ទីក្រុងឡុងដ៍ៈ ធនាគារកណ្តាលចក្រភពអង់គ្លេសនៅថ្ងៃព្រហស្បតិ៍ត្រូវគេព្យាករថានឹងរក្សាអត្រាការប្រាក់ ដល់កំណត់ត្រាទាបបំផុត ដែលជាវិធានការចុងក្រោយបំផុត ដែលធនាគារកណ្តាលដាក់ចេញដើមថ្លឹងថ្លែងចំពោះការព្រួយបារម្ភនៃអតិផរណាកំពុងកើនឡើង ទល់សេចក្តីត្រូវការ ដើម្បីបំប៉នការងើបឡើងវិញនៃសេដ្ឋកិច្ចពីវិបត្តិកូវីដ ១៩។
ធនាគារកណ្តាលចក្រភពអង់គ្លេសនឹងប្រកាសនូវសេចក្តីសម្រេចពីកិច្ចប្រជុំដែលត្រូវគេព្យាករថា នឹងរក្សាអត្រាការប្រាក់ត្រឹម ០,១ ភាគរយ និង រក្សាការជំរុញទិញសញ្ញាប័ណ្ណបំណុល។
ធនាគារកណ្តាលអាមេរិក និង ធនាគារកណ្តាលអឺរ៉ុប រក្សាអត្រា ការប្រាក់ទាបបំផុតរបស់ខ្លួន និងវិធានការគាំទ្រសេដ្ឋកិច្ចនៅដដែលក្នុងរយៈពេលប៉ុន្មានសប្តាហ៍ថ្មីៗនេះ ដោយទទូចថាអតិផរណាខ្ពស់គឺជាផលប៉ះពាល់បណ្តោះអាសន្នពីការស្ទុះងើបឡើងវិញនៃពិភពលោក។
គណៈកម្មាធិការគោលនយោបាយកំណត់អត្រារូបិយវត្ថុធនាគារកណ្តាលអង់គ្លេស ដឹកនាំដោយទេសាភិបាល Andrew Bailey នឹង អន្ទះសារមិនមានវិធានការណាមួយលើការងើបឡើងវិញវិញសេដ្ឋកិច្ចក្នុងត្រីមាសទី ២ ដោយបង្កើនអត្រាការប្រាក់ឆាប់ពេកនោះទេ។
ការងារសំខាន់របស់ប្រធានធនាគារកណ្តាលអង់គ្លេសគឺ ប្រើប្រាស់គោលនយោបាយរូបិយវត្ថុជាឧបករណ៍ ដើម្បីទប់អត្រាអតិផរណាឲ្យកៀកទៅអត្រាគោលដៅ ២ ភាគរយ ដើម្បីរក្សាតម្លៃរូបិយបណ្ណ។
កាលពីខែមុន អតិផរណាមានរហូតដល់ទៅ ២,១ ភាគរយ ដែលជាកម្រិតអតិផរណាខ្ពស់បំផុត មុនការរីករាលដាល ដោយតម្លៃសម្លៀកបំពាក់ ប្រេងឥន្ធនៈ ឧស្ម័ន កើនឡើង ពេលដែលសេដ្ឋកិច្ចបើកឡើងវិញ៕ RR