.jpg)
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងជំនួបជាមួយលោកស្រី EVA Nguyen Binh ឯកអគ្គរដ្ឋទូតនៃសាធារណរដ្ឋបារាំងប្រចាំនៅកម្ពុជា កាលពីម្សិលមិញ។ រូបថត ក្រសួងសេដ្ឋកិច្ច
ភ្នំពេញៈ រដ្ឋាភិបាលបារាំងសន្យាថានឹងបង្កើនទំហំឥណទានសម្បទានរហូតដល់ ១២០ លានអឺរ៉ូក្នុង ១ ឆ្នាំ ដើម្បីចូលរួមចំណែកអភិវឌ្ឍនៅកម្ពុជា។ នេះបើតាមសេចក្តីប្រកាសព័ត៌មាននៃលទ្ធផលកិច្ចប្រជុំដឹកនាំ ដោយឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន។
ការលើកឡើងនេះ ត្រូវបានធ្វើឡើងក្នុងជំនួបកាលពីថ្ងៃទី ២១ មិថុនា រវាងលោករដ្ឋមន្ត្រីជាមួយលោកស្រី EVA Nguyen Binh ឯកអគ្គរដ្ឋទូតនៃសាធារណរដ្ឋបារាំងប្រចាំនៅកម្ពុជាជិតផុតអាណត្តិ។
តាមសេចក្តីប្រកាសព័ត៌មានរដ្ឋាភិបាលបារាំងតាមរយៈទីភ្នាក់ងារអភិវឌ្ឍន៍បារាំង (AFD) បានសន្យាថា នឹងផ្តល់ឥណទានសម្បទានចន្លោះពី ១០០-១២០ លានអឺរ៉ូ ក្នុង ១ ឆ្នាំដល់កម្ពុជា។
រដ្ឋាភិបាលបារាំងក៏សន្យាជួយកៀរគរហិរញ្ញប្បទានឥតសំណងពីសហភាពអឺរ៉ុប និងពីប្រភពផ្សេងទៀតសម្រាប់រួមចំណែកអភិវឌ្ឍ និងស្តារសេដ្ឋកិច្ចកម្ពុជា បន្ទាប់ពីវិបត្តិកូវីដ ១៩ តាមគោលនយោបាយ និងយុទ្ធសាស្ត្រអភិវឌ្ឍន៍ជាតិរបស់កម្ពុជា។
លោក អូន ព័ន្ធមុនីរ័ត្ន បានសរសើរលោកស្រី EVA Nguyen Binh ដែលបានបំពេញបេសកកម្មការទូតនៅកម្ពុជាក្នុងរយៈពេល ៤ ឆ្នាំក្នុងការកសាងស្នាដៃ និងសមិទ្ធផលជាច្រើនរួមចំណែកអភិវឌ្ឍដល់សេដ្ឋកិច្ចសង្គមកម្ពុជា ស្ទើរគ្រប់វិស័យ ពិសេសវិស័យសុខាភិបាល ទឹកស្អាត អគ្គិសនី កសិកម្ម និងបណ្តុះបណ្តាលវិជ្ជាជីវៈ៕LA
