ទីក្រុងប្រ៊ុចសែលៈ ការស្ទង់មតិដែលឃ្លាំមើលយ៉ាងយកចិត្តទុកដាក់បានឲ្យដឹងកាលពីថ្ងៃពុធថា សកម្មភាពពាណិជ្ជកម្មនៅក្នុងតំបន់ចាយប្រាក់អឺរ៉ូបានកើនឡើងក្នុងអត្រាលឿនបំផុតក្នុងរយៈពេល ១៥ ឆ្នាំនៅខែនេះ ដោយសារតែការបើកជាថ្មីនូវសេដ្ឋកិច្ចដែលមានសន្ទុះតម្រូវការ។
IHS Markit ជាក្រុមហ៊ុនទិន្នន័យសេដ្ឋកិច្ចបានឲ្យដឹងថា ការចាក់វ៉ាក់សាំង ដែលមានការរីកចម្រើនគួរឲ្យចាប់អារម្មណ៍ កំពុងចាប់ផ្ដើមនៅតំបន់ចាយប្រាក់អឺរ៉ូដែលបានជំរុញដោយការបន្ធូរបន្ថយការរឹតបន្តឹងដែលកំពុងស្ថិតនៅក្នុងកម្រិតទាបបំផុតរបស់ពួកគេចាប់តាំងពីខែកញ្ញា។
លោក Chris Williamson ប្រធានសេដ្ឋវិទូនៅក្រុមហ៊ុន IHS Markit បានថ្លែងថា៖ «ជីវិតកាន់តែភ្លឺថ្លាដែលត្រឡប់ទៅរកប្រក្រតីភាពកាន់តែខ្លាំងឡើងៗ បានជំរុញទំនុកចិត្តដល់កម្រិតខ្ពស់មិនធ្លាប់មាន ដែលបានជំរុញដោយការចំណាយកាន់តែច្រើនឡើង និងជំរុញការជ្រើសរើសបុគ្គលិក»។
ដោយហេតុនេះ សន្ទស្សន៍គ្រប់គ្រងការទិញរបស់ក្រុមហ៊ុនមួយនេះ ដែលចង្អុលបង្ហាញនិន្នាការក្នុងការផលិត និងវិស័យសេវាកម្មបានឲ្យដឹងថា សកម្មភាពបានកើនឡើងពី ៥៧,១ កាលពីខែឧសភា ដល់កំណើន ៥៩,២ កាលពីខែមិថុនា លើសពីកម្រិត ៥០ ពិន្ទុដែលចង្អុលបង្ហាញកំណើន។
ក្រុមហ៊ុនបានបន្តថា ទិន្នន័យនឹងត្រួសត្រាយសម្រាប់កំណើនសំខាន់ៗនៅត្រីមាសទី ២ និងត្រីមាសទី ៣ ដែលបិទរយៈពេលការដើរថយក្រោយយ៉ាងខ្លាំងនៃសេដ្ឋកិច្ច ដែលបានកើតឡើងដោយសារតែការបិទខ្ទប់នៅសរទរដូវមុន និងរដូវរងារ។
កំណើនដ៏ខ្លាំងនេះកំពុងបង្កឲ្យមានផលប៉ះពាល់ខ្លាំងផ្ទាល់របស់ខ្លួន ជាមួយនឹងចង្វាក់ផ្គត់ផ្គង់ស្ថិតក្រោមសម្ពាធ និងតម្លៃដែលឆ្លុះបញ្ចាំងការកើនឡើងយ៉ាងខ្លាំងនៃតម្រូវការ។ នេះបើយោងតាមក្រុមហ៊ុន IHS Markit ។
លោក Williamson បានថ្លែងថា៖ «ភាពខ្លាំងនៃការកើនឡើងនេះទាំងនៅក្នុងអឺរ៉ុប និងទូទាំងពិភពលោកមានន័យថា ក្រុមហ៊ុនជាច្រើនកំពុងជម្នះក្នុងការឆ្លើយតបតាមតម្រូវការ ដែលទទួលរងកង្វះខាតទាំងវត្ថុធាតុដើម និងបុគ្គលិក»។
លោកលើកឡើងថា៖ «ស្ថិតក្រោមលក្ខខណ្ឌទាំងនេះ អំណាចកំណត់តម្លៃរបស់ក្រុមហ៊ុន នឹងបន្តបង្កើនដែលទីបំផុតដាក់សម្ពាធកើនឡើងបន្ថែមទៀតលើអតិផរណាក្នុងរយៈពេលជាច្រើនខែខាងមុខនេះ»៕ LA