.jpg)
លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ អំឡុងពេលដឹកនាំកិច្ចប្រជុំនាពេលថ្មីៗនេះ។ រូបថត សហការី
ភ្នំពេញៈ កម្ពុជាបានប្រារព្ធទិវាសហគ្រាសធុនមីក្រូ តូច និងមធ្យម (MSMEs) លើកដំបូងនៅក្របខ័ណ្ឌថ្នាក់ជាតិក្នុងគោលបំណងបង្កើនការយល់ដឹងពីតម្រូវការសម្រាប់គាំទ្រពួកគេ ដើម្បីឆ្ពោះទៅរកភាពជោគជ័យ និងការអភិវឌ្ឍ។
ព្រឹត្តិការណ៍នេះត្រូវបានរៀបចំកាលពីថ្ងៃទី ២៧ ខែមិថុនា តាមរយៈប្រព័ន្ធ Zoom ក្រោមប្រធានបទ «ការស្ទុះងើបឡើងវិញ និងភាពធន់នៃសហគ្រាសធុនមីក្រូ តូច និងមធ្យម ក្នុងបរិបទជំងឺកូវីដ ១៩» ដែលមានអ្នកចូលរួមប្រហែល ២០០ នាក់ មកពីអន្តរក្រសួង ពាណិជ្ជករ និងដៃគូអភិវឌ្ឍន៍នានា។
លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ បានថ្លែងក្នុងព្រឹត្តិការណ៍នេះថា ដោយមានការអភិវឌ្ឍនូវគោលនយោបាយ និងក្របខ័ណ្ឌបទប្បញ្ញត្តិដូចជា ច្បាប់ SME គោលនយោបាយជាតិលើកកម្ពស់ SME និងបទប្បញ្ញត្តិបណ្ដុំ SME ក្រសួងរំពឹងថា នេះគឺជាមូលដ្ឋានគ្រឹះដែលនឹងទាញយកសក្ដានុពលពិតប្រាកដរបស់ MSMEs កម្ពុជា។
កាលពីដើមខែមិថុនា ដោយមានការគាំទ្រពី GIZ ក្រសួងនេះបានប្រកាសដាក់ឱ្យដំណើរការគេហទំព័រ KhmerSME ដែលជាថ្នាលព័ត៌មានវិទ្យាថ្នាក់ជាតិ ហើយគេហទំព័រនេះត្រូវបានធ្វើសមាហរណកម្មទៅ «ASEAN Access» ក្នុងគោលបំណងផ្សារភ្ជាប់សហគ្រាសជាមួយទីផ្សារអាស៊ាន។
លោក ចម ប្រសិទ្ធ បានបន្ថែមថា៖ «យើងមិនគ្រាន់តែដោះស្រាយបញ្ហាប្រឈម និងការកើនឡើងនៃបញ្ហាប្រឈមដែល MSMEs នៅកម្ពុជាកំពុងប្រឈម និងក្រោយពេលការរីករាលដាលជំងឺកូវីដ ១៩ ប៉ុណ្ណោះទេ ប៉ុន្តែថែមទាំងកំពុងស្វែងរកការផ្ដល់ប្រព័ន្ធអេកូស៊ីស្ដែមដែលត្រូវការបំផុត ហេដ្ឋារចនាសម្ព័ន្ធ និងការគាំទ្រដល់សហគ្រាសទាំងនេះឱ្យមានសមត្ថភាពប្រកួតប្រជែងបន្ថែម សមត្ថភាពនវានុវត្តន៍បន្ថែម និងភាពធន់កាន់តែខ្លាំងជាងមុនក្នុងការរៀបចំសម្រាប់ការស្ទុះងើបឡើងវិញក្រោយជំងឺកូវីដ ១៩ ដែលគេហៅថា «ពិភពលោកតាមគន្លងថ្មី» និងក្នុងពេលឆាប់ៗត្រូវគេហៅថា «ពិភពលោកមិនវិលតាមគន្លងធម្មតា»។
