ភ្នំពេញ៖ ក្រសួងពាណិជ្ជកម្មកំពុងរៀបចំសេចក្តីព្រាងគោលនយោបាយជាតិស្វាយចន្ទី ដើម្បីបង្កើនសក្តានុពលក្នុងការដាំដុះ និងនាំចេញផលិតផលស្វាយចន្ទីទៅកាន់ទីផ្សារអន្តរជាតិឱ្យបានកាន់តែច្រើននៅពេលអនាគត។
លោក រាជ រ៉ា រដ្ឋលេខាធិការក្រសួងពាណិជ្ជកម្ម និងជាអនុប្រធានក្រុមការងារចម្រុះរៀបចំគោលនយោបាយស្វាយចន្ទីកម្ពុជា បានលើកឡើងក្នុងកិច្ចប្រជុំផ្ទៃក្នុង ដើមី្បពិនិត្យ និងប្រមូលធាតុចូលលើសេចក្តីព្រាងគោលនយោបាយជាតិស្តីពីស្វាយចន្ទី កាលពីថ្ងៃទី ២៤ ខែមិថុនាថា ស្វាយចន្ទី គឺជាទំនិញមានសក្តានុពលដែលកម្ពុជាកំពុងមាន ទាំងការដាំដុះ និងការផ្គត់ផ្គង់លើទីផ្សារក្នុងស្រុក និងនាំចេញ។ ដូច្នេះការរៀបចំឱ្យមាននយោបាយជាតិស្តីពីស្វាយចន្ទី នឹងរួមចំណែកយ៉ាងច្រើនដល់ការសម្រេចបាននូវមហិច្ឆតាពេលអនាគតរបស់កម្ពុជា ក្នុងការក្លាយជាប្រទេសផលិត និងនាំចេញ។
លោកលើកឡើងថា៖ «គោលបំណងនៃសេចក្តីព្រាងគោលនយោបាយជាតិខាងលើ គឺប្រែក្លាយកម្ពុជាឱ្យក្លាយទៅជាប្រទេសផលិត និងផ្គត់ផ្គង់ផលិតផលស្វាយចន្ទីដ៏សំខាន់មួយ សម្រាប់បម្រើទីផ្សារក្នុងស្រុក តំបន់ និងពិភពលោក»។
បើតាមក្រសួងពាណិជ្ជកម្ម កិច្ចប្រជុំនេះ គឺការពិភាក្សា ដើម្បីប្រមូលធាតុចូលលើខ្លឹមសារសំខាន់ៗនៃសេចក្តីព្រាងគោលនយោបាយជាតិស្តីពីស្វាយចន្ទីតែប៉ុណ្ណោះ ដោយនឹងមានកិច្ចប្រជុំជាបន្តបន្ទាប់ទៀត។
លោកស្រី អិន ឡៃហួត ម្ចាស់សិប្បកម្មកែច្នៃគ្រាប់ស្វាយចន្ទី ជ័យ សំបូរ នៅខេត្តកំពង់ធំ បានប្រាប់ ភ្នំពេញ ប៉ុស្តិ៍ថា ដោយសារមានទីផ្សារល្អ បច្ចុប្បន្នលោកស្រីកំពុងសិក្សាទីផ្សារ និងស្វែងរកថវិកាមួយចំនួនយកមកពង្រីកចង្វាក់ផលិតកម្មពី ១០ តោន ក្នុង ១ ខែ ដល់ ២០ តោន ដើម្បីត្រៀមឆ្លើយតបនឹងកំណើនតម្រូវការទីផ្សារ។ លោកស្រីបន្តថា ទោះពេលនេះ សិប្បកម្មលោកស្រីទទួលបានប្រាក់ចំណេញទាប ប៉ុន្តែលោកស្រីនៅតែរីករាយ ព្រោះវាអាចជួយបង្កើតការងារដល់ប្រជាជនក្នុងសហគមន៍ ក៏ដូចជាអ្នកដាំដុះផងដែរ។
លោកស្រីបញ្ជាក់ថា៖ «បើនិយាយពីប្រាក់ចំណេញនៅមានកម្រិតទាបណាស់ ប៉ុន្តែខ្ញុំសង្ឃឹមថា នៅពេលមានទីផ្សារអន្តរជាតិបញ្ជាទិញច្រើន គ្រប់សង្វាក់ផលិតកម្មរាប់តាំងពីប្រជាកសិករដាំដុះ រហូតដល់អ្នកកែច្នៃនឹងទទួលបានភាពល្អប្រសើរជាងនៅពេលនេះ»។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន កាលពីពេលថ្មីៗនេះ បានជំរុញលើកទឹកចិត្តឱ្យប្រជាកសិករត្រូវខំស្វែងរកដៃគូឱ្យបានច្រើន ដើម្បីទទួលបានបច្ចេកទេសដាំដុះ បច្ចេកទេសកែច្នៃ និងទីផ្សារថ្មីៗបន្ថែមទៀត។ នៅពេលផលិតផលមានទីផ្សារ នឹងនាំឱ្យផលិតកម្មមានការកើនឡើង ដែលនាំឱ្យមានកំណើនប្រាក់ចំណូលបង្កើតឱកាសការងារថ្មីៗ។
របាយការណ៍ក្រសួងកសិកម្ម រុក្ខាប្រមាញ់ និងនេសាទ ឱ្យដឹងថា ក្នុងឆ្នាំ ២០២០ កម្ពុជានាំចេញគ្រាប់ស្វាយចន្ទីចំនួន ២១៨ ៩៨១ តោន កើនឡើង ៨,២៤ ភាគរយ ពីចំនួន ២០២ ៣១៨ តោន ក្នុងឆ្នាំ ២០១៩។ គ្រាប់ស្វាយចន្ទីត្រូវបាននាំទៅប្រទេសវៀតណាម ជប៉ុន រុស្ស៊ី ចិន ហុងកុង ថៃ បារាំង កូរ៉េខាងត្បូង បង់ក្លាដែស ម៉ាឡេស៊ី ហូឡង់ តួកគី និងឡាវ។ សព្វថ្ងៃនៅកម្ពុជាមានផ្ទៃដីចម្ការស្វាយចន្ទីប្រមាណជាង ៥០ ម៉ឺនហិកតា ដោយក្នុង ១ ហិកតា អាចផ្តល់ផលជាមធ្យម ១,៥ តោន ក្នុង ១ ឆ្នាំ៕