ភ្នំពេញៈ អ្នកតំណាងនៅក្នុងវិស័យឧស្សាហកម្ម និងសភាពាណិជ្ជកម្មបរទេសនៅកម្ពុជាបានអំពាវនាវឱ្យរាជរដ្ឋាភិបាលជួយបន្ធូរបន្ថយវិធានការមួយចំនួនរបស់រដ្ឋបាលរាជធានីភ្នំពេញជុំវិញវិធានការគ្រប់គ្រងជំងឺកូវីដ ១៩ នៅតាមបណ្ដារោងចក្រ និងសហគ្រាស ដែលវិធានការនេះអាចបង្កផលប៉ះពាល់ខ្លាំងទៅលើការផលិត និងដាក់បន្ទុកបន្ថែមលើនិយោជក ដែលកំពុងប្រឈមនឹងការពិបាកផ្នែកហិរញ្ញវត្ថុ ដោយសារការរីករាលដាលកូវីដ ១៩។
យោងតាមលិខិតរបស់រដ្ឋបាលរាជធានីភ្នំពេញដែលចុះកាលបរិច្ឆេទថ្ងៃទី ១៥ ខែមិថុនា ឆ្នាំ ២០២១ ស្ដីពីវិធានការគ្រប់គ្រងការរីករាលដាលជំងឺកូវីដ ១៩ នៅតាមបណ្ដារោងចក្រ សហគ្រាសក្នុងភូមិសាស្ដ្ររាជធានីភ្នំពេញ ដែលភាគច្រើនបណ្ដាលមកពីការរស់នៅរួមគ្នារបស់បុគ្គលិក និងកម្មករនិយោជិតរោងចក្រសហគ្រាសនៅក្នុងបន្ទប់ជួល ឬអគារជួល ការធ្វើដំណើររួមគ្នា ការទិញអាហារពីស្ដង់លក់អាហារ ដែលមិនបានរៀបចំឱ្យបានល្អ មិនគោរពតាមការណែនាំរបស់ក្រសួងសុខាភិបាល និងរោងចក្រជាច្រើនទៀត។ល។
លិខិតដែលចុះហត្ថលេខាដោយលោក ឃួង ស្រេង អភិបាលរាជធានីភ្នំពេញ បានឱ្យដឹងថា៖ «ការដាក់ចេញផែនការស្ដីពីវិធានការគ្រប់គ្រងជំងឺកូវីដ-១៩ នៅតាមបណ្ដារោងចក្រសហគ្រាសក្នុងភូមិសាស្ដ្ររាជធានីភ្នំពេញ មានគោលបំណងធានាសុខុមាលភាព សុវត្ថិភាព និងការរស់នៅរបស់បុគ្គលិក និងកម្មករនិយោជិត ព្រមទាំងស្ថិរភាពការផលិតរបស់រោងចក្រសហគ្រាសក្នុងភូមិសាស្ដ្ររាជធានីភ្នំពេញតាមរយៈការកំណត់វិធានការចាំបាច់នានា»។
លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជា (GMAC) បានប្រាប់ភ្នំពេញប៉ុស្ដិ៍ថា GMAC ពេញចិត្តចំពោះវិធានការទាំងនេះ (វិធានការចំពោះកិច្ច វិធានការរយៈពេលមធ្យម និងវិធានការរយៈពេលវែង) ដើម្បីគ្រប់គ្រងជំងឺកូវីដ ១៩ នៅតាមបណ្ដារោងចក្រ សហគ្រាសក្នុងភូមិសាស្ដ្ររាជធានីភ្នំពេញ។ ទោះយ៉ាងណា លោកបានឱ្យដឹងថា វិធានការមួយចំនួនដែលបានដាក់ចេញមានកម្រិតលើសពីសមត្ថភាពផ្នែករដ្ឋបាល ហិរញ្ញវត្ថុ និងបច្ចេកទេសរបស់រោងចក្រ សហគ្រាសក្នុងការអនុវត្តឱ្យមានប្រសិទ្ធភាព។
លោកលើកឡើងថា បញ្ហាប្រឈមទី ១ គឺលើវិធានការចំណុច ខ.៥ (ចំពោះនិយោជក) ត្រៀមទីតាំងសមស្របសម្រាប់ធ្វើតេស្ដយកសំណាក អនុវត្តវិធានចត្តាឡីស័ក ឬព្យាបាលជំងឺកូវីដ ១៩។
លោកលើកឡើងថា៖ «រោងចក្រសហគ្រាសភាគច្រើនមិនមានទីតាំងសមស្របដើម្បីអនុវត្តវិធានការចត្តាឡីស័ក ឬព្យាបាលជំងឺកូវីដ ១៩ កម្រិតស្រាលឱ្យបានត្រឹមត្រូវទៅនឹងវិធានការសុខាភិបាលរបស់រដ្ឋាភិបាលឡើយ»។
លោកបន្តថា ជាក់ស្ដែងរោងចក្រសហគ្រាសមិនអាចផ្ដល់ទីតាំងស្នាក់នៅ ផ្គត់ផ្គង់អាហារ និងការគាំទ្រផ្សេងៗសម្រាប់សកម្មភាពរស់នៅប្រចាំថ្ងៃរបស់កម្មករនិយោជិតដែលអនុវត្តវិធានការចត្តាឡីស័ក ឬព្យាបាលជំងឺកូវីដ ១៩ កម្រិតស្រាលឡើយ។ ហើយកន្លងមកនេះក៏មានការតវ៉ារបស់បងប្អូនកម្មករនិយោជិត ដើម្បីទៅធ្វើចត្តាឡីស័កនៅផ្ទះផងដែរ។
លោកបញ្ជាក់ថា៖ «រោងចក្រក៏មិនអាចទទួលរ៉ាប់រងបន្ទុកចំណាយទាំងស្រុងលើការធ្វើចត្តាឡីស័ក និងព្យាបាលអ្នកជំងឺកម្រិតស្រាលបន្ថែមលើការទទួលបន្ទុកបើកប្រាក់បៀវត្សជូនកម្មករនិយោជិតដោយគ្មានផលិតកម្មនោះទេ»។
បញ្ហាបន្ទាប់បន្សំផ្សេងទៀតមានដូចជា វិធានការចំណុច ខ.៩ (ចំពោះនិយោជក) មិនអនុញ្ញាតឱ្យមានការលក់ដូចអាហារ ភេសជ្ជៈ សម្ភារប្រើប្រាស់ ឬគ្រឿងឧបភោគ បរិភោគផ្សេងៗដែលគ្មានសណ្ដាប់ធ្នាប់ និងរបៀបរៀបរយ ជុំវិញទីតាំងរោងចក្រសហគ្រាសនោះទេ។
លោក ខេន លូ បានឱ្យដឹងថា និយោជកមិនមានសិទ្ធិអំណាច ឬសមត្ថកិច្ចស្របច្បាប់ទៅហាមឃាត់បងប្អូនប្រជាពលរដ្ឋមិនឱ្យលក់អាហារ ភេសជ្ជៈ សម្ភារប្រើប្រាស់ ឬគ្រឿងឧបភោគបរិភោគផ្សេងៗនៅជុំវិញទីតាំងរោងចក្រសហគ្រាសឡើយ។ ខណៈដែលវិធានការចំណុច ខ.១០ របស់រដ្ឋបាលរាជធានី (ចំពោះនិយោជក) មិនអនុញ្ញាតឱ្យបុគ្គលិក និងកម្មករនិយោជិត ចេញទទួលទានអាហារនៅខាងក្រៅនោះទេ។
លោក ខេន លូ បន្តថា និយោជកមិនមានសិទ្ធិអំណាចតាមផ្លូវច្បាប់ណាមួយក្នុងការហាមឃាត់បងប្អូនកម្មករ និយោជិតមិនឱ្យចេញពីរោងចក្រ ដើម្បីទៅទទួលទានអាហារនៅខាងក្រៅនោះឡើយ។ ជាទូទៅបងប្អូនកម្មករ និយោជិតមានសេរីភាពពេញលេញក្នុងការស្វែងរកទីកន្លែងសមស្របណាមួយ ដើម្បីបរិភោគអាហារ នៅពេលផុតម៉ោងការងារ។
