ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃពុធបានចេញវិញ្ញាបនបត្រចុះបញ្ជីជាស្ថាពរឱ្យក្រុមហ៊ុន Leisger (Cambodia) Co., Ltd លើគម្រោងបង្កើតរោងចក្រផលិតទោចក្រយាន (កង់) ទោចក្រយានអគ្គិសនី (កង់អាគុយ) និងគ្រឿងបង្គុំទោចក្រយានគ្រប់ប្រភេទក្រោមទុនវិនិយោគ ១៣,៩ លានដុល្លារ។
យោងតាមសេចក្តីប្រកាសព័ត៌មានរបស់ CDC ឱ្យដឹងទៀតថា គម្រោងដែលស្ថិតក្នុងតំបន់សេដ្ឋកិច្ចពិសេស ស៊ីន បាវិត ក្នុងខេត្តស្វាយរៀងនេះ និងឱកាសបង្កើតការងារបានចំនួន ២៥១ នាក់។
អភិបាលរងខេត្តស្វាយរៀងលោក រស់ ផារិទ្ធ បានស្វាគមន៍រាល់គម្រោងវិនិយោគនៅក្នុងខេត្តស្វាយរៀងដែលតំបន់មានសក្តានុពលពាណិជ្ជកម្មខ្ពស់នៅព្រំដែនរវាងប្រទេសកម្ពុជា និងវៀតណាម។ លោកនិយាយថា៖ «យើងមិនទាន់ទទួលបានព័ត៌មាននេះទេ តែយើងជឿថា ការវិនិយោគនេះនឹងបង្កើតការងារជូនប្រជាជនថែមទៀត»។
លោក ផារិទ្ធ បន្តថា សមទ្ធិផលទាំងអស់នេះគឺជាកិច្ចខិតខំប្រឹងប្រែងរបស់ប្រមុខរដ្ឋាភិបាលក្នុងការកៀរគរវិនិយោគិនពីបរទេសមកកម្ពុជា។
លោកអះអាងថា៖ «យើងនឹងជួយសម្របសម្រួលក្នុងការផ្តល់សេវាសាធារណៈដល់ពួកគេ ដើម្បីបម្រើឱ្យគម្រោងបង្កើតរោងចក្រនេះ»។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិវិទ្យាស្ថានទំនាក់ទំនងអន្តរជាតិនៃកម្ពុជានៃរាជបណ្ឌិត្យសភាកម្ពុជាធ្លាប់បានលើកឡើងថា ការបង្កើតបានកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា-ចិន និងកម្ពុជា-កូរ៉េដែលគ្រោងនឹងចុះហត្ថលេខានៅពេលខាងមុខ ព្រមទាំង កិច្ចព្រមព្រៀង RCEP ជាដើម បាននិងកំពុងចូលរួមចំណែកទាក់ទាញការវិនិយោគនៅកម្ពុជា។
លោកនិយាយថា៖ «យើងនឹងមានលំហូរវិនិយោគិនមកបណ្តាក់ទុននៅកម្ពុជាកាន់តែច្រើននាពេលអនាគតពិសេស បន្ទាប់ពីស្ថានភាពនៃការរីករាលដាលជំងឺកូវីដ ១៩ ត្រូវបានបញ្ចប់ទាំងស្រុង»។
ទិន្នន័យពីក្រសួងពាណិជ្ជកម្មបានឱ្យដឹងថា ក្នុងឆ្នាំ ២០២០ កម្ពុជាបាននាំចេញកង់ និងគ្រឿងបន្លាស់ក្នុងតម្លៃសរុប ៥២៧,៨ លានដុល្លារ កើនឡើង ២៧,៧៨ ភាគរយ បើធៀបទៅនឹងឆ្នាំ ២០១៩ ដែលមានតម្លៃប្រមាណ ៤១២,៤៩ លានដុល្លារ។
លោក ស៊ាង ថៃ អ្នកនាំពាក្យក្រសួងពាណិជ្ជកម្មកាលពីខែមុនបានប្រាប់ភ្នំពេញប៉ុស្តិ៍ថា ប្រទេសដែលនាំចូលកង់ច្រើនពីកម្ពុជារួមមាន អាមេរិក ចក្រភពអង់គ្លេស អឺរ៉ុប ជប៉ុន កាណាដា ចិន កូរ៉េខាងត្បូង និងប្រទេសក្នុងតំបន់អាស៊ាន។
លោកនិយាយថា៖ «កត្តាសំខាន់ៗដែលជំរុញឱ្យការនាំចេញកង់ និងគ្រឿងបន្លាស់ពីកម្ពុជាទៅទីផ្សារអន្តរជាតិកើនឡើង គឺដោយសារមានការអំពាវនាវរបស់រដ្ឋមន្ត្រីក្រសួងពាណិជ្ជកម្មកម្ពុជាឱ្យអ្នកបញ្ជាទិញនៅបន្តការបញ្ជាទិញទំនិញពីកម្ពុជា និងការមានទំនុកចិត្តរបស់អ្នកបញ្ជាទិញ»។
បើតាមលោក ស៊ាង ថៃ បច្ចុប្បន្ននៅកម្ពុជាមានរោងចក្រផលិតដំឡើងកង់ចំនួន ៦ ស្ថិតនៅក្នុងតំបន់សេដ្ឋកិច្ចពិសេសនៃខេត្តស្វាយរៀង។
ក្រុមហ៊ុនប្រមាណជាង ៦ ពាន់បានចុះបញ្ជីអាជីវកម្មតាមប្រព័ន្ធថ្នាលបច្ចេកវិទ្យាព័ត៌មាន ដែលមានទឹកប្រាក់ជាង ២,៦ ពាន់លានដុល្លារក្នុងរយៈពេល ១ ឆ្នាំគត់ បន្ទាប់ពីរដ្ឋាភិបាលសម្រេចដាក់ឱ្យប្រើប្រាស់កាលពីថ្ងៃទី ១៥ ខែមិថុនា ឆ្នាំ ២០២០។ នេះបើតាមក្រសួងសេដ្ឋកិច្ច និងហិរញ្ញវត្ថុ។
ក្នុងឆ្នាំ ២០២០ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ២៣៨ គម្រោង ដែលមានទុនវិនិយោគសរុប ៨, ២ ពាន់លានដុល្លារ ថយចុះ ១២ ភាគរយបើធៀបនឹងឆ្នាំ ២០១៩។ ជារួមការថយចុះនេះស្ថិតក្នុងកម្រិតមួយល្អ ប្រសើរបើធៀបនឹងការព្យាកររបស់សន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍ (UNCTAD)។ នេះបើយោងតាម CDC៕ LA