហ៊ុននោះទេ។ លោកបន្តថា៖ «ដើមខែកក្កដា ក្រុមហ៊ុននឹងប្រកាសអំពីការរៀបចំរបស់ពួកគេនៃការធ្វើបរិវិសកម្ម និងកាលបរិច្ឆេទការចុះបញ្ជីផ្សេងទៀតជាមិនខាន»។
កាលពីដើមខែមេសា CSX បានផ្ដល់ការយល់ព្រមជាគោលការណ៍លើការត្រួតពិនិត្យលទ្ធភាពការចុះបញ្ជីមូលបត្រមូលធននៃទីផ្សារកំណើនដល់ក្រុមហ៊ុន DBD Engineering Plc។
លោក ហៃ លីដេត ប្រធាននាយកដ្ឋានចុះបញ្ជី និងបង្ហាញព័ត៌មាននៅ CSX បានប្រាប់ថា DBD Engineering Plc ដែល CSX បានផ្ដល់ការយល់ព្រមជាគោលការណ៍លើការត្រួតពិនិត្យលទ្ធភាពចុះបញ្ជី ក៏យល់ព្រមលើការកំណត់តម្លៃមូលបត្រដល់ក្រុមហ៊ុននេះផងដែរ។
លោកថ្លែងថា៖ «តាមរយៈកេរ្តិ៍ឈ្មោះ និងប្រតិបត្តិការជារួមរបស់ DBD គឺមានគុណវុឌ្ឍិគ្រប់គ្រាន់ក្នុងការចុះបញ្ជីនៅលើទីផ្សារកំណើនដែលប្រវត្តិសាស្ដ្ររបស់ CSX ហើយនិងជាគំរូដ៏ល្អសម្រាប់ SMEs ផ្សេងទៀតក្នុងការពិចារណាពីការប្រមូលមូលនិធិសម្រាប់ការពង្រីកអាជីវកម្មតាមរយៈទីផ្សារមូលធនមួយនេះ»៕ LA