ភ្នំពេញៈ កម្ពុជាប្តេជ្ញាបន្តអភិវឌ្ឍគោលនយោបាយ និងប្រើប្រាស់បច្ចេកវិទ្យាស្អាត ដើម្បីធានាបានការប្រើប្រាស់ថាមពលប្រកបដោយតម្លៃសមរម្យ សន្តិសុខថាមពល និងនិរន្តរភាពថាមពលនាពេលអនាគតក្នុងការចូលរួមកាត់បន្ថយការបំភាយឧស្ម័នកាបូន សម្រាប់ទប់ស្កាត់ការប្រែប្រួលអាកាសធាតុ។
ការប្តេជ្ញាចិត្តនេះត្រូវធ្វើឡើងដោយ លោក ស៊ុយ សែម រដ្ឋមន្ត្រីក្រសួងរ៉ែ និងថាមពលនៅក្នុងវេទិកាបណ្តាញបច្ចេកវិទ្យានៃការប្រើប្រាស់ និងការស្តុកទុកកាបូននៅអាស៊ីលើកទី ១ (1st Asia CCUS Network Forum) នៅថ្ងៃទី ២២ ខែមិថុនា តាមប្រព័ន្ធអនឡាញ។
លោក ស៊ុយ សែម បានថ្លែងថា បើទោះជាកម្ពុជា គឺជាប្រទេសមួយបានបញ្ចេញឧស្ម័នកាបូនតិចតួចបំផុត ក៏ប៉ុន្តែកម្ពុជាប្រឈមមុខខ្ពស់នឹងផលប៉ះពាល់ការប្រែប្រួលអាកាសធាតុ។
លោកបន្តថា វេទិកានេះ គឺជាឱកាសល្អសម្រាប់កម្ពុជាក្នុងការចែករំលែកចំណេះដឹង និងបទពិសោធស្តីពីបច្ចេកវិទ្យា ការចាប់យកប្រើប្រាស់ និងស្តុកទុកកាបូន ដែលកម្ពុជាក៏មានទស្សនវិស័យប្រើប្រាស់ និងស្តុកទុកកាបូនក្នុងឧស្ម័នភាយពីការប្រើប្រាស់ឥន្ធនៈហ្វូស៊ីល ពិសេសវិស័យថាមពល។
លោកថ្លែងថា៖ «កម្ពុជានៅតែយល់ឃើញថា ប្រភពថាមពលរបស់យើងខ្ញុំនៅបន្តពឹងផ្អែកលើការប្រើប្រាស់ឥន្ធនៈហ្វូស៊ីលនេះ នៅពេលអនាគត អ៊ីចឹងវាជាសេចក្តីត្រូវការដ៏ចាំបាច់ក្នុងការធានាថា ឥន្ធនៈហ្វូស៊ីល ធ្យូងថ្ម ប្រេង និងឧស្ម័នធម្មជាតិ ត្រូវបានប្រើប្រាស់តាមរបៀបមួយស្អាតជាងមុន តាមរយៈការដាក់ឱ្យអនុវត្តបច្ចេកវិទ្យាចាប់យកប្រើប្រាស់ និងស្តុកការបូនទុក ដែលមានតម្លៃសមរម្យ»។
លោកបន្តថា ក្នុងឆ្នាំ ២០២០ ប្រភពផ្គត់ផ្គង់ដ៏ធំរបស់កម្ពុជាមាន ៦០ ភាគរយបានពីការប្រើឥន្ធនៈហ្វូស៊ីល (ធ្យូងថ្ម ប្រេង) និង ៤០ ភាគរយទៀតបានពីប្រភពកកើតឡើងវិញ។
វិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA) ដែលផ្តួចផ្តើមរៀបចំវេទិកានេះបានឱ្យដឹងថា ឥន្ធនៈហ្វូស៊ីលក្នុងល្បាយថាមពលបច្ចុប្បន្នរបស់អាស៊ានមានជាង ៨០ ភាគរយ ដែលចំនួននេះគេរំពឹងថានឹងបន្តកើនឡើងថែមទៀតនាពេលអនាគត ដូចនេះបណ្តាប្រទេសតំបន់អាស៊ាន និងអាស៊ីបូព៌ាត្រូវការចាំបាច់ការផ្លាស់ប្តូរពីប្រព័ន្ធថាមពលផ្អែកលើឥន្ធនៈហ្វូស៊ីលមកជាប្រព័ន្ធថាមពលស្អាតជាងមុន។
ERIA ឱ្យដឹងថា៖ «ការប្រើប្រាស់ឥន្ធនៈហ្វូស៊ីលបន្តដើម្បីជំរុញកំណើនសេដ្ឋកិច្ចនៅអាស៊ាននឹងតម្រូវឱ្យមានបច្ចេកវិទ្យាសមស្របក្នុងការប្រើប្រាស់ឥន្ធនៈហ្វូស៊ីលតាមរបៀបប្រកបដោយការទទួលខុសត្រូវ និងបរិស្ថានតាមរយៈបច្ចេកវិទ្យាស្អាត ដូចជា បច្ចេកវិទ្យាធ្យូងថ្មស្អាត និងការចាប់យកការប្រើប្រាស់ និងការស្តុកកាបូនទុក ដើម្បីទប់ទល់ការប្រែប្រួលការបំភាយឧស្ម័ននៅក្នុងតំបន់នាពេលអនាគត»។
បើតាមលោករដ្ឋមន្ត្រី បច្ចុប្បន្នកម្ពុជាបានរួមចំណែកយ៉ាងច្រើនរួចទៅហើយនូវប្រភពថាមពលកកើតឡើងវិញទៅក្នុងប្រភពផ្គត់ផ្គង់ថាមពលបឋម និងទៅក្នុងល្បាយនៃប្រភពថាមពល។ ការកាត់បន្ថយឧស្ម័នកាបូននៅក្នុងតំបន់អាស៊ីពិតជាមានសារៈសំខាន់ណាស់ ព្រោះវាជាផ្នែកមួយនៃមាគ៌ាប្រកបដោយចីរភាពក្នុងការប្រយុទ្ធប្រឆាំង ការប្រែប្រួលអាកាសធាតុ។
លោកបន្ថែមថា៖ «តាមទស្សនៈខ្លួនខ្ញុំផ្ទាល់ ដរាបណាយើងនៅតែបន្តប្រើប្រាស់ឥន្ធនៈហ្វូស៊ីល ការប្រើប្រាស់ឥន្ធនៈហ្វូស៊ីលតាមបច្ចេកវិទ្យាមួយស្អាត ដូចជា បច្ចេកវិទ្យាធ្យូងថ្មស្អាត និងបច្ចេកវិទ្យាចាប់យក ប្រើប្រាស់ និងស្តុកទុកកាបូន នឹងក្លាយជាការចាំបាច់ក្នុងការប្រយុទ្ធការប្រែប្រួលអាកាសធាតុជាទ្រង់ទ្រាយធំ។ តាមមធ្យោបាយនេះ យើងប្រហែលជាអាចមានលទ្ធភាពកំណត់កម្រិតតាមដានសីតុណ្ហភាពសកលត្រឹម ២ អង្សាសេ ប៉ុណ្ណោះនៅចុងសតវត្សរ៍នេះ»៕ LA