.jpg)
បុគ្គលិកធនាគារចិនកំពុងរាប់ក្រដាស់ប្រាក់ ១០០ យន់ និង ក្រដាស់ប្រាក់ដុល្លារ។ រូបភាព AFP
ទីក្រុងប៉េកាំងៈ ធនាគារិកបានឲ្យដឹងថា ការទូទាត់ពាណិជ្ជកម្មឆ្លងកាត់ព្រំដែនជារូបិយប័ណ្ណប្រាក់យន់បានកើនឡើងគួរឲ្យកត់សម្គាល់ ចាប់តាំងពីដើមឆ្នាំនេះ ដោយសារតែការកែលម្អប្រព័ន្ធអេកូស៊ីស្ដែម ដែលជំរុញការប្រើប្រាស់រូបិយប័ណ្ណរបស់ប្រទេសចិននៅបរទេស។
នៅត្រីមាសទី ១ ឆ្នាំនេះ សន្ទស្សន៍ការធ្វើសាកលភាវូបនីយកម្មរូបិយប័ណ្ណប្រាក់យន់ (RGI) នៃក្រុមហ៊ុន Standard Chartered ជាវិធានការមួយនៃការប្រើប្រាស់រូបិយប័ណ្ណប្រាក់យន់អន្តរជាតិ ដែលត្រូវបានគណនាប្រចាំខែ បានកើនឡើង ១៣ ភាគរយធៀបនឹងត្រីមាសចុងក្រោយឆ្នាំមុន ដែលកត់ត្រាការកើនឡើងប្រចាំត្រីមាសធំជាងគេក្នុងរយៈពេល ៥ ឆ្នាំកន្លះ។ ការកើនឡើងនេះកើតឡើង បន្ទាប់ពីកំណើន RGI ចំនួន ១០,៤ ភាគរយក្នុងរយៈពេលពេញមួយឆ្នាំ ២០២០។
សន្ទស្សន៍នេះត្រូវបានពឹងផ្អែកលើសមាសធាតុ ៤ ប្រាក់បញ្ញើរូបិយប័ណ្ណប្រាក់យន់នៅក្រៅប្រទេស ការទូទាត់ពាណិជ្ជកម្ម និងការទូទាត់អន្តរជាតិផ្សេងទៀត មូលបត្របំណុល Dim Sum និងវិញ្ញាបនបត្រប្រាក់បញ្ញើ និងប្រាក់ចំណូលការប្តូរប្រាក់ទាំងអស់នេះបានមកពីវិធីសាស្ដ្រនៅក្រៅប្រទេស និងការគិតជាប្រាក់យន់។
លោកស្រី Jean Lu សហប្រធានវិទ្យាស្ថានសាជីវកម្ម ពាណិជ្ជកម្ម និងធនាគារស្ថាប័ននៅក្នុងក្រុមហ៊ុន Standard Chartered China បានឲ្យដឹងថា ការកើនឡើង RGI មានការជាប់ទាក់ទងយ៉ាងខ្លាំងជាមួយនឹងការស្ទុះងើបឡើងវិញយ៉ាងរហ័សរបស់ប្រទេសចិនពីការរីករាលដាលជំងឺកូវីដ ១៩ អត្រាប្តូរប្រាក់ថេរជាមូលដ្ឋាននៃរូបិយប័ណ្ណប្រាក់យន់ និងការបើកចំហកាន់តែខ្លាំងឡើងទីផ្សារមូលធនរបស់ប្រទេសចិន។
លោកស្រីថ្លែងថា៖ «ប្រទេសចិនបានបង្កើតប្រព័ន្ធអេកូស៊ីស្ដែម ដែលជំរុញឱ្យមានការប្រើប្រាស់រូបិយប័ណ្ណប្រាក់យន់នៅបរទេស។ ការកើនឡើងចំនួនគ្រឹះស្ថានហិរញ្ញវត្ថុនៅបរទេសដែលបានចូលរួមជាមួយប្រព័ន្ធទូទាត់អន្តរធនាគារឆ្លងកាត់ព្រំដែនដោយផ្ទាល់ ឬដោយប្រយោលរបស់ប្រទេសនេះ ដោយសារតែការកែលម្អបន្ថែមទៀតនៃប្រព័ន្ធនេះបានធ្វើឲ្យការទូទាត់ពាណិជ្ជកម្មឆ្លងកាត់ព្រំដែនជាប្រាក់យន់មានភាពងាយស្រួលកាន់តែខ្លាំង។ ក្រៅពីនេះ រូបិយប័ណ្ណប្រាក់យន់បានក្លាយជារូបិយប័ណ្ណបម្រុងពិភពលោក ស្ថិតក្រោមយន្តការនានាដូចជាកិច្ចព្រមព្រៀងដោះដូររូបិយប័ណ្ណរបស់ប្រទេសចិនជាមួយបណ្ដាប្រទេសមួយចំនួនផ្សេងទៀត»។
របាយការណ៍ក្រុមហ៊ុន Shanghai Securities បានរាយការណ៍ថា គិតត្រឹមថ្ងៃទី ១៧ ខែឧសភា ប្រព័ន្ធទូទាត់អន្តរធនាគារឆ្លងកាត់ព្រំដែនមានអ្នកចូលរួម ១ ១៧១ នាក់មកពីប្រទេស និងតំបន់ចំនួន ១០០។ អាជីវកម្មរបស់ខ្លួនគ្របដណ្ដប់លើស្ថាប័នធនាគារស្របច្បាប់ជាង ៣ ៤០០ ក្នុងបណ្ដាប្រទេស និងតំបន់ជិត ២០០៕ China Daily-ANN/LA