លោកបន្តថា៖ «ខ្ញុំសូមយកឱកាសនេះថ្លែងអំណរគុណក្រសួងពាក់ព័ន្ធ ដៃគូអភិវឌ្ឍន៍ នាយកដ្ឋានខ្សែបណ្ដោយនៅក្នុងកម្រិតថ្នាក់ជាតិ និងថ្នាក់ខេត្ត តំណាងវិស័យឯកជន និងភាគីពាក់ព័ន្ធជាច្រើនសម្រាប់ការគាំទ្ររបស់ពួកគេដល់ MSMEs យើងក្នុងអំឡុងពេលដ៏ពិបាកនេះ និងការងារដ៏ពិបាករបស់ពួកគេ ក្នុងការដាក់ចេញចក្ខុវិស័យដែលបានបញ្ជាក់ខាងលើឱ្យក្លាយជាការពិត»។
លោកស្រី Bettina Gruber នាយកស្ដីទី GIZ ប្រចាំកម្ពុជាបានថ្លែងនៅក្នុងទិវានេះថា ដូចដែលបានលើកឡើងក្នុងប្រធានបទនៃទិវា MSMEs ថ្នាក់ជាតិឆ្នាំ ២០២១ GIZ បានសហការជាមួយរាជរដ្ឋាភិបាលកម្ពុជា និងក្រសួងឧស្សាហកម្មមានគោលបំណងមិនគ្រាន់តែ ដើម្បីគាំទ្រអាជីវកម្មទាំងនេះក្នុងការស្ទុះងើបឡើងវិញប៉ុណ្ណោះទេ ប៉ុន្តែថែមទាំងដើម្បីទទួលបានអនាគតកាន់តែមានភាពធន់។
លោកស្រីលើកឡើងថា៖ «ខ្ញុំជឿថា យើងអាចបង្កើតបរិយាកាសអនុគ្រោះមួយនឹងអាចឱ្យមានការអភិវឌ្ឍជំនាញថ្មីៗ និងជំរុញនវានុវត្តន៍ដែលអាចឱ្យ MSMEs នៅកម្ពុជាដំណើរការទៅមុខហួសពីវិបត្តិជំងឺកូវីដ ១៩ ដែលរងផលប៉ះពាល់សេដ្ឋកិច្ច និងសង្គមដ៏ធ្ងន់ធ្ងរ»។
លោកស្រីបន្តថា៖ «ភាពល្អលើសពីគន្លងធម្មតាថ្មី ព្រមទាំងការទទួលបានសមត្ថភាពប្រកួតប្រជែងកាន់តែខ្លាំង នវានុវត្តន៍កាន់តែខ្លាំង និងភាពធន់ខ្លាំងជាងពីមុន។ ដោយសារជំងឺកូវីដ ១៩ ការរឹតបន្តឹងរូបវន្តដែលដាក់លើសេដ្ឋកិច្ចពិភពលោកបានជំរុញការបង្កើនល្បឿនដំណោះស្រាយឌីជីថល»។
លោកស្រីបានបញ្ជាក់ថា៖ «សម្រាប់ MSMEs ទាំងនោះនឹងអាចធ្វើប្រតិបត្តិការរបស់ខ្លួនតាមអនឡាញ ការធ្វើឱ្យមានលក្ខណៈឌីជីថលអាចដើរតួនាទីដ៏សំខាន់ក្នុងការអភិវឌ្ឍប្រកបដោយចីរភាព និងភាពធន់រយៈពេលវែង។ ជាមួយនឹងឱកាសទាំងនោះ ខ្ញុំសង្ឃឹមថា ព្រឹត្តិការណ៍នេះ និងការប្រារព្ធទិវាថ្ងៃនេះបង្ហាញមួយជំហានដ៏សំខាន់ឆ្ពោះទៅទំព័រថ្មីមួយនៃការរីកចម្រើន និងការអភិវឌ្ឍសម្រាប់ MSMEs របស់ប្រទេសកម្ពុជា»៕LA