លោក ខេន លូ បញ្ជាក់ថា៖ «ជាកិច្ចសម្រួលដល់រោងចក្រសហគ្រាសឱ្យនៅបន្តនិរន្តរភាពនៃដំណើរការផលិតកម្មនាំចេញ ដើម្បីបន្តទ្រទ្រង់សេដ្ឋកិច្ចកម្ពុជា សមាគមស្នើសុំ ឯកឧត្តមអគ្គបណ្ឌិតសភាចារ្យ ឯកឧត្តមសាស្ដ្រាចារ្យ ឯកឧត្តមបណ្ឌិត និងឯកឧត្តមអភិបាល មេត្តាជួយធានាបន្តនូវគោលនយោបាយរបស់រដ្ឋដែលមានពីមុនលើការចំណាយចំពោះការធ្វើតេស្ដ ការធ្វើចត្តាឡីស័ក និងការព្យាបាលរហូតដល់ជាសះស្បើយ ដែលជាបន្ទុករបស់រដ្ឋ និងបន្ធូរបន្ថយវិធានការមួយចំនួនដូចដែលបានរៀបរាប់ខាងលើ។
ប្រធានសមាគមស្បែកជើងកម្ពុជា លោក លី ឃុនថៃ បានចង្អុលបង្ហាញថា វិធានការនេះនឹងបន្ថែមបន្ទុកលើវិស័យរោងចក្រសហគ្រាស។ លោកបន្តថា៖ «យើងពេញចិត្តវិធានការរឹតបន្តឹង ដើម្បីប្រយុទ្ធប្រឆាំងនឹងជំងឺកូវីដ ១៩ ទោះជាយ៉ាងណា វិធានការនេះគឺអាចជាបន្ទុកបន្ថែមទៀតលើពួកយើង ហើយវានឹងប៉ះពាល់លើផលិតកម្មប្រសិនវាត្រូវបានអនុវត្ត»។ លោកបញ្ជាក់ថា៖ «យើងសង្ឃឹមថា រដ្ឋាភិបាល និងឯកឧត្តមអភិបាលសាលារាជធានីភ្នំពេញនឹងជួយបន្ធូរបន្ថយដល់ពួកយើងជុំវិញវិធានការនេះ»។
លោក Neo Schellinck ប្រធានផ្នែកតស៊ូមតិរបស់ EuroCham Cambodia បានប្រាប់ភ្នំពេញប៉ុស្ដិ៍ថា វិធានការនេះត្រូវបានពិភាក្សានៅទីនេះជាមួយសមាជិកជាច្រើន។ ទោះយ៉ាងណា លោកត្រូវការព័ត៌មានលម្អិតបន្ថែមដែលអនុវត្តការសម្រេចចិត្តស្របទៅតាមផែនការនេះ។
លោកថ្លែងថា៖ «មានសំណួរជាក់ស្ដែង និងការបារម្ភជាច្រើន ដែលនឹងចាំបាច់ត្រូវឱ្យដោះស្រាយ។ យើងចង់ឱ្យរដ្ឋបាលរដ្ឋធានី រៀបចំការពិគ្រោះយោបល់ជាមួយភាគីពាក់ព័ន្ធនៅក្នុងវិស័យឯកជន ដើម្បីលុបបំបាត់ក្តីបារម្ភរបស់ពួកគេជុំវិញវិធានការនេះជាមុនសិន»។
យោងតាមលិខិតបានពីរដ្ឋបាលរាជធានី គិតត្រឹមត្រីមាសទី ១ ឆ្នាំ ២០២១ ក្នុងភូមិសាស្ដ្រភ្នំពេញមានរោងចក្រចំនួន ៧៤៦ និង ៤ ៩៨៥ ទីតាំងនៃឧស្សាហកម្មខ្នាតតូច និងសិប្បកម្មដែលបានបង្កើតការងារផ្ទាល់ចំនួន ៤៧៦ ៣៥០ កន្លែង និងការងារមិនផ្ទាល់រាប់ម៉ឺនកន្លែង និងក្រុមប្រឹក្សាវិនិយោគរាជធានីភ្នំពេញបានចុះបញ្ជីរោងចក្របន្ថែមចំនួន ៣៤។
លិខិតនេះបន្តថា៖ «ទោះបីជាកាលៈទេសៈនៃជំងឺកូវីដ ១៩ នេះក៏ដោយ ក៏សកម្មភាពអាជីវកម្ម និងផលិតកម្មរបស់រោងចក្រសហគ្រាសស្ទើរតែទាំងអស់នៅតែប្រតិបត្តិការធម្មតា និងមានមួយចំនួនប៉ុណ្ណោះបានផ្អាកប្រតិបត្តិការ»៕ LA
វីដេអូ៖